🍭`ချစ်တတ်ခြင်းက မင်းနဲ့မှ...´🍭
(Or)
ဂျစ်တူးရဲ့ `ဦး´
========== ♡ အခန်း ၃ ♡ ==========
ခပ်ဖြေးဖြေးနဲ့တရွေ့ရွေ့သွားနေသောခြေလှမ်းလေးရဲ့ဟိုးတစ်ဖက်မှာ စောစောကလူရှိနေဦးမလားတော့မသေချာပါ။နေရာကအနည်းငယ်မှောင်နေတော့ ကြောက်စိတ်လေးလည်းဝင်လာသား။သို့နှင့် ချစ်ရိပ်ဆက်မသွားတော့ဘဲ ရပ်လိုက်ကာ...
``မသွားတော့ဘူးဟာ
သူနဲ့ငါကသိတာလည်းမဟုတ်၊တော်ကြာသူကလူဆိုးဆိုဘယ့်နှယ်လုပ်မလဲ?ငါလေးပဲ ဒုက္ခရောက်ဦးမယ်´´
ဒီလိုတွေးမိတော့ ခြေလှမ်းကိုနောက်ကြောင်းပြန်လှည့်လိုက်ပါ၏။သို့သော်လည်း မပြတ်သားသောစိတ်က ဝန်လေးသလိုနှင့်တစ်မျိုးကြီး။သိတဲ့အတိုင်းတစ်ယောက်ယောက်ဒုက္ခတွေ့နေရင် မြင်တဲ့လူကကူညီဖို့မှမရှိတာ။ညနေကပဲ ချစ်ရိပ်ရဲ့ကိုယ်တွေ့လေ။ဒီလူက ဒဏ်ရာတွေအများကြီးရနေတဲ့ဟာ၊တွေ့လျက်သားနဲ့မကယ်ရင်ရော...ရိုင်းရာကျမနေဘူးလား။ဒီလိုနဲ့သူလမ်းပေါ်မှာသေသွားခဲ့ရင် ချစ်ရိပ်ကို သရဲကြီးလာခြောက်ရင်ဒုက္ခ။
ဟင်း! ဘာတွေတုန်းဟာ...
ထိုနေရာ၌ခြေစုံလေးရပ်ပြီး အတွေးတွေကျပ်နေရင်းပဲမိုးလင်းတော့မည့်အလား။လမ်းကတစ်ဖက်ပိတ်ကြီးမို့ ဒီလူက ဒီအနီးအနားတင်ပျောက်နေတာပါ။သို့ကြောင့်ပဲ ချစ်ရိပ်မျက်လုံးလေးက ဟိုသည်စူးစမ်းလျက်လိုက်ကြည့်နေစဥ်...
``ဟင်!´´
အခုမှအောက်ငုံ့ကြည့်မိတော့ သူသွားရာလမ်းတစ်လျှောက်သွေးစတွေတစ်စက်စက်ကျနေခဲ့သည်ပဲ။သို့နှင့် ချစ်ရိပ်ထိုသွေးစက်တွေကိုခြေရာခံကာ တရွေ့ရွေ့ဆက်လျှောက်လာခဲ့၏။စူးစမ်းတတ်သူပီပီ သူဘာဖြစ်လာခဲ့မှန်းလည်းသိချင်ရပြန်ပြီ။
``အ!
ကျစ်! ကျစ်!´´
``သြော့! ဒီမှာကိုး´´
သွေးစတွေအတိုင်းလိုက်လာခဲ့ပြီးနောက်ဆုံးမှာတော့ ချစ်ရိပ်ထိုသူ့ကိုရှာတွေ့သွားခဲ့၏။သူက လမ်းထောင့်အကွယ်၌ ခွေခွေလေးထိုင်နေကာ မျက်နှာကလည်းအတော်အခြေအနေဆိုးနေပေမယ့် သတိကတော့ရှိလွန်းသည်။အခုလည်းလူရိပ်တစ်ခုသူ့အနားရောက်သည်နှင့် တိုက်ခိုက်တော့မည့်အနေအထားဖြင့်ဆတ်ခနဲထလေသည်မို့...
``ဟေ့လူ!
ချစ်ရိပ်ကရှင့်ရန်သူမဟုတ်ဘူးနော်၊ရှင်ဒဏ်ရာရနေတာတွေ့လို့...ကူညီချင်လို့´´
လွယ်လင့်တကူပင်မြန်မာစကားနဲ့လှမ်းပြောလိုက်၍ သူကလည်းချစ်ရိပ်ထံခပ်စူးစူးကြည့်နေပါသည်။သို့သော်ဘာမှတော့ပြန်မပြောပေ။
``အာ!သူက ထိုင်းလူမျိုးထင်တယ်
ငါ ပြောတာနားလည်မှာမဟုတ်ဘူး´´
``ပြောပါ၊ကိုယ်နားလည်တယ်´´
ဒီအတိုင်းကြည့်နေသည့်ရုပ်တည်ကြီးထံမှ မြန်မာစကားထွက်လာ၍ ချစ်ရိပ်အံ့သြဝမ်းသာလေးဖြစ်သွားရသည်။ဒုက္ခရောက်နေစဥ်တစ်လျှောက်လုံးမှာ လူမျိုးတူချင်းတွေ့မှမတွေ့မိလေပဲ။ကြည့်စမ်း!ငါလေး ကံကောင်းချက်။
``ရှင်အဆင်ပြေရဲ့လား´´
``မင်းဒီနားအထိဘာလာလုပ်တာလဲ
မင်းလိုမိန်းမငယ်လေးက ဒီအချိန်လမ်းပေါ်မှာနေတာ အန္တရာယ်များတယ်´´
``ဟိုဟာ!ချစ်ရိပ်လည်းဒုက္ခရောက်နေလို့ပါ
အခုတောင်ရဲစခန်းသွားမလို့၊ရှင်လိုက်မလားဟင်´´
သူမရဲ့အမေးကြောင့် သူ့မှာရယ်ရအခက်၊စိတ်ဆိုးရလည်းအခက်။လူကိုကူညီချင်ပါတယ်ဆိုပြီး ရဲစခန်းခေါ်နေသည်တဲ့။ဒီကဘာကောင်လဲ သူမဖြင့်မသိပါဘဲလေ။
``မင်းကဘာဖြစ်နေလို့လဲ´´
``ချစ်ရိပ်ရဲ့အိတ် အလုခံရလို့
အဲ့ထဲမှာပိုင်ဆိုင်သမျှအကုန်ပါတာ´´
``မင်းက မြန်မာလူမျိုးလား´´
``ဟုတ်!ခဏလေးခရီးထွက်လာရင်းအခုလိုဖြစ်တာ...ဒါနဲ့ ဒါနဲ့ရှင့်ဒဏ်ရာကဘယ်လိုရတာလဲ?ဘယ်သူကရှင့်ကိုဒုက္ခပေးလိုက်တာလဲ´´
``မင်းသိဖို့မလိုပါဘူး၊သွားတော့
ဒီမှာကြာကြာရှိနေရင်မင်းကိုကိုယ့်ဘက်ကလူလို့ထင်သွားလိမ့်မယ်´´
``ဘယ်သူကထင်မှာလဲ´´
``သိဖို့မလိုဘူးလို့ ကိုယ်ပြောနေတယ်လေ´´
``ဒါဖြင့် ရှင်ဆေးခန်းမသွားဘူးလား
ရှင့်မှာပိုက်ဆံပါလားဟင်?ရှင်အပြင်ထွက်လို့မရဘူးဆို ချစ်ရိပ်ဆေးသွားဝယ်လာခဲ့မယ်လေ´´
တကယ်ပင် စိတ်လိုလက်ရပြောနေသည့်ဟန်ပန်လေးက ရင်ထဲကလာတဲ့စကားမှန်းအသိသာ။သူဆိုတာ တစ်သက်နဲ့တစ်ကိုယ်တစ်ယောက်တည်းပဲရှင်သန်ရုန်းကန်လာခဲ့သူမို့ စိတ်ရင်းနဲ့ဆက်ဆံပေးတဲ့သူကိုလည်းတွေ့ခွင့်ရဖို့အတော်ရှားပါးခဲ့တာ။ထို့ကြောင့်ပဲ မျက်စိရှေ့ကအဖြူထည်ကလေးမလေးရဲ့စကားသံ၌ ခေတ္တမျှငြိမ်သက်သွားမိကာ ချစ်စဖွယ်မျက်နှာလှလှလေးထံငေးစိုက်ကြည့်နေမိ၏။ထို့နောက် လမ်းဘေးနံရံကိုကျောမီကာ ခပ်ဖြေးဖြေးပြန်ထိုင်ချလိုက်သည်။ခေါင်းကတရိပ်ရိပ်မူးနေပြီး တစ်ကိုယ်လုံးလည်းနာကျင်နေပြီ။
``ရှင့်ကြည့်ရတာအဆင်မပြေတဲ့ပုံပဲ´´
``မင်းသွားချင်တဲ့ရဲစခန်းက ဒီကနေတစ်နာရီလောက်လမ်းလျှောက်မှရောက်မယ်၊ကားငှားသွားလိုက်...ကိုယ်ပိုက်ဆံပေးမယ်´´
``မဟုတ်ဘူးလေ
ပိုက်ဆံပါတယ်ဆို ရှင့်ဒဏ်ရာအတွက် ဆေးအရင်...´´
``ကိုယ့်ကိုမကူညီနဲ့၊
မင်းသွားတော့´´
``ဒါပေမဲ့...´´
``ကျစ်!ဘာလို့ဒီလောက်ပြောရခက်တာလဲကွာ
မင်းဒီလောက်ကူညီချင်နေတာ ကိုယ်ကလူဆိုးမှန်း၊လူကောင်းမှန်း မင်းမမေးတော့ဘူးလား၊ဒီလိုအချိန် ဒဏ်ရာအများကြီးနဲ့ထွက်ပြေးလာတဲ့လူက ကျိန်းသေလူကောင်းမဟုတ်ဘူး...မင်းသွားတော့´´
``ဟင်!ဒါဖြင့် ရှင်ကလူဆိုးလား´´
အံ့သြသလိုလေးမေးမိတော့ သူကမျက်နှာတည်ဖြင့်ခေါင်းငြိမ့်၏။မဖြစ်နိုင်လိုက်တာ၊ချစ်ရိပ်အထင်အရ သူ့ပုံစံကလူဆိုးနဲ့မတူဘူးလားလို့။
``ဘာပဲဖြစ်ဖြစ်ပါ၊ရှင်ကလူဆိုးဆိုလည်းဒီအချိန်မှာဒဏ်ရာရနေတာဆိုတော့ အားနည်းသူပဲ၊ရှင့်ကိစ္စကချစ်ရိပ်နဲ့မှမဆိုင်တာ´´
သြော်!ပြောရလည်းခက်ပါ့။သူဆိုလိုတာက ကူညီဦးမှာပဲဆိုတဲ့သဘောပေါ့။တကယ်စိတ်ရှည်ဖို့ခက်တဲ့ကလေးမလေးပါလားနော်။ဒီက သူဒုက္ခရောက်မှာစိုးလို့ပြောနေတဲ့ဟာ။
``ကူညီချင်တာကျေးဇူးတင်ပါတယ်
ဒါနဲ့မင်းရဲ့နာမည်က ချစ်ရိပ်ပဲလား´´
``ဟုတ်! နာမည်အရင်းက ချစ်ရိပ်ဖန်...´´
``ရှူး!!´´
``ဒီမှာသဲလွန်စရှိတယ်
ဒီနားမှာပဲရှာ´´
နေရာချင်းအနည်းငယ်လှမ်းသေးပေမယ့်နားပါးလွန်းသည့်သူက အသံကိုဆတ်ခနဲကြားသည်။ထို့ကြောင့်သူမရဲ့နှုတ်ခမ်းလေးပေါ်လက်ဖြင့်ဖွဖွအုပ်လိုက်ပြီး အသံတိတ်ဖို့မျက်ရိပ်ပြလိုက်၏။သူမလေးလည်းအသံကိုကြားပုံရပြီး မျက်လုံးပြူးလေးဖြင့်လာကြည့်ကာ...
``လူဆိုးတွေရှင့်ကိုလာရှာတာလား´´
ပြောနေရင်းနဲ့ပဲခြေသံတွေနီးကပ်လာသည်မို့ သူချက်ချင်းထရပ်ပြီး သူမအရှေ့ကနေကာရပ်လိုက်မိ၏။ဘယ်လိုပဲဖြစ်ဖြစ်မသက်ဆိုင်တဲ့သူလေးကို ကြားညှပ်မထိခိုက်စေလိုပေ။သူဆိုတာ ဘဝအခြေအနေအရ လူဆိုးတစ်ယောက်ဖြစ်နေရပေမယ့်အပြစ်မဲ့သူတွေအပေါ် မရက်စက်တတ်တဲ့နှလုံးသားကတော့ မွေးရာပါပြီးသား။သို့သော် ဘဝရဲ့ရှင်သန်ဖြတ်သန်းမှုအတိုင်း လက်မရွံ့စွာလူသတ်ဝံ့တာလည်း မမှား။
ဟုတ်ပါတယ်၊ခပ်ကြမ်းကြမ်းပဲခေါင်းစဥ်တပ်ရရင် သူက....ကြေးစား။
``ဘယ်လိုလုပ်မလဲ
ရှင်ဒီပုံစံနဲ့သူတို့ကိုပြန်မခုခံနိုင်လောက်ဘူး´´
``သြော်!ဟော်! မင်းကဒဏ်ရာဗရပွနဲ့တောင်သာယာနေသေးတာကိုး´´
ပြောရင်းနဲ့ပဲ ခပ်တောင့်တောင့်bodyကြီးတွေနဲ့လူတစ်စုချစ်ရိပ်တို့ရှေ့ရောက်လာလေပြီ။ထိုလူတွေကထိုင်းလိုပြောနေ၍ချစ်ရိပ်နားမလည်တော့ပေ။သို့နှင့် သူ့ကိုပဲပြန်မော့ကြည့်နေမိစဥ်သူက ချစ်ရိပ်ရဲ့လက်ကောက်ဝတ်လေးထံဖျတ်ခနဲလှမ်းဆွဲလိုက်ပြီး...
``ကိုယ်တို့သွားမှဖြစ်မယ်´´
သူမကိုထားခဲ့လို့ကမဖြစ်တော့ပါ။နှစ်ယောက်တွဲလျက်ရှိနေတာမြင်သွားပြီမို့ သူမကိုလည်းသူနဲ့ပတ်သက်မှုရှိနေတယ်လို့ကျိန်းသေယူဆပြီး ပစ်မှတ်ထားတော့မှာ။ဒါကြောင့်ပြောတာပေါ့၊ဒီကလေးမကစကားမှနားမထောင်ချင်တာ။
``လူဆိုးကောင်တွေ
နင်တို့သူ့ကိုအနိုင်မကျင့်နဲ့နော်´´
``နှစ်ယောက်လုံးခေါ်လာခဲ့´´
``ဟင်! ရှင်တို့...ရှင်တို့နော်
အင်အားသုံးပြီးဒီလိုအနိုင်ကျင့်လို့မရဘူး´´
``ဟေ့!မအော်နဲ့တော့
သူတို့နားမလည်ဘူး၊လာ! ဒီကို´´
တစ်ယောက်တည်းပြေးရင်လွတ်ပါဦးမည်။သို့သော် ယခုမှတွေ့ဆုံရသည့် သူရဲကောင်းမမလေးကိုထိခိုက်သွားမှာစိုး၍ အန္တရာယ်ဆီကိုယ်ပဲပြေးဝင်ရသည်။လက်လေးကိုလည်းမလွှတ်တမ်းကိုင်ဆွဲထားမိ၏။သူမကတော့ အခြေအနေအရှုပ်အထွေးကြား အသံစူးစူးလေးဖြင့်အော်ပြောရန်လုပ်နေလေရဲ့။တကယ်ပဲ ထင်ရာတွေလျှောက်လုပ်နေတဲ့ဒီကောင်မလေးနဲ့တော့ခက်တယ်။
သူမနဲ့ကျမှ လူဆိုးဖြစ်တဲ့ကိုယ်တောင် ရေရေလည်လည်အကာကွယ်ခံနေရတော့ လူမှာမာန်တောင်တက်ချင်လာသလိုပဲ။
``အ! သေပါပြီ
နာတယ်´´
သူကနဂိုကတည်းကဒဏ်ရာတွေနဲ့မို့ ထိုလူတွေကိုလည်းကြာကြာမခုခံနိုင်ပါ။သို့သော်ချစ်ရိပ်လက်ကိုတော့ဆွဲကာ ထိုနေရာမှအတင်းထွက်ပြေးသည်မို့ ချစ်ရိပ်လည်းဘာတွေဖြစ်မှန်းနားမလည်စွာသူခေါ်ရာနောက်ပါလာခဲ့ရ၏။ဘယ်လိုပဲဖြစ်ဖြစ်သူက လူရမ်းကားတစ်ယောက်မဟုတ်မှန်းချစ်ရိပ်အတည်ပြုပြီးပြီ။ဟိုလူတွေကသာ ဂိုဏ်းစတားတွေလိုကြောက်စရာပုံကြီးတွေမို့ ချစ်ရိပ်တစ်ယောက်တည်းတော့မနေခဲ့ရဲ။သို့နှင့် ကရောကပါးပြေးလိုက်လာရစဥ် အလေ့အကျင့််မရှိသောခြေထောက်က ခလုတ်တိုက်လဲလေသည်မို့...
``ရရဲ့လား´´
``ခြေထောက်နာတယ် ဟင့်!´´
``ပြေးလို့မရတော့ဘူးလား´´
``ပြေးလည်းလွတ်မှာမှမဟုတ်တော့တာ´´
ဟုတ်တယ်လေ၊ပြေးလည်းလွတ်ဖို့မလွယ်တာအသေအချာပါ။ခဏလေးရပ်မိသည်နှင့် ချစ်ရိပ်တို့အနားဝန်းရံလာပြန်သည်က ထိုအဖွဲ့။ဒုက္ခရေ!ချစ်ရိပ်တော့ ဒီနိုင်ငံမှာတင် ဘဝတုံးတော့မယ်ထင်ပါရဲ့။
``လာ!ခဏလေးအားတင်းထား´´
အို!...မပြေးနိုင်တော့ဘူးဆိုလည်း ဇွတ်တွေပြေးခိုင်းနေပါရောလား။တကယ်ဆို ချစ်ရိပ်ကသူနဲ့ဘာမှမသက်ဆိုင်တဲ့ လမ်းသွားလမ်းလာပါလေ။ဒါကိုဘယ့်နှယ်ကြောင့် သူနဲ့အတူထွက်ပြေးနေရသတုန်း။အဓိပ္ပာယ်မဲ့လိုက်တာ။တကယ်ကို စေတနာအမှားပါလား။အဲ့ဒါကြောင့်ရှေးလူကြီးတွေပြောကြတာ...လက်နှစ်ချောင်းမကယ်ကောင်း...အဲလေ!ခြေနှစ်ချောင်းမကယ်ကောင်းတဲ့!
``ဟေ့လူ၊ရှင်ဘယ်အထိအပြေးနေမှာတုန်း´´
``စကားမများနဲ့
ဟိုးရှေ့လမ်းဆုံရောက်ရင် မင်းညာဘက်ကိုပြေး၊ကိုယ့်နောက်မလိုက်နဲ့တော့...ကိုယ်သူတို့ကိုမြှားခေါ်မယ်၊မင်းကလုံခြုံတဲ့တစ်နေရာကိုရှာပြီး ပုန်း...သူတို့မတွေ့လောက်တော့ဘူးဆိုမှ ရဲစခန်းကိုဆက်သွား...ဒီမှာ ပိုက်ဆံ´´
ခြေထောက်ထော့နဲ့နဲ့ဖြစ်နေပေမယ့် မနားတမ်းပြေးရင်း ပါးစပ်ကလည်းချစ်ရိပ်ဘေးကင်းဖို့တဖွဖွမှာသည်။ပိုက်ဆံမရှိဘူးဆိုတာလည်းမမေ့မလျော့မှတ်ထားပြီး ငွေစက္ကူအခေါက်လေးကိုသူ့အိတ်ကပ်ထဲမှထုတ်ကာ ချစ်ရိပ်လက်ဖဝါးထဲထည့်ပေး၏။ကြည့်စမ်း!ဒီလိုအခြေအနေမှာတောင် သူများအတွက်စဥ်းစားပေးတတ်သေးသည့်ဒီလူက လူဆိုးတော့မဖြစ်တန်ရာ။ဒီလိုဆိုတော့ ဟိုအဖွဲ့ကသာလူရမ်းကားတွေဖြစ်မှာ။
``.....´´
ချစ်ရိပ်တွေးရင်း ပြေးနေရင်းကပဲသူပြောသည့်လမ်းဆုံသို့ရောက်လာ၏။ထိုစဥ်သူကချစ်ရိပ်ဘက်သို့တစ်ချက်လှည့်ကြည့်လာကာ တွဲထားသည့်လက်ကိုလွှတ်လိုက်ပြီး...
``ကိုယ့်ကိုကူညီလို့ကျေးဇူးပါပဲ
နောက်မှထပ်တွေ့မယ်၊အန္တရာယ်ကင်းပါစေ´´
ထိုစကားအသံဆုံး၌ သူကသွားတော့ဟူသောအမူအရာကိုမျက်လုံးဖြင့်ပြသည်မို့ ချစ်ရိပ်လည်းသူနဲ့ဆန့်ကျင်ဘက်လမ်းသို့အားကုန်ပြေးထွက်ခဲ့၏။သို့သော်ခြေထောက်တွေနာလှ၍သိပ်လည်းဝေးဝေးမရောက်ပါ။ဟိုအဖွဲ့ကလည်းအုပ်စုခွဲကာ စောစောကလူနောက်ပြေးလိုက်သူကလိုက်ပြီးချစ်ရိပ်ဘက်ပါလာသူကလည်းရှိသေးရဲ့။
``ငါ့နောက်မလိုက်ပါနဲ့
ငါနဲ့ဘာဆိုင်လို့လဲ´´
အော်ရင်းပြေးရင်း မျက်လုံးတွေကလည်းဝင်ပုန်းလို့ရမယ့်နေရာရှာနေစဥ်ခဏမှာတော့...
``အ! အား!´´
နောက်တစ်ခါချော်လဲကျသည့်အချိန်မှာ ချစ်ရိပ်ဘယ်လိုမှဆက်မပြေးနိုင်တော့ပေ။လိုက်လာသူတွေကလည်းချစ်ရိပ်ကိုမီသွားပြီမို့အနားမှာဝိုင်းလာကာ လက်တွေကိုနောက်ပြန်ဖိချုပ်ထားလေ၏။
``ရှင်တို့လွှတ်နော်´´
``....´´
``ကျမနဲ့ဘာဆိုင်လို့လဲ
ကျမသူနဲ့မသိဘူး၊ရှင်တို့ကိုလည်းမသိဘူး´´
ဘာအော်အော်လည်းအသုံးဝင်မည်မထင်ပါ။ချစ်ရိပ်စကားကိုသူတို့မှနားမလည်တာ။သေပြီ၊ချစ်ရိပ်ရေ!နင်တော့ အရှုပ်ထုပ်သံသရာထဲမျောပြီ။
``လွှတ်ပါ!
အားး!ကယ်ကြပါဦး´´
``ဟင်!´´
ပြေးနေရင်းပင် အဝေးမှအော်လိုက်သံသဲ့သဲ့ကြောင့် သူ့ခြေလှမ်းတို့တန့်ခနဲရပ်သွားရပါသည်။ဒါ...စောစောကကလေးမလေးရဲ့အော်သံမဟုတ်လား။ဧကန္တသူမ,လွတ်အောင်မပြေးနိုင်ခဲ့တာလား။
``ကျစ်!´´
အနောက်သို့ပြန်လှည့်ကြည့်ရင်း စိုးရိမ်သွားသည့်စိတ်ကြောင့်သူမဆီသွားဖို့ရွယ်မိလိုက်သေးသည်။သို့သော်လည်း အနောက်မှာလိုက်လာသူတွေကရှိသေးရဲ့မဟုတ်လား။ထို့ကြောင့် သူ့မှာနောက်ကြောင်းပြန်လှည့်ပြေးလို့ကမရ။မျက်လုံးကိုစုံမှိတ်ချ၍သာ ရှေ့ဆက်ပြေးခဲ့ရပြီး စိတ်ထဲအသေအချာတိုင်တည်ခဲ့သည်ကတော့...
``စိတ်ချ!ကိုယ်မင်းကိုပြန်လာရှာမှာ
ကိုယ့်ကိုစောင့်ပါ...ချစ်ရိပ်´´
~~~~~ 🍭🍭🍭🍭 ~~~~~
``ကျွန်တော်တို့ပြန်ရောက်ပါပြီ boss!´´
အခန်းတံခါးကိုဖွင့်ဝင်လိုက်သည်နှင့် ဆိုဖာထက်ခြေချိတ်လျက်ထိုင်နေသော သူ့ထံဦးညွှတ်ဖြေကြားလာပုံကတရိုတသေ။သူလှမ်းကြည့်လိုက်တော့ အဖွဲ့ထဲကတစ်ယောက်ရဲ့ပုခုံးထက်၌ပါလာသည်က ဖြူသွယ်သွယ်ခန္ဓာကိုယ်လေးတစ်ခုမို့ သူမျက်မှောင်ကျုံ့မိရပြီး...
``ဘာလဲ´´
မေးလိုက်လေမှ ပခုံးပေါ်ထမ်းလာသောထိုအရာလေးအား ကြမ်းပေါ်ပစ်ချလိုက်လေ၏။သူ့ခြေထောက်အနားသို့ဒလိမ့်ခေါက်ကွေးကျလာစဥ် အသေအချာငုံ့ကြည့်လိုက်တော့ ခေါ်လာသည်ကချာတိတ်ပေါက်စလေးတစ်ယောက်။ပြီးတော့ မျက်လုံးတွေမှိတ်ကာ သတိလစ်နေပုံရသည့်အနေအထားနှင့်...။
``စောစောကထွက်ပြေးတဲ့တစ်ယောက်နဲ့contactရှိနေတဲ့သူပါ boss´´
``ဒီချာတိတ်ကလား´´
``ဟုတ်ပါတယ်
သူတို့အတူထွက်ပြေးရင်း ဒီတစ်ယောက်ကိုပဲဖမ်းမိခဲ့တာပါ၊တစ်ယောက်ကိုလွတ်သွားပါတယ်´´
``ဘာပဲဖြစ်ဖြစ်သူ့ကိုမေးလည်းအကြောင်းစုံကိုသိရမှာပါ´´
``ဘာလို့ဒီလိုဖြစ်နေတာလဲ´´
``ကျွန်တော်တို့ဘာမှမလုပ်ပါဘူး
ဖမ်းရုံပဲဖမ်းလာတာပါ၊သူ့ဘာသာလမ်းမှာအော်ဟစ်ရင်းသတိလစ်သွားတာ၊ပြီးတော့ သူအော်နေတဲ့စကားတွေကိုလည်းကျွန်တော်တို့နားမလည်ပါဘူး´´
``ဘယ်လို!´´
``ဟိုကောင်နဲ့တော့သူတို့အချင်းချင်းစကားပြောလို့ရပါတယ်၊သူ့စကားကိုဟိုကောင်ကပြန်ပြောတတ်ပုံပဲ´´
``ရပြီ၊မင်းတို့သွားတော့´´
သွားခိုင်းလိုက်မှပဲအနားမှလူတွေထွက်သွားကြလေ၏။အခန်းထဲမှာတော့ သူ့ရဲ့ဘယ်ညာလက်ရုံးနှစ်ယောက်ကကျန်နေခဲ့ဆဲမို့ သတိမေ့နေသည့် ထိုချာတိတ်အားစူးစမ်းသလိုလာကြည့်ကြပြီးမှ...
``ငယ်ငယ်လေးပဲရှိသေးတယ်
ဘယ်လိုလုပ်အဲ့အဖွဲ့ထဲရောက်နေပါလိမ့်´´
``မေးကြည့်လေ
နှိုးလိုက်!´´
``ဟုတ်ကဲ့ boss!´´
သူ့စကားဆုံးသည်နှင့် davidကခပ်မြန်မြန်သွားကာ စားပွဲပေါ်ကရေဖန်ခွက်ကိုလှမ်းယူလာပြီးနောက်...
``ဖျန်း!´´
``အင့်! ဟင်း!´´
မျက်နှာသေးသေးလေးထံဦးတည်ပြီး ရေတွေဖျန်းခနဲပတ်လိုက်လျှင် ခန္ဓာကိုယ်လေးဆတ်ခနဲတုန်သွား၏။သို့သော်မျက်လုံးတွေကတော့ပွင့်မလာသေးဘဲ ကြမ်းပြင်ပေါ်လူးလိမ့်နေလေရဲ့။အံမယ်!ဒါက သူ့အိမ်သူ့ရာရောက်နေတယ်များထင်နေသလားပဲ။
သူမလူးလိမ့်နေသည်က သူ့ခြေရင်းကကြမ်းပြင်းပေါ်မှာမို့ အပေါ်စီးမှမြင်နေရသည့်ပုံရိပ်ထံအသေအချာငုံ့ကြည့်နေမိ၏။ရေတွေစိုရွှဲသွားသည့်မျက်နှာလေးက အတော်လေးတော့နုနယ်ကြည်စင်နေကာ ကလေးပေါက်စနီတာရဲလေးနှင့်တူသည်။နှုတ်ခမ်းဖူးဖူးလုံးလုံးလေးနဲ့နှာတံလုံးလုံးလေးက ဘယ်လိုပုံစံလေးမှန်းကိုမသိ။ရေစိုသွားသည့်ဆံပင်တွေကတော့ စိုကပ်ကပ်နဲ့ကြမ်းပေါ်ပုံလျက်သား။
အဝတ်အစားကလည်းပုံမှန်ဝတ်စားမှုလေးပဲဖြစ်ကာ ဂျင်းဘောင်းဘီအတိုလေးဝတ်ထားသည်မို့ သွယ်လျဖြူဝင်းသောပေါင်တံ၊ခြေတံတွေကပေါ်လွင်လို့နေ၏။ဒါကိုတော့ သူလည်းဆက်ကြည့်ဖို့မသင့်ဘူးဟုယူဆကာမျက်နှာလွှဲပစ်လိုက်ပြီး...
``နောက်တစ်ခွက်ထပ်လောင်းလိုက်´´
``ဟင်!´´
မူးနောက်နေသည့်အာရုံနှင့်အတူ မပွင့်တပွင့်မျက်ဝန်းတို့ကိုအားယူဖွင့်လိုက်စဥ် တည်ငြိမ်ပြီးသြဇာအပြည့်ရှိသောအသံတစ်ခုကနားထဲတိုးဝင်လာ၏။ဘာပြောလိုက်တယ်မသိပေမယ့် အသံလေးကချိုကြည်သြရှပြီး တည်ငြိမ်လေးနက်လိုက်တာ။အသံလေးကြားရတာတောင် ရင်ထဲအေးသွားသလိုပဲ။အဲ့ဒါနတ်သားလေးရဲ့အသံများလား?ချစ်ရိပ်က နတ်ပြည်ကိုတက်ပြေးမိတာလား...အဟိ!
``ကြည့်ရတာနိုးလာသလိုပဲ boss
မျက်နှာကကျိတ်ပြုံးနေတယ်´´
``အဟင်း!မနိုးသေးပါဘူး
ကလေးကအိပ်မက်မက်နေလို့ထင်တယ်
နောက်တစ်ခွက်လောင်းလိုက်´´
``ဟင်´´
ဒီတစ်ကြိမ်တော့ချစ်ရိပ်မျက်နှာလေးမဲ့သွားရပါသည်။အလန့်တကြားအတွေးနဲ့အတူ ဟိုဟိုဒီဒီမျောလွင့်ချင်နေသောစိတ်တွေလည်း ယခုမှလက်ရှိအသိဆီပြန်ရောက်သည်။ထိုနှင့်တစ်ပြိုင်နက် ကိုယ်ပေါ်မှာလည်းရေတွေစိုရွှဲနေသည့်အေးစက်စက်အထိအတွေ့ကိုခံစားလိုက်ရသည်မို့ လူကဆတ်ခနဲရုန်းထမိလျှင် မျက်စိရှေ့မြင်လိုက်ရတာက ခံ့ညားတည်ကြည်သောအသွင်နှင့် လူကြီးတစ်ယောက်...။
သူက ချစ်ရိပ်နဲ့အနီးကပ်ဆုံးရှိသောခုံပေါ်၌ခြေချိတ်လျက်ထိုင်နေပြီး စူးရဲတောက်ပသောအကြည့်နက်နက်ဖြင့်စိုက်ကြည့်နေလေ၏။စကားတစ်ခွန်းမှထပ်မဆိုသေးသော်လည်း ညှို့ဓာတ်ပြင်းလွန်းသည့် သူ့အကြည့်ကြောင့် ချစ်ရိပ်အသက်ရှုနှုန်းတွေမြန်လာကာ နှလုံးသားတစ်ခုလုံးလည်းလေထဲလွင့်ခါနေသလိုပင်။
``ခင်..ခင်ဗျားကဘာလဲ
လူ..လူ...လူဆိုးဂိုဏ်းခေါင်း..ခေါင်းဆောင်လား´´
တုန်ယင်နေသည့်နှုတ်ခမ်းပါးလေးအား ကြိုးစားဖွင့်ဟ၍မေးခွန်းထုတ်မိသော်လည်း သူကပြန်မဖြေပါ။ခပ်တည်တည်သာကြည့်နေရင်း နေရာမှထရပ်လိုက်ပြီးချစ်ရိပ်အနား၌လာရပ်ပြန်သည်။ပြီးတော့စိုက်ကြည့်နေသည့်မျက်ဝန်းတွေကလည်း တစ်ချက်လေးမှမလွှဲဖယ်ခဲ့ပေ။
``ခင်ဗျားနော်! လူ...လူကိုဘာလုပ်မလို့လဲ?´´
သြော်!မေးနေလည်းမထူးဘူးပဲ၊သူတို့ကချစ်ရိပ်စကားကိုနားမလည်မှန်းချစ်ရိပ်မေ့သွားတယ်။ဒါလည်းကောင်းတာပါပဲ။သူ့လက်ထဲမှာသေရမယ်ဆိုရင်တောင် အနည်းဆုံးတော့ကိုယ့်စိတ်ထဲရှိရာပြောသွားနိုင်တယ်လေ။
သည်လိုနဲ့ပဲ ထိုလူချောကြီးရှေ့ထိုင်နေရင်းမှ ချစ်ရိပ် မျက်နှာလေးကိုပင့်ချီထားလိုက်ပြီး...
``အရူး! အင်အားရှိတယ်ဆိုတိုင်းဘဝင်မြင့်မနေနဲ့သိလား´´
``အဟင်း!!´´
``ဘာမှနားမလည်ဘဲရယ်မနေနဲ့
ချစ်ရိပ်ရှင့်ကို ချီးကျူးနေတာမဟုတ်ဘူးနော်၊ဆဲနေတာ´´
သိသားပါပဲ။ကိုယ်ကသူ့စကားကိုနားမလည်ဘူးအမှတ်နဲ့ ပြောချင်ရာတွေပြောပြီး ဇွတ်တွေပွဲကြမ်းနေတဲ့ကလေးမကို ခိုက်ကတော့ရယ်ချင်လွန်းလို့သေတော့မယ်။တစ်သက်နဲ့တစ်ကိုယ် တစ်ခါမှနှစ်နှစ်ကာကာအော်ဟစ်မရယ်ဖူးလေတော့ စိတ်ထဲဘယ်လိုပင်သဘောကျနေပါစေ နှုတ်ခမ်းဖျားထက်မှာတော့အပြုံးကခပ်ဖွဖွသာတင်လေရဲ့။တကယ်တော့ သူ့စိတ်ထဲမှာတော်တော်လေးအသည်းယားပြီးရယ်ချင်နေမိတာပါ။နှုတ်ခမ်းတထော်ထော်နဲ့မျက်စိရှေ့ကကလေးမရဲ့ပုံစံလေးက သတ္တိတွေအပြည့်နဲ့လေ...။ဖမ်းလာတဲ့သူကိုတောင် ပြန်ပြီးဆူဆဲရဲသေးသတဲ့!ကဲ...ဘုရားစူး!တရားခံလေးပါပဲ။
``လူဆိုးကောင်ကြီး!ခင်ဗျားကအားနည်းတဲ့သူအပေါ်အင်အားသုံးပြီးအနိုင်ကျင့်တတ်မှတော့ လူဆိုးအကြီးစားပဲဖြစ်ရမယ်၊မှန်မှန်ပြော...ခင်ဗျားက ဂိုဏ်းစတားလား?ဒါမှမဟုတ်မာဖီးယား??
``အဟင်း!တစ်ခုမှမဟုတ်ဘူး
ကိုယ်ကမင်းလိုချာတိတ်ပေါက်စသေးသေးလေးကို တစ်ခါတည်းဝါးစားပစ်နိုင်တဲ့ Monster!´´
``ဟင်!´´
ဒီတစ်ခါတော့ ထိုလူကြီးကချစ်ရိပ်ရှေ့၌ဒူးတစ်ဖက်ထောက်အနေအထားဖြင့်ထိုင်လိုက်ပြီး သန်မာလှသည့်လက်ချောင်းတို့ဖြင့် ချစ်ရိပ်ရဲ့မျက်နှာသေးသေးလေးအားမေးဖျားမှပင့်ကိုင်ကာပြောလာစဥ် ချစ်ရိပ်မျက်လုံးကြီးပြူး၍ကြောင်အနှုတ်ဆိတ်သွားရပြီး ကြမ်းပေါ်ထောက်ထားသည့်လက်လေးပါပျော့ခွေသွား၏။လူကယိုင်ခနဲဖြင့် ရင်ဘတ်တစ်ခုလုံးဆီသို့အပြင်စားဒိုင်းနမိုက်ကြီးတစ်ခုလာပေါက်ကွဲလိုက်သလို အုန်းခနဲ၊ဒိုင်းခနဲ။
ပီပြင်စွာပြန်ပြောလိုက်သည့်စကားသံကို ချစ်ရိပ်သေသေချာချာကြားလိုက်ရတာလေ။
``ဒီလူကြီးကမြန်...မြန်မာစကားနားလည်တယ်လား...မြတ်စွာဘုရား!!´´
``ဟာ!ချာတိတ်´´
ဟိုဘက်အဖွဲ့နဲ့ပတ်သက်ပြီးဘာမှတောင်မမေးရသေးပါ။သူ့နှုတ်ကစကားသံထွက်လိုက်သည်နှင့် ရန်စွာနေသည့်အသံလေးတိခနဲတိတ်ကျသွားကာ နီညိုရောင်မျက်ဝန်းလေး၌ ထိတ်လန့်သလို၊ကြောက်သွားသလိုအရိပ်အယောင်လေးတွေယှက်သန်းလာပြီးနောက် လူကိုယ်သေးသေးလေးက သူ့ရင်ခွင်ထဲယိုင်ခနဲလဲကျလာသည်မို့အလျင်အမြန်ဖမ်းထိန်းပေးလိုက်ရ၏။
အဟင်း!ကိုယ့်ကိုပြောချင်ရာတွေပြောပြီး အခုမှကြောက်လို့တော့မရဘူးလေ ချာတိတ်ရယ်...။
ထားတော့!မင်းနဲ့ကိုယ် ပြီးမှထပ်တွေ့မယ်။
``Dawn!သူ့ကိုမြေအောက်ခန်းမှာပိတ်ထားလိုက်´´
``ဟုတ်ကဲ့´´
~~~~~ 🍭🍭🍭🍭 ~~~~~
အခန်း >>> ၄ဆက်ပါမည်။
ချစ်သည်းတို့အတွက်တစ်ခဏတာသောစိတ်အပန်းဖြေမှုလေးတွေသာရရှိစေရန်ရည်ရွယ်ရေးသားသော...
WineSatt Cho(🍋Lëmoñ🍋)