🍭`ချစ်တတ်ခြင်းက မင်းနဲ့မှ...´🍭
(Or)
ဂျစ်တူးရဲ့ `ဦး´
========== ♡ အခန်း ၄ ♡ ==========
``ငါအပြင်ခဏသွားလိုက်ဦးမယ်´´
``Grunt မင်းဘာဖြစ်နေတာလဲ
ပြန်လာကတည်းက ဂနာမငြိမ်နဲ့´´
မိုးလင်းသည်နှင့် အပြင်ထွက်ရန်ကြိုးစားနေသောသူ့အား သူငယ်ချင်းဖြစ်သူကနားမလည်စွာကြည့်ရင်းမေးလေ၏။သူလည်းရှည်ရှည်ဝေးဝေးရှင်းပြမနေနိုင်။တတ်နိုင်သမျှမြန်မြန်သာ ဟိုကလေးမလေးကိုရှာရမည်မဟုတ်လား။အခုဆို သူမဘယ်လိုနေပြီလဲမသိ။ဟူး! ဖြစ်ရလေကွာ၊တစ်ကိုယ်တည်းရပ်တည်ခဲ့တဲ့ဘဝမှာ ဘယ်နှောင်ကြိုးကိုမှမတွယ်တာခဲ့ဖူးသမျှ အခုမှတစ်ကြိမ်သာဆုံခဲ့သည့်အဲ့ဒီ့ကလေးလေးကို သူတွယ်ငြိမိလေသလား။အခုသူသွားဖို့ခြေလှမ်းပြင်နေတာက အစောင့်အကြပ်အထပ်ထပ်ရံတဲ့ Winnerစံအိမ်တော်ကိုလေ!
``မင်းဘယ်သွားမှာလဲ၊သူထိသွားတယ်မဟုတ်လား
ငါတို့အလုပ်ကပြီးပြီလေ´´
``ငါ Winnerရဲ့ပိုင်နက်ကိုခဏသွားမလို့´´
``ဘယ်လို!´´
``အဲ့ဒီ့ကလေးကိုသွားရှာမယ်´´
``မင်းရူးနေလား၊
ကိုယ်ပေါ်မှာဖြင့်ဒဏ်ရာတွေနဲ့...
Winnerစံအိမ်မှာသက်တော်စောင့်ဘယ်နှယောက်ရှိလဲမင်းသိလား?သူတို့ကပတ်သက်လို့ကောင်းတဲ့လူတွေမဟုတ်ဘူး၊ပြီးတော့ ငါတို့ညကပဲသူနဲ့ဖိုက်ခဲ့တာလေ...ဒီလိုပုံစံနဲ့သာမင်းဝင်သွားရင်အရိုးနဲ့အသားတွဲလျက်ရှိဖို့တောင်မသေချာဘူးနော်´´
``ဘာပဲဖြစ်ဖြစ် အဲ့ဒီ့ကလေးငါ့ကြောင့်ဒုက္ခရောက်တာကို ဘယ်လိုမှမျက်နှာမလွှဲရက်ဘူး...၊သူပြောတယ်၊ငါ့ကိုကူညီချင်တာတဲ့...ဒါပေမဲ့ငါက...´´
``သူကမင်းကိုလူကောင်းထင်လို့နေမှာပေါ့ကွ
Winnerဘက်ကိုပါသွားရင်တော့မလွယ်ဘူး၊ပါးပါးနပ်နပ်နဲ့ပြန်ထွက်ပြေးနိုင်ဖို့လိုတယ်၊ဒါပေမဲ့ အကျိုးအကြောင်းပြောပြရင်ရမှာပါ။သူနဲ့ကဘာမှမဆိုင်ဘူးပဲမဟုတ်လား´´
``သူ ဒီနိုင်ငံရဲ့စကားကိုမပြောတတ်ဘူး
မြန်မာပြည်ကလာခဲ့တာ´´
``ဟမ်!´´
``ပြီးတော့ ပစ္စည်းတွေအလုခံထားရတယ်လို့လည်းငါ့ကိုပြောတယ်၊သူ့ရဲ့ကိုယ်ရေးအချက်အလက်ကိုဘာမှပြနိုင်မှာမဟုတ်ဘူး´´
``သေပြီ၊အဲ့မှာကိစ္စတုံးတာပဲ
ဘယ်လိုတောင်ကံကြမ္မာဆိုးနေတဲ့ကောင်မလေးလဲကွာ´´
ထိုစကားကြားတော့ သူသက်ပြင်းကြီးသာချမိပါ၏။ဟုတ်ပါတယ်၊ကံဆိုးလွန်းတဲ့ ကောင်မလေးပါပဲ...ဒါကြောင့်သာ သူ့လိုလူမျိုးနဲ့လာဆုံရတာမဟုတ်လား။
``ငါသွားမယ်
သူ့ကိုဒီအတိုင်းတော့မထားနိုင်ဘူး´´
``ဟင်!ဟေ့ကောင်! မသွားနဲ့လေ
မင်းမှာ ဒဏ်ရာတွေနဲ့...
Grunt!!´´
ဘယ်လိုပင်အော်ခေါ်သော်လည်း သူဂရုမစိုက်မိခဲ့ပါ။ရင်ထဲရှေးရှုနေသောစိတ်က ထိုကလေးမအပေါ်အန္တရာယ်တွေမကျရောက်စေဖို့ တစ်ခုသာ။
~~~~~ 🍭🍭🍭🍭 ~~~~~
``ဟင်!´´
အနီးဝန်းကျင်၌ခပ်စိမ့်စိမ့်ရှိနေသည့်အအေးဓာတ်ကြောင့် လူကဆတ်ခနဲလန့်နိုးသွားရသည်။ဘေးပတ်ဝန်းကျင်ကိုမျက်လုံးပြူးလေးဖြင့်လိုက်ကြည့်တော့ ဘာမှမမြင်ရသည်မို့ ချစ်ရိပ်ခေါင်းနပမ်းကြီးသွားရပါ၏။
``ငါ...ငါမျက်စိဖွင့်ထားတယ်လေ
ဘာလို့မမြင်ရတာတုန်း´´
``.....´´
``ဒီလူကြီးငါ့မျက်လုံးကိုတစ်ခုခုလုပ်လိုက်တာလား
အား!! မာမီရေ...ဒယ်ဒီရေ...ချစ်ရိပ်မျက်လုံးတွေဘာမှမမြင်ရတော့လို့...အဟင့်!ကန်းပြီလားမသိပါဘူး အီး! ဟီး!´´
``.....´´
``အူး! ဝါး!!´´
``ဟာ!ဘာတွေအော်နေတာလဲကွာ
နားငြီးလိုက်တာ´´
``သတိရလာပြီ
Bossဆီအကြောင်းကြားလိုက်´´
``အေး!အဲ့ဒါအကောင်းဆုံးပဲ´´
အခန်းထဲမှပျံ့လွင့်လာသည့် ရင်ကွဲပက်လက်ငိုသံဟာ စံအိမ်တစ်ခုလုံးပင်နှစ်ခြမ်းကွဲမည့်အလား။ဒါတောင်မြေအောက်ခန်းကအော်နေတာပါတဲ့!အမလေးနော်...ဒီတရားခံဟာလူကောင်သေးသလောက် အသံကဖြင့်speakerအလုံး၂၀လောက်ဆက်တိုက်မျိုချထားသလိုပါပဲလား။
အခန်းပြင်မှာရှိနေသူတွေတောင် နားမခံသာတော့သည်မို့ အလုပ်ရှုပ်နေမည့်bossထံချက်ချင်းပြေးပြောရသည့်အဖြစ်။မဟုတ်ရင် သူမဘာအော်ပြီး၊ဘာတွေငိုနေမှန်း သိမှမသိဘဲလေ။ဒီလိုနဲ့ကမ္ဘာမှာ နာငြီးပြီးနေရာတင်လဲကျသေတဲ့မသာတွေဟာ သူတို့ရှေ့ဆုံးကဖြစ်သွားလိမ့်မယ်။bossကတော့ ဒီကောင်မလေးရဲ့စကားကိုနားလည်တာမို့ အဆင်ပြေလောက်တယ်။
``ဒေါက်! ဒေါက်!´´
ညတွေဆိုသတိရှိစွာအိပ်စက်တတ်သူက မနက်ခင်းမှာလည်း ခပ်စောစောထတတ်ပါ၏။ meetingအတွက်ပြင်ဆင်ထားသည့်စာရွက်တွေကိုsignထိုးနေရင်း တံခါးခေါက်သံကြောင့် မျက်လုံးတစ်ချက်ပင့်ကြည့်တော့ ဝင်လာသူကDawn။
``ညက ဖမ်းမိတဲ့ဟိုကလေးလေးသတိရလာပါပြီboss´´
``အင်း´´
``အဲ့ဒါသူကနိုးနိုးချင်းအော်ပြီးငိုနေပါတယ်
ဘာဖြစ်လို့လဲတော့ ကျွန်တော်လည်းမသိပါဘူး´´
ထိုစကားကြောင့် ခိုက် မျက်မှောင်တစ်ချက်ကျုံ့မိရပြန်သည်။ငိုနေတယ်တဲ့လား?သူသိတာဖြင့် အိပ်ရာနိုးနိုးချင်းအော်ငိုတတ်တာ မွေးကင်းစကလေးပေါက်လေးတွေပါလေ။ဘယ့်နှယ်!ဒီအရွယ်မိန်းမငယ်လေးက စိတ်မကြည်တိုင်းအော်ငိုတတ်တယ်တဲ့လား။
``အဟင်း!´´
သဘောကျစွာတစ်ချက်ရယ်လိုက်မိပြန်ပြီး laptopမှတဆင့် မြေအောက်ခန်းရဲ့CCTV cameraကိုonလိုက်သည်။ဒီအိမ်မှာက နေရာတိုင်း၊အခန်းတိုင်းCCTVတွေရှိသည်။အိမ်ကိုလူစိမ်းဝင်လား၊ထွက်လား...သူ,မရှိတဲ့အချိန်ဘယ်သူတွေဘာလုပ်ဖို့ကြံစည်သလဲ?စတာတွေအတွက် ကြိုက်ရာအခန်းကိုကြိုက်သလိုပြန်ကြည့်ဖို့ အခန်းတိုင်းလျှို့ဝှက်ကင်မရာတွေရှိသည်။ယခုလည်း laptop screenရဲ့ချိတ်ဆက်မှုမှတစ်ဆင့် ထိုကလေးငယ်ရှိနေသည့်အခန်းဆီကြည့်လိုက်လျှင်..
``အီး! ဟီး! လူဆိုးကောင်ကြီး
အကျင့်မကောင်းတဲ့မာဖီးယားအစုတ်ပလုတ်ကြီး
ငါဘာမှမမြင်ရတော့ဘူးလို့...၊မျက်လုံးကန်းအောင်ဘာလုပ်လိုက်တာလဲ´´
မှောင်မိုက်နေသည့်အခန်းထဲမှ ကျယ်လောင်နေသည့်ငိုသံလေးကိုကြားနေရသည်။ပြောရရင် ခိုက်လည်း သူမရဲ့အသံကိုကြားရုံကလွဲပြီး မျက်နှာမမြင်ရ။သို့သော် သူမအော်နေတာက အခန်းမှောင်တာကြောင့်မဟုတ်ဘဲ...သူ့မျက်လုံးကန်းသွားတာပါတဲ့လေ!
အား!လား!လား! ဘယ်လိုတွေတောင်လဲကွာ
ဒီကောင်မလေး Normalရောဟုတ်ရဲ့လား??
``အဟင်း!
ဟင်း! ဟင်း!´´
``boss ဘာ...ဘာဖြစ်လို့လဲဟင်´´
မနေ့ညကရော အခုထိပါ ဒီချာတိတ်ကြောင့်မရယ်စဖူးအရယ်ထူးနေသည့်bossကို dawnကနားမလည်သလိုလေးကြည့်နေရှာ၏။သူလည်းဘာလို့မှန်းမသိ၊ဒီကောင်မလေးကြောင့်ရယ်ပဲရယ်ချင်သည်။ဟိုဘက်အဖွဲ့နဲ့အဆက်အစပ်ရှိတယ်ဆိုပြီး သူ့အဖွဲ့တွေဖမ်းလာ၍သာ စစ်ဆေးဖို့ခေါ်ထားပေမယ့် တကယ်တမ်း ဒီကလေးပေါက်ကလူဆိုးအဖွဲ့ထဲကလို့တော့ သူမထင်ပါ။သို့သော်ဟိုအဖွဲ့ထဲကတစ်ယောက်နဲ့အတူရှိနေခဲ့တာကလည်းမှန်နေတော့ခက်သား။
``သွားရအောင်´´
~~~~~ 🍭 ~~~~~
``အဟင့်!ဟင့်! အီး! ဟီး!
လူဆိုးကောင်ကြီး...ကျမရှင့်ကိုတစ်သက်မကျေဘူး´´
``....´´
``ရှင့်ကိုမုန်းတယ်
အစုတ်ပလုတ်မကောင်းဆိုးဝါး...သေချင်း...´´
``ဖျတ်!´´
``အင်!´´
ရှိသမျှအသံကုန်အောင်အော်ဟစ်နေစဥ်မှာပင် ဖျတ်ခနဲဖြင့် ချစ်ရိပ်ရှိနေသည့်ရပ်ဝန်းတစ်ခုလုံးလင်းသွားလေ၏။ဒီတော့မှ ကြမ်းကြမ်းတမ်းတမ်းတွေထွက်မိတော့မည့်နှုတ်ဖျားလေး အင်ခနဲငြိမ်သက်သွားရကာ မျက်လုံးလေးပြူးသွားရပြန်သည်။
``ငါ့မျက်လုံးတွေမြင်ရသားပဲ´´
တကယ်ပဲ ချစ်ရိပ်ရဲ့ဘေးပတ်ဝန်းကျင်တစ်ခုလုံးကို သဲသဲကွဲကွဲမြင်ရပါ၏။မျက်လုံးတွေဟာလည်း အကောင်းအတိုင်းရှိသည်။ဒါဖြင့်ခုနက မမြင်ရတာ မီးမဖွင့်ထားလို့လား?
ဟိုက်!သေစမ်း...ငါတော့လုပ်ပြန်ပြီ။
``ဒါနဲ့ အခုကဘယ်နေရာကြီးလဲ
အေးလိုက်တာ´´
``ကျွီ!´´
အငိုတော့တိတ်သွားကာ မရင်းနှီးသောပတ်ဝန်းကျင်ထံ မျက်နှာငယ်လေးဖြင့်လိုက်ကြည့်နေမိစဥ် အခန်းတံခါးကြီးကပွင့်လာသည်။ပြီးတော့ ဝင်လာသည်က စက်ရုပ်လိုမျက်နှာကြီးတွေနဲ့လူနှစ်ယောက်။မနေ့ကလူကြီးကိုတော့မတွေ့မိ၍ ချစ်ရိပ်မျက်နှာလေးကိုခပ်ချေချေပင်လုပ်ထားလိုက်ကာ...
``ဒါဘယ်နေရာလဲ
ကျမရှင်တို့နဲ့စကားမပြောတတ်ဘူးနော်
ဟိုမာဖီးယားဦးလေးဘယ်ရောက်သွားလဲ၊သူ့ကိုခေါ်လိုက်´´
``ကိုယ်နဲ့မှပြောတတ်တယ်ပေါ့´´
ဗုဒ္ဓေါ!မာဖီးယားဦးလေးကတကယ်လာတာပဲ။ထုံးစံအတိုင်း မျက်နှာထားကြီးကလည်းတည်တင်းတင်းနဲ့။တကယ်ကိုကြောက်စရာကောင်းပြီးအေးစက်လွန်းလို့ အဲ့ဒီ့လူကြီးအနားမှာရေခဲငွေ့တွေထွက်နေသလိုပါပဲ။
ဟင်း!ဘယ့်နှယ်လဲ ချစ်ရိပ်ရယ်...ကိုယ့်ဘာသာအေးဆေးမနေဘဲလူတတ်ကြီးလုပ်ချင်ဦးဟလို့သာ ကိုယ့်ခေါင်းကိုပိတ်ထုပစ်လိုက်ချင်တော့တယ်...တကယ်!
``ပြောလေ၊ဘာပြောချင်တာလဲ´´
``ကျမကိုဒီကနေလွှတ်ပေး´´
``okလေ...ဒါဆိုမင်းနဲ့ Top fire Groupဘာပတ်သက်နေလဲ?ကိုယ့်ကိုပြောကြည့်´´
``ဘာfireအဖွဲ့လဲ
မီးအဖွဲ့နဲ့ပတ်သက်ရအောင်ကျမကမီးသတ်သမားမှမဟုတ်ဘဲ၊ပြီးတော့ ဘန်ကောက်ကလူလည်းမဟုတ်ဘူး၊မြန်မာပြည်ကလာခဲ့တာ´´
ဒီအချက်ကိုတော့ သူလည်းတွေးမိပါသည်။မြန်မာစကားကိုဒီလောက်လည်ဝယ်ပီသအောင်ပြောနေပုံအရ သူမကဒီနိုင်ငံသူမဟုတ်နိုင်။ဒီနိုင်ငံသူမဟုတ်ရင် ဟိုအဖွဲ့နဲ့ပတ်သက်စရာအကြောင်းကိုမရှိနိုင်။ဒါပေမဲ့ ညဘက်အချိန်ကြီးမှာသူမဘာလို့လမ်းပေါ်ရောက်နေရလဲတော့ သူတွေးမရသည်နှင့်...
``ဒါဆိုမင်းဒီမှာဘာလာလုပ်တာလဲ အမှန်အတိုင်းပြော...မပြောရင်မင်းဒီကနေလွတ်မယ်မထင်နဲ့´´
``ဟာ!ကျမဘာသာဘယ်သူဖြစ်ဖြစ်ရှင်နဲ့ဘာဆိုင်လို့လဲ၊ရှင်တို့ကိစ္စနဲ့မပတ်သက်ဘူးဆိုလွှတ်ပေးရင်ပြီးတာပဲ´´
``မပြီးဘူး၊မင်းကအဲ့ဒီ့ကောင်နဲ့ပတ်သက်နေတာလည်းအမှန်ပဲ´´
``အဲ့ဒီ့ကောင်ဟုတ်လား
သြော်!ရှင်ပြောတာဟိုအစ်ကိုလား´´
``ဟုတ်တယ်၊သူကဘယ်အဖွဲ့ကလဲ
မင်းနဲ့သူဘာပတ်သက်သလဲ´´
``မသိပါဘူး၊သူ့ကိုရောရှင့်ကိုရောညကမှတွေ့ဖူးတာ...ကျမလမ်းမှာရပ်နေတုန်းသူကဝင်တိုက်တယ်၊ပြီးတော့ ဒဏ်ရာကြီးနဲ့မို့အခြေအနေအကျိုးအကြောင်းမေးပြီးကူညီဖို့လုပ်နေတုန်း...ရှင့်ရဲ့လူဆိုးအဖွဲ့ရောက်လာတယ်´´
``ဒါဆိုမင်းက အခုမှသိတဲ့လူကိုယုံပြီးလက်ချင်းတွဲပြေးတယ်ပေါ့´´
``ဒါအခြေအနေရလေ´´
``သူဘယ်ကိုသွားမယ်ပြောလဲ
မင်းနဲ့ထပ်တွေ့ဖို့ပြောထားလား´´
``မပြောပြပါဘူး။ရှင်ကလူဆိုးလေ၊ကျမပြောရင် ရှင်သူ့ကိုဒုက္ခပေးမှာပေါ့။အဲ့ဒီ့အစားကျမပဲအဖမ်းခံလိုက်မယ်´´
သြော်!သူရဲကောင်းမကြီးပါလား။သူမ,ပြောတာဘာတဲ့!ရှင်ကလူဆိုးတဲ့...။ဆိုလိုတာ သူနဲ့တွေ့တဲ့ဟိုကောင်ကမှ လူကောင်းပေါ့လေ။တကယ်ပဲ စိတ်ရှည်ဖို့ခက်လိုက်တာ။ဒီခန္ဓာကိုယ်လေးလက်တစ်ဆုပ်ကို စိတ်ရှိလက်ရှိကိုင်ပေါက်လိုက်လို့ မြန်မာပြည်ပြန်ရောက်သွားတော့မယ်...ဟူး!!
``ဒါဆိုသက်သေပြ
မင်းသူတို့နဲ့မပတ်သက်ကြောင်း၊ဘယ်သူဘယ်ဝါဖြစ်ကြောင်းအထောက်အထားပြနိုင်ရင်ယုံပေးမယ်´´
ဟင်!အဲ့ဒါမှဒုက္ခ။ချစ်ရိပ်မှာ အဲ့ဒါတွေမှမရှိတော့ဘဲ။ဘယ်လိုလုပ်ရပါ့မလဲ?ပျောက်သွားတယ်ပြောရင်လည်း ယုံမှာမဟုတ်ဘူးထင်တယ်။
``ပြောလေ´´
``ဟို! ဟို! အဲ့ဒါကလေ...ဒီလိုရှိတယ်ဦးမာဖီးယားရဲ့´´
``ဘာ!´´
``အဲ့! အမလေး လန့်လိုက်တာ´´
``မင်းကိုယ့်ကိုဘယ်လိုတွေခေါ်နေတာလဲ?´´
``ဦးမာဖီးယားလေ
ကျမမှရှင့်နာမည်မသိဘဲကို´´
``မင်းသိတာတွေမှားနေပြီချာတိတ်
ကိုယ်ကမင်းထင်နေသလို လူဆိုးမဟုတ်ဘူး၊မင်းနဲ့တွေ့တဲ့သူကမှ ကိုယ့်ကိုဒုက္ခပေးတဲ့သူ´´
``ဟက်!မယုံပါဘူး
ကျမအထင်ရှင်ကသာ လူဆိုးနဲ့ပိုတူတာ´´
``ဟုတ်လား
ဒါဆို လူဆိုးနဲ့အခုထက်ပိုပြီးတူအောင် ကိုယ်နေပေးနိုင်တယ်...ယုံလား´´
ဒီစကားကိုတော့ ချစ်ရိပ်ရဲ့မျက်နှာအနားထိငုံ့ကပ်ကာပြောလာသည်မို့ နှစ်ယောက်သားကအနီးဆုံးအနေထားရောက်သွားရသည်။သေချာကြည့်မှ သူ့နဖူးမှာလည်း သွေးစို့နေသည့်ဒဏ်ရာကြီးတစ်ခုတော့ရှိသည်။သို့တိုင် အနီးကပ်ကြည့်လေ ပိုချောလေဖြစ်နေသော သူ့အသွင်ကြောင့် ချစ်ရိပ်လည်းနှလုံးခုန်နှုန်းတွေမြန်လာပြီး အသက်ရှူနှုန်းတွေအောင့်ထားမိ၏။
``ရှင်! ရှင်! ရှင်နော်
ကျမအနားမကပ်နဲ့´´
``ပြောစမ်း!မင်းနာမည်ဘယ်သူလဲ
ဘာမှရေရေရာရာမပြောနိုင်ရင် ကိုယ်မင်းကိုတစ်သက်လုံးဖမ်းထားပစ်မယ်´´
``အဲ့လိုတော့ရမလား
ကျမကနယ်နယ်ရရကလေးတစ်ယောက်မဟုတ်ဘူးနော်...မြန်မာနိုင်ငံကMoon..´´
Moonlight Groupပိုင်ရှင် ဦးလင်းညရိပ်ရဲ့သမီးလို့ထွက်မယ့်စကားကိုတန့်ခနဲရပ်လိုက်မိပါ၏။မဖြစ်သေးပါဘူး။ဒီလူတွေက လူဆိုးတွေလေ...၊တော်ကြာချစ်ရိပ်က လူချမ်းသာသားသမီးမှန်းသိသွားရင်မလွှတ်ပေးတော့ဘဲ ပြန်ပေးဆွဲထားပြီး ဒယ်ဒီ့ဆီကငွေညှစ်ရင်ရော...။
အမလေး! မဖြစ်ဘူး၊မဖြစ်ဘူး။လုံးဝပြောလို့မဖြစ်ဘူး။
``ပြောလေ´´
``ဟင့်အင်း...ပြောဘူး
ရှင်ကမယုံကြည်ရတဲ့သူ´´
ထိုစကားကြောင့်သူကဘာမှဆက်ပြောမလာဘဲ မျက်နှာကြီးကတည်သထက်တည်သွားလေ၏။ထို့နောက် ဟိုစက်ရုပ်မျက်နှာတွေဘက်လှည့်ကာပြောလိုက်သည်က...
``Dawn တံခါးပိတ်
မီးပါပိတ်´´
``ဟင်!´´
ဘာပြောလိုက်တယ်တော့မသိ။စကားဆုံးသည်နှင့်သူကချက်ချင်းထရပ်ကာချစ်ရိပ်ကိုကျောခိုင်းလိုက်သည်။ထိုနှင့်တပြိုင်နက် သူ့အနောက်ကလူတွေသည်လည်း တံခါးကိုပြန်ပိတ်ရန်ရွယ်လိုက်လေ၏။သို့မှ ချစ်ရိပ်လည်းအခြေအနေကိုသဘောပေါက်သွားရပါသည်။
ဒါလည်းမဖြစ်ဘူး၊ချစ်ရိပ်ကဒီအမှောင်ခန်းကြီးထဲမှာဘယ်လိုလုပ်နေရမှာလဲ...ဗိုက်လည်းဆာတယ် အဟင့်!
သူကျောခိုင်းသွားသည်နှင့် ချစ်ရိပ်ငိုမဲ့မဲ့လေးဖြစ်လာပြီး နေရာမှထရပ်၍ သူ့အနောက်သို့အပြေးလေးလိုက်ကာ...
``ဟေ့လူ! ဦးမာဖီးယား
အဲလေ...ဟုတ်ဘူး၊ဦးလူကောင်းလေးရယ် အဲ့လိုမလုပ်ပါနဲ့နော်´´
``ဒါဆိုကိုယ့်ကိုအမှန်အတိုင်းဖြေ
မင်းနာမည်ပြော´´
``နာ..နာမည်က ဂျစ်တူးတဲ့´´
``ဘာရယ်´´
``ဟယ်!ဘာဖြစ်တာတုန်း
ဒါလန့်စရာနာမည်မဟုတ်ဘူးနော်၊မြန်မာနိုင်ငံမှာဆို အရမ်းလိမ္မာတဲ့သားသမီးလေးတွေကိုမှအဲ့နာမည်ပေးတာ...ဦးလေးကြီးကမြန်မာလိုနားသာလည်တာ မြန်မာလူမျိုးမှမဟုတ်တာ...ဒါကြောင့်ဘယ်သိမလဲ...ဟင်း!ဟင်း!´´
Biographyအမှန်ကိုဖုံးဖိအရေးရှိသမျှနည်းနဲ့ဂျင်းထည့်နေသောချစ်ရိပ်ပါပင်။သူကလည်းထိုအမည်ကြောင့် ငြိမ်သက်သွားပြီးတစ်စုံတစ်ရာကိုစဥ်းစားဟန်ပြု၍...
``ကိုယ့်အထင်မင်းကိုယ့်ကိုကိုယ်သုံးတဲ့နာမည်ကချစ်ရိပ်မဟုတ်ဘူးလား´´
သိရင်လည်းဘာလို့လာမေးနေသေးလဲ...အစုတ်ပလုတ်မာဖီးယားရဲ့။
စိတ်ကအော်ဟစ်လိုက်ပေမယ့် လူလေးကတော့ချစ်စဖွယ်အပြုံးလေးဖြင့်...
``အဟင်း...ဟင်း
ဟုတ်တယ်...နာမည်ကချစ်ရိပ်ဂျစ်တူးလေ´´
``သြော်!ဟုတ်လား´´
``ဟုတ်တယ်´´
``Dawn!´´
``ဟုတ်ကဲ့ boss´´
``တံခါးပိတ်´´
``ဟမ်!´´
လိမ်တာကလည်းအဆင်မချောလိုက်သည့်ဖြစ်ခြင်း။ဘယ်လိုပဲပြေလည်အောင်ကြံဆောင်ပါစေ၊သံသယများပြီးပါးနပ်လွန်းသည့်သူက ယုံပုံမရဘဲ ဇွတ်ကိုအခန်းတံခါးပိတ်ခိုင်းနေလေ၏။
``ဒုန်း!´´
ဒီတစ်ခါတော့ တံခါးကြီးကတကယ်ပိတ်သွားခဲ့သည်။အခန်းကလည်းနဂိုအတိုင်းမှောင်ပိတ်သွားခဲ့၏။
``အဟင့်! ဦးလေးကြီး...ချစ်ရိပ်ကိုတံခါးဖွင့်ပေးပါ´´
``ဒုန်း! ဒုန်း!´´
မှောင်သွားသည့်အခန်းထဲကျန်နေခဲ့မှ ကြောက်စိတ်လေးနှင့်အတူ အခန်းတံခါးဆီပြေးကာတဒုန်းဒုန်းထုနေမိ၍ ချစ်ရိပ်လက်ဖဝါးလေးတွေပင် နာကျင်ပူထူလာပါသည်။သို့သော်လည်း မလှုပ်မယှက်ရှိနေသော တံခါးကြီးရဲ့နောက်ကွယ်မှာ အရာအားလုံးကအချည်းနှီး။
``ချစ်ရိပ် ဒီနေရာကြီးမှာမနေချင်ဘူး
ကြောက်တယ်၊အရမ်းလည်းအေးတယ်...ဟင့်!ဟင့်!´´
``.....´´
``ဗိုက်လည်းဆာတယ်လို့´´
``.....´´
``ဦး!!´´
ငိုရင်းရှိုက်ရင်းခေါ်လိုက်သည့် ဒီနာမ်စားလေးတစ်ချက်မှာတော့ သူ့ခြေလှမ်းတို့တန့်ခနဲရပ်သွားရပါ၏။ဘာကြောင့်မှန်းမသိ၊ နှလုံးအိမ်တစ်နေရာဆီမှနွေးသောခံစားချက်လေးတစ်ခုရုတ်တရက်ပဲခုန်ထွက်လာသည်။ပြီးတော့ ဝဲဘက်ရင်အုံဆီမှ တဒိတ်ဒိတ်တိုးခုန်လာသော စည်းချက်တွေကပုံမှန်ထက်ပြင်းထန်လို့နေ၏။
``ဘာဖြစ်တာလဲ´´
ကိုယ့်ရင်ဘတ်ဆီလက်ဖြင့်စမ်းရင်း နားမလည်စွာဆိုမိတော့ အနောက်ကနှစ်ယောက်ပါ မျက်လုံးပြူးလေးတွေဖြင့်ကြည့်လာပြီး...
``ဘာဖြစ်လို့လဲ boss´´
``ဟင်
ဘာမှမဖြစ်ပါဘူး၊သွားစို့´´
`သွားစို့´ပြောပြီးခြေထောက်ကရှေ့ကိုလှမ်းပေမယ့် မျက်ဝန်းတို့ကတော့ စေ့ပိတ်ပြီးသားအခန်းငယ်ဆီလှည့်ကြည့်လိုက်မိပြန်သည်။
``သူ့ကိုဘယ်လိုလုပ်မလဲ boss´´
``ထားလိုက်
သူဘာမှမသိဘူး၊ဒီအတိုင်းတခြားကိစ္စနဲ့ရောက်လာတာ...ဒီနိုင်ငံကလည်းမဟုတ်ဘူး´´
``ဒါဖြင့်ကျွန်တော်တို့ကိစ္စနဲ့မဆိုင်ဘဲဖမ်းမိတာဆိုရင်ပြန်လွှတ်လိုက်မယ်လေ´´
``ကျစ်!
ကလေးတစ်ယောက်ထဲလမ်းမှာလျှောက်သွားနေရင် အန္တရာယ်များတယ်ကွ၊မင်း နားမလည်ဘူးလား´´
``ဗျာ!´´
Oh God! သူဘာပြောမိတာပါလိမ့်။လွယ်လင့်တကူပါးစပ်ကထွက်သွားမိတဲ့ နာမ်စားနဲ့စကားကြောင့် ကိုယ်တိုင်တောင်ဘုရား,တမိသွားရသလို ဘေးကနှစ်ယောက်လည်း တအံ့တသြဖြင့်ကြည့်နေလေရဲ့။
ဖြစ်ရလေ ခိုက်ရန်ရှင်းရယ်
မင်းဘယ်လိုတောင်သတိလွတ်သွားရတာလဲ??
``ဟို!ဒါဆို bossကဘယ်လိုလုပ်စေချင်လို့လဲ´´
``မြန်မာနိုင်ငံဘက်မှာစုံစမ်းကြည့်
လောလောဆယ်ဘာမှမသိရသေးခင်တော့ သူ့ကိုဒီမှာပဲထား၊အခန်းကနေခြေတစ်လှမ်းတောင်မထွက်စေနဲ့ကြားလား´´
``ဟုတ်ကဲ့´´
~~~~~ 🍭🍭🍭🍭 ~~~~~
ဒီလိုနှင့် ထိုချာတိတ်လေးသူ့ဆီရောက်တာနှစ်ရက်ရှိသွားခဲ့ပါပြီ။ရောက်လာစဥ်ကတည်းက သူမဘယ်သူဘယ်ဝါမှန်းသိရမယ့်အထောက်အထားပါမလာခဲ့သလို ဇွဲကောင်းလွန်းတဲ့ကလေးငယ်ကလည်း သူ့နာမည်`ချစ်ရိပ်ဂျစ်တူး´ဆိုတာကလွဲရင် ဘာမှကိုပြောမလာပါချေ။အိမ်ပြန်မယ်လည်းမပြောပုံထောက် သူမဟာတကယ်ပဲမိသားစုအရိပ်ကနေထွက်လာတဲ့ ဂျစ်တူးလေးတစ်ယောက်များလား။သူ့ကိုယ်သူလည်း ဂျစ်တူးလို့ပြောတယ်ဆိုတော့လေ...။
အဟက်!သူမပြောတာကတော့ ဘာတဲ့
ဂျစ်တူးဆိုတာ အရမ်းလိမ္မာတဲ့သားသမီးလေးတွေကိုမှပေးတဲ့နာမည်ဆိုပဲ။မှတ်တောင်ထားရပါဦးမယ်...၊တကယ် ဘယ်လိုပေါက်တတ်ကရကောင်မလေးလဲ။ကိုယ်မသိဘူးအမှတ်နဲ့တလွဲပြောချင်ရင်လည်း ဒါကတော့လွန်လွန်းပါတယ်။
ဒီလူက မသိဘူးဆိုတော့...အဟင်း!
``ချစ်ရိပ်ဂျစ်တူး
ဂျစ်တူး! အင်း...ခေါ်လို့တော့ကောင်းသားပဲ´´
``ဒေါက်! ဒေါက်!´´
သဘောကျနေမိသည့်နာမ်စားလေးအား နှုတ်မှရေရွတ်လျက် ပြုံးနေမိစဥ်အခန်းတံခါးခေါက်သံကြောင့် မျက်နှာကချက်ချင်းတည်သွားရပြီး...
``Come in´´
``Boss´´
``ဘာကိစ္စရှိလို့လဲ´´
``အခုပဲ စံအိမ်ကနေဆက်သွယ်လာပါတယ်
ဟိုကလေးမ...မြေအောက်ခန်းမှာဖမ်းထားတဲ့ဟိုပေါက်စလေးလေ´´
``အင်း!ပြော...သူဘာဖြစ်လို့လဲ´´
``အဖျားတွေအရမ်းတက်ပြီးသတိလစ်နေလို့
ခေါ်နှိုးမရတော့ဘူးတဲ့´´
``ဘာ!!´´
~~~~~ 🍭🍭🍭🍭 ~~~~~
အခန်း >>> ၅ဆက်ပါမည်။
ချစ်သည်းတို့အတွက်တစ်ခဏတာသောစိတ်အပန်းဖြေမှုလေးတွေရရှိစေရန် ရည်ရွယ်ရေးသားသော...
WineSatt Cho(🍋Lëmoñ🍋)