"စာစောင်တွေ" ဟုဒါက်တာ့ဆီမှအသံထွက်ပေါ်လာသည်။ Sam ကသူမဖတ်လက်စနှစ်ဆယ့်သုံးရာစု sperm whale သီချင်းစာသားတွေကိုဖတ်နေရာမှမော့ကြည့်လာသည်။

"ဘာစာစောင်လဲ" သူမမေးလိုက်သည်။ သူမအတွေးထဲဝင်လာသည်က ဝေလငါးတွေကိုကယ်တင်ပါ ဆိုသည့်စာစောင်ဖြစ်သည်။ သို့သော် ဒေါက်တာအနေဖြင့်ဆိုလျှင်တော့ ဘွန်တဆောရပ်ဒိုင်နိုဆောကြီးတွေကိုကယ်တင်ပါ ဒါမှမဟုတ် ကမ္ဘာပေါ်မှာပင်မမြင်နိုင်သည့် ကျွန်းငယ်လေးများရှိ မထင်မရှားအရာများဟူသည့်ခေါင်းစဉ်များဖြင့် ပင်ထွက်လာပေလိမ့်မည်။

"အရင်ထုတ်ခဲ့တဲ့စာစောင်အဟောင်းလေ" ဂရုမစိုက်သည့်ဟန်ဖြင့်ဒေါက်တာက ထိုင်နေရာမှမော့မကြည့်ပဲပြောလာသည်။

 "Strand ဆိုတဲ့ဟာလေ စာမျက်နှာသုံးဆယ့်ငါးကနေ လေးဆယ့်ခုနစ်အတွင်း အတိအကျပြောရရင် စာမျက်နှာလေးဆယ့်နှစ်မှာ အဖုံးမှာထည့်မယ့်ပုံကို စာစောင်တစ်ထောင်လောက်မှားရိုက်မိလိုက်သေးတယ်လေ"

ဒေါက်တာက သူ့အကြိုက်ဆုံးခုံဖြစ်ဟန်တူသည့်ခုံပေါ်တွင် သက်တောင့်သက်သာနားနေသည်။ ခုံ၏အောက်ခြေက ဆုံလည်ဖြစ်ပြီး ကျောမှီသည့်နေရာတွင်မူ ဖောင်းကြွများကိုထုဆစ်ထားသည်။ ထိုဖောင်းကြွများကပြေပြစ်ခန့်ညားပြီး 1990 ခုနှစ်များ၏ ရုံးခန်းအပြင်အဆင်နှင့်ပို၍သင့်တော်သည်။

သို့သော်ပစ္စည်းများ၏စနစ်တကျဖွဲ့စည်း တည်ဆောက်ထားသောအသွင်သဏ္ဌာန်ကမတူညီကွဲပြားသောရာစုနှစ်တစ်ခုကို ရောက်သွားသလိုမျိုးခံစားရစေသည်။

ထိုင်သူ၏ဦးခါင်းနောက်ဖက်နေရာတွင် ရွှေသစ်ရွက်သဏ္ဌာန်သရဖူကိုဖောင်းကြွထုထားသည်။ 

ထိုထိုင်ခုံသည် လွန်ခဲ့သည့် နှစ်ပေါင်းလေးထောင်ကျော်ကကမ္ဘာလောကကြီးကိုအုပ်စိုးခဲ့သည့်ဘုရင်မစံမြန်းခဲ့သည့် ပလ္လင်ဖြစ်ကြောင်းကိုတော့ ဒေါက်တာကအမြဲပြောလေ့ရှိသည်။ 

Sam ထိုနှစ်ပေါင်းလေးထောင်ကျော်ခုံအကြောင်း ဘာမှမသိပေမယ့် သေချာတာတော့ဒီခုံလည်းအတုဖြစ်နိုင်သည်။ ဘာလို့ဆိုဒေါက်တာရဲ့ဥစ္စာပစ္စည်းတွေဟာ အတုတွေပါဟုဒေါက်တာကိုယ်တိုင်ဝန်ခံသည်ထက် သူမကိုယ်တိုင်အဖြေရှာဖော်ထုတ်နိုင်သောကြောင့်ဖြစ်သည်။ သူမပို၍ရှာဖွေလေ ဒေါက်တာ့အသုံးအဆောင်တွေသည် အတုဖြစ်မှန်းပို၍ပေါ်လွင်လာလေဖြစ်သည်။

ဥပမာ ဒေါက်တာဝတ်ဆင်လေ့ရှိသည့် ဆယ့်ကိုးရာစုထဲက ပြုလုပ်ထားသည်ဆိုသောကုတ်အင်္ကျီ အောက်ခံရှပ်အင်္ကျီနဲ့ ဘောင်းဘီ ထိုအရာတွေကို1892ခုနှစ် Savile Row ကနေ ဝယ်ထားတာပါဟုဒေါက်တာကပြောသည်။

သို့သော်ထိုအရာများကအစစ်အမှန်မဟုတ်မှန်းသူမသိလာပြန်သည်။ အဘယ်ကြောင့်ဆိုသော် ထိုကုတ်အင်္ကျီပေါ်မှ တံဆိပ်ကိုသူမအသေအချာမြင်ဖူးသည်။ "Party Funtime" ဟုရိုက်နှိပ်ထားပြီး San Francisco, California နဲ့ USA ရှိဆန်းပြားသောဝတ်စုံများရောင်းသည့်ဆိုင်၏ အမှတ်တံဆိပ်ပင်ဖြစ်သည်မှာ လွဲမှားဖွယ်ရာမရှိ။ ထို့ကြောင့်ဒေါက်တာဘယ်လိုပင်ပြောပြောသူမအတွက်ယုံကြည်ဖွယ်ရာစိုးစဉ်းမျှမရှိ…ဒေါက်တာ့၏အသုံးအဆောင်အားလုံး အတုဟုသာမှတ်ယူလိုက်သည်။

အချိန်ကားနှစ်ဆယ်ရာစုနှောင်းပိုင်းဖြစ်သည်။

"ရှင်ဘာလို့စာစောင်အဟောင်းကိုပြန်ရှာနေတာလဲ?" ဒေါက်တာ့ဆီမှထွေထွေထူးထူးသဘောမျိုးဖြင့်မေးလာခြင်းမဟုတ်ပေမယ့်သူမပြန်မေးမိသည်။

ဒေါက်တာကပြန်မဖြေ။ ပုံစံကြည့်ရသည်မှာသူပြောနေသည့် အကြောင်းအရာကိုမေ့သွား၍ဆက်မပြောတော့ခြင်း သို့မဟုတ် သူမနှင့်စကားပြောနေသည်ဆိုတာကိုမေ့သွားသည့်ပုံပေါ်သည်။ 

သူမသူ့ကိုတစ်ချက်ကြည့်လိုက်သည်။ သို့သော် သူမ၏ခန့်မှန်းချက်မှားနေပြန်ပြီဆိုတာကိုသိလိုက်ရသည်။

အဘယ်ကြောင့်ဆိုသော် ဒေါက်တာက Strand စာစောင် နှင့်ပတ်သက်၍မေးလာခြင်းဖြစ်သဖြင့် ထိုစာစောင်ကိုပြန်ဖတ်၍ အမှတ်ရခြင်းဖြစ်မည်ဟုသူမ ထင်မိသောကြောင့်ဖြစ်သည်။ 

တကယ်တမ်းသူဖတ်နေသည့်စာအုပ်သည် Strand မဟုတ် အကယ်၍ထိုစာစောင်ကိုဖတ်နေခြင်းဖြစ်ပါက အဘယ်ကြောင့် ယခင်ပုံနှိပ်မှားခဲ့သည့်ကိစ္စကိုပြန်ဖော်သည်ဆိုခြင်းကိုသူမအပြည့်အဝနားလည်နိုင်ပေလိမ့်မည်။ ယခုတော့ထိုသိုမဟုတ်။

ဒေါက်တာဖတ်နေသည်ကကွန်ပျူတာမှစာအုပ်တစ်အုပ်သာဖြစ်သည်။ သောက်လက်စလက်ဖက်ရည်ခွက်ကိုသစ်သားစားပွဲခုံ ပေါ်တွင်တင်ထားပြီး ခွက်၏နံဘေးဘက်တွင်တော့ ပုံဆောင်ခဲသဏ္ဌာန် နာရီချိန်စက်ရှိနေသည်။ ထိုအရာက ရေနွေးငွေ့သုံးရထားမှထွက်သောအသံမျိုးဖြင့် ထူးဆန်းစွာ ထထမြည်တတ်သည်။တခါတလေတွင်တစ်ကြိမ်သာမြည်၍ တခါတလေတော့နှစ်ကြိမ်မျှ မြည်တတ်သည်။ ထိုသို့မြည်လျှင် နာရီသံတချက်ချက်ကဲ့သို့သော အသံများပါနောက်ခံအဖြစ် ကြားရတတ်သည်။

ထို့နောက်သူမ ဒေါက်တာ့ထိုင်ခုံနားရှိကြမ်းပြင်တစ်ဝိုက်တွင် စာစောင်ကိုတွေ့လိုတွေ့ငြားလိုက်ရှာသည်။ သို့သော် ကြမ်းပြင်သည် ပလတ်စတစ်စများ စာရွက်များ လျှပ်စစ်ပစ္စည်းများ လက်ဖက်ရည်ခွက် အဟောင်းများနှင့်သာရှုပ်ပွနေသည်။

ခဏအကြာကြိုးစား၍ရှာဖွေအပြီးမှာတော့ထိုစာစောင်ကိုသူမတွေ့သွားသည်။ ဒေါက်တာ့ခြေထောက်၏အောက်ခြေနားတွင် ပြုတ်ကျနေခြင်းဖြစ်သည်။ သူမထိုနားသို့သွားပြီး စာစောင်ကို ကောက်ယူလိုက်သည်။

ထူးခြားပြီးလက်ရာမြောက်သည့်နဂါးငွေ့တန်းကြယ်အစုအဝေးဖြစ်ဟန်တူသောပုံကိုစာစောင်ထက်တွင်တွေ့ရသည်။ ထိုပုံပေါ်တွင်သေးငယ်၍သပ်ရပ်သော စာလုံးများရေးထိုးထားသည်။ 'စကြာဝဠာကြယ်အစုအဝေးပေါင်းချုပ် YG 7008-7088' ဟူ၍ဖြစ်သည်။ 

YG 7008-7088? 

ဒါကဘယ်လို dating system မျိုးလဲ။

ပြီးတော့ဒါကဘယ်ဂြိုဟ်ပါလိမ့်…ဟုသူမတွေးလိုက်မိသည်။

နောက်တွင်တော့ ထိုအရာကအချိန်ခရီးသွားခြင်းနှင့်အာကာသဟင်းလင်းပြင်တို့ တည်ရှိရာစကြာဝဠာဖြစ်မှန်းသူမသတိရသွားသည်။

စကြာဝဠာတစ်ခုလုံးတွင်မတူညီကွဲပြားသောနေရာများစွာရှိသည်။ ထိုကွဲပြားသောနေရာတစ်ခုချင်းစီတွင်လည်း ထူးခြားဆန်းပြားမှုများစွာဖြင့်ပြည့်နှက်နေကျသည်။ သူမကိုယ်တိုင်လည်းနေရာအမျိုးမျိုးမှမတူညီကွဲပြားမှုများစွာမြင်တွေ့ဖူးသည်။ ဘယ်လိုနေရာမျိုးပင်ဖြစ်စေ အမြဲတစေမတူညီမှုကတစ်ခုပြီးတစ်ခုထွက်ပေါ်လာသည်။

လူသားတွေအနေဖြင့်နှစ်တစ်ရာ ဒါမှမဟုတ် နှစ်တစ်ထောင်အသက်ရှည်ရှည်နေထိုင်ရမည်ဆိုဦးတော့ ထိုကွဲပြားမှုတစ်ခုချင်းစီကရှာဖွေ၍ကုန်နိုင်မည်မဟုတ်ပေ။

ထိုအချိန်တွင် "Angelus" ဟုဒေါက်တာကပြောလာသည်။

Sam ကစကားပြောနေသည့်တစ်ချိန်လုံးတွင် သူ့ကိုကြည့်နေပေမယ့်  ဒေါက်တာကမူ စာဖတ်နေရာမှလုံးဝမော့မကြည့်။ စာအုပ်ထဲတွင်သာ အပြည့်အဝအာရုံစိုက်ထားဟန်ရှိသည်။

ထို့ကြောင့် ဒေါက်တာပြောသည့်ထိုစကားလုံးကို ကစားပွဲတစ်ခုအဖြစ်ကစားသည်ဟုသာ သူမထင်မြင်မိသည်။ ဒါပေမယ့်သူမဒီကစားနည်းကို ကျင့်သားရနေပြီဖြစ်သည်။ ဒီလိုကစားနည်းမျိုးစလျှင် ပထမဆုံးအနေနဲ့မင်းလုပ်ရမှာက သူမေးသည့်မေးခွန်း၏အဖြေကို မင်းမသိဘူးဆိုတာ ထုတ်ဖော်ပြသခြင်းမပြုရန်ဖြစ်သည်။ မင်းမသိဘူးဆိုလျှင်တောင်သိတာဖြေရမည်။ ဒါသူမတဖြည်းဖြည်းနှင့်နားလည်လာသည့်ထိုကစားပွဲ၏စည်းမျဉ်းဖြစ်သည်။ ထို့ကြောင့်သူမကြိုးစား၍ဖြေကြည့်လိုက်သည်။

"အဲ့ဒီစကားလုံးကလက်တင်ဘာသာစကားအရဆို အိန်ဂျယ်လို့ အဓိပ္ပာယ်ရတယ် ဟုတ်တယ်မလား?"

သူမစိတ်ထဲရှိရာပြောလိုက်ပေမယ့်…ဒေါက်တာပြောခဲ့သည့်စကားလုံးသည်သူညွှန်းဆိုခဲ့သည်စာစောင်ထဲက ဆောင်းပါးတစ်ပုဒ်၏ခေါင်းစဉ်လည်းဖြစ်နိုင်သည်။ ဒါမှမဟုတ် တခြားအရာတွေလည်းဖြစ်နိုင်သည်။ သူမ၏အဖြေမှန်သည်ဟုတပ်အပ်မပြောနိုင်ပေ။

ထို့နောက်ဒေါက်တာ့ဆီမှဝေဖန်သံတစ်စွန်းတစ်စထွက်လာသည်။

"'မင်းကချောလွန်းလို့ကောင်းကင်ဘုံကနတ်သမီးလေးတစ်ပါးနတ်သက်ကြွေဆင်းလာသလိုပဲတဲ့ ' ဟား…ဒီ Gregory ကတော့တကယ့်ငကြောင်ကောင်ပဲ။ ဒါနဲ့မင်းသိလား Augustine က ကောင်မလေးတွေရဲ့စကတ်ထဲက ဘယ်အရာမဆိုအကုန်ကြိုက်တယ်တဲ့။ ဒီလူတော်တော် ငတ်ကြီးကျတာပဲကွာ…"

ဒေါက်တာ့စကားကိုကြားပြီးနောက် Sam ကသူမ၏တွန့်ကြေနေတဲ့ဂျင်းဘောင်းဘီကိုငုံ့ကြည့်လိုက်သည်။ "ဒါဆို ကျွန်မကတော့စိတ်ချလက်ချနေလို့ရတယ်"

"သေချာပေါက်မဖြစ်နိုင်ဘူး"

နောက်ဆုံးတော့ဒေါက်တာကစာဖတ်နေရာမှမော့ကြည့်လာသည်။ သူ့မျက်လုံးတွေကသူမလက်ထဲတွင်ကိုင်ထားသော သီချင်းစာသားများရေးထားသည့်စာအုပ်ဆီသို့စူးစိုက်ကြည့်နေသည်။ ထို့နောက်ထပ်မံ၍ဝေဖန်သံထွက်ပေါ်လာပြန်သည်။

"အဲ့သီချင်းက အဲ့လောက်လည်းမကောင်းပါဘူး"

Sam ကသွားများပေါ်အောင်ဖြီးလိုက်သည်။ ဒီလိုကိစ္စမျိုးကတော့ သူမအေးအေးဆေးဆေးဖြေရှင်းနိုင်သည်။ ဥပမာဒေါက်တာနဲ့ငြင်းခုန်ခြင်းမျိုးပေါ့။ ထို့နောက်ဒေါက်တာ့၏စကားကိုပြန်လည်ချေပရန် သူမဂရုတစိုက်ဖြင့်ထိုသီချင်းစာသားတို့ကိုတီးလုံးအထားအသိုမှန်အောင်ဆိုညည်းပြလိုက်သည်။

"တွေ့လား…ဒီသီချင်းကကောင်းပါတယ်"

သီချင်းကမည်မျှကောင်းသည်တော့မသိ သူမသီချင်းသံအဆုံးတွင်ဒေါက်တာ့၏သက်ပြင်းချသံကိုကြားလိုက်ရသည်။ ပြီးမှသူမ၏အဆိုကိုလက်ခံသည့်သဘောဖြင့် ခေါင်းညိတ်ပြလိုက်သည်။

"ဟုတ်ပါပြီ…Venerable Bode မှာအယ်ဒီတာနဲ့ပတ်သက်ပြီးပြဿနာတစ်ခုခုရှိနေပုံပဲ… ငါအချိန်ရရင် Oscar ဆီကိုပြန်ဆက်သွယ်ပြီး အဲ့ဒီအကြောင်းနည်းနည်းပါးပါး တီးခေါက်ကြည့်ဦးမယ်…သူကလူတိုင်းနဲ့ခင်တော့ သတင်းအချက်အလက်ပိုများများ နှိုက်ထုတ်လို့ရတယ်လေ"

‘ပြန်ဆက်သွယ်ရမယ်။

Strand က1890 ခုနှစ်တွေမှာ နာမည်အကြီးဆုံးစာစောင်တစ်ခုပဲ…ဒါဆိုဖြစ်နိုင်တာ Oscar က…ဟုတ်တယ်…အဲ့ဒီလူဖြစ်ရမယ်။’

"အနည်းဆုံးတော့အဲ့ဒီလူဝတ်ပုံစားပုံကရှင့်ထက်ပိုကြည့်ကောင်းတယ်" Sam ကပြောသည်။

"ဘယ်သူလဲ?"

သူမ၏အစမရှိမဆုံးမရှိစကားတို့ကဒေါက်တာ့ကိုအမှန်တကယ်ပင်ခေါင်းရှုပ်သွားစေပုံရသည်။ ဒေါက်တာ့ပုံစံက Sam ပြောသည့် 'အဲ့ဒီလူ' ဆိုသောလူကိုအသည်းအသန်စဉ်းစားနေဟန်ပေါ်သည်။ ထို့ကြောင့် Sam က သူမ၏စကားကိုပြည့်စုံအောင်ဖြည့်စွက် ပြောဆိုလိုက်သည်။

"Oscar Wilde လေ သူကရှင့်လိုမျိုးဒီလိုဝတ်စုံအဆန်းကြီးတွေ သေတောင်ဝတ်မှာမဟုတ်ဘူး"

ဒေါက်တာကသူ့အဝတ်အစားတွေကိုပြန်ငုံ့ကြည့်၍မျက်မှောင်ကျုတ်နေသည်။ သူ့စိတ်ထဲဘာတွေတွေးနေသည်ကိုတော့ Sam ကိုယ်တိုင်လည်းမခန့်မှန်းနိုင်သလိုမည်သူမျှခန့်မှန်းနိုင်မည်ဟုလည်းမထင်။

"အိုး…ဟုတ်သား…မင်းပြောမှငါ Bede ကိုတောင်သတိရသွားတယ်…ထားပါတော့လေ အခုလောလောဆယ်တော့ငါတို့တွေ January လအရောင်းပွဲတော်ကိုတစ်ခေါက်လောက်သွားလည်ရင်ဘယ်လိုလဲ?"

Sam ကစိတ်မဝင်စားဟန်နှင့်ပုခုံးတွန့်လိုက်သည်။

ဒေါက်တာ့၏မဆီမဆိုင်စကားလမ်းကြောင်းလွှဲနိုင်ပုံတွေကိုတော့သူမအမြဲတမ်းလက်မြောက်အရှုံးပေးရသည်ချည်း။

"ဘယ်နှခုနှစ်ရဲ့ January လဲ?"

ထို့နောက်မေးခွန်းမပြည့်စုံသေးဟန်ဖြင့်သူမ၏စကားကိုထပ်မံဖြည့်စွက်လိုက်သည်။

"ပြီးတော့ဘယ်ဂြိုဟ်လဲ?"

ဒေါက်တာကမတ်တပ်ရပ်၍တည်နေရာလွှဲပြောင်းခြင်းခလုတ်ခုံဆီသို့ဦးတည်ကာလျှောက်သွားသည်။ ထို့နောက်သူမဘက်သို့သမင်လည်ပြန်ကြည့်၍ ပြုံးပြလိုက်သည်။

"မင်းမှန်းကြည့်လေ"

ရုတ်တရက်သူမ၏ဘေးပတ်ဝန်းကျင်တွင်အရာအားလုံးတိတ်ဆိတ်လာသည်။ စိုထိုင်းပြီးအေးစက်တဲ့လေက တဖြူးဖြူးတိုက်ခတ်နေသည်။ ထို့ကြောင့် သူမအနည်းငယ်ချမ်းသလိုပင်ခံစားလိုက်ရသည်။

သူမရှေ့တွင်တော့အခန်းတွင်းသုံးပရိဘောဂများအစားရှည်လျားပြီးရွှေဝါရောင်သမ်းနေတဲ့ကျူပင်တွေကအစားထိုးဝင်ရောက်လာသည်။ ရွံ့ရေတွေကသူမရဲ့ဖိနပ်ထဲဝင်ကာခြေထောက်တွေကို ချော်ကျိကျိဖြစ်စေသည်။ ပြီးတော့ထိုရေတွေက အလွန်အေးသည်။ အေးလွန်း၍ သူမခန္ဓာကိုယ်ပင် တုန်ယင်လာသည်ကိုခံစားမိသည်။

‘မကောင်းတဲ့လူ…တစ်ပတ်ရိုက်ပြန်ပြီ။ ကြည့်နေ တစ်နေ့နေ့ကျရင်ရှင့်ကိုပြန်ပြီးလုပ်ပြမယ်…အဲ့ဒါကကျွန်မနောက်ဆုံးလုပ်ရမယ့်အလုပ်ဆိုရင်တောင်ကျွန်မလုပ်မှာပဲ။’ ဟုသူမကြိမ်းဝါးမိသည်။

အဘယ်ကြောင့်ဆိုသော် ဒေါက်တာသည်မထွက်ခွာခင်က January လအရောင်းပွဲတော်သို့သွားမည်ဟုပြောခဲ့သည်။ သို့သော် ခုသူမတို့ရောက်ရှိနေသည့်နေရာသည် ကျူပင်များပတ်လည်ဝိုင်းနေသည့် ရွှံ့မြေတစ်ခုပေါ်တွင်ဖြစ်နေသည်။ 

"ကျွန်မတို့နေရာမှားပြီးရောက်လာတာ ဟုတ်တယ်မလား"

"မှန်တယ်"

"ဒါဆိုကျွန်မတို့အခုဘယ်ရောက်နေတာလဲ?"

"မဟုတ်ဘူး…ငါပြောတာက ငါတို့ရောက်နေတဲ့နေရာကမှန်တယ်။ သေချာပါတယ် ဒီနေရာကလန်ဒန်မြို့ပါ။ ပြီးတော့ဒီနေ့က 2108 ခုနှစ် January လရဲ့ပထမဆုံး ဆောင်းရာသီအရောင်းပွဲတော် ဖွင့်တဲ့ရက်ပဲ။ ငါဒီနေရာကိုဟိုးလွန်ခဲ့တဲ့နှစ်ပေါင်းများစွာတုန်းက အတောင်ပံတွေဝယ်ဖို့တောင်လာခဲ့သေးတယ်"

"ဒေါက်တာ ကျွန်မတို့အခုရွှံ့ညွန်ကြီးပေါ်မှာရပ်နေမိတာပဲ"

"သေချာပါတယ်…ငါဒီကိုရောက်ဖူးတယ်…ဒါပေမယ့်-"

 Sam ၏စကားကိုကြားပြီးသည့်နောက် သူပြောလက်စစကားတွေပင်ပြတ်တောက်သွားပြီး သူ့ဖိနပ်သူမယုံကြည်နိုင်စွာငုံ့ကြည့်လိုက်သည်။

ဖိနပ်တွေကရွှံံ့မြေတွေထဲသို့တဖြည်းဖြည်းနစ်ဝင်စပြုနေပြီဖြစ်သည်။ ထို့နောက်အံ့သြမှုနှင့်စိတ်ပျက်မှုတို့ကိုတပြိုင်တည်း သူ့မျက်နှာပေါ်တွင်တွေ့လိုက်ရသည်။

"အိုး…ကုန်ပါပြီ…ဒီဖိနပ်တွေက Grace ငါ့ကိုလက်ဆောင်ပေးထားတာ မဖြစ်ဘူး Harrods မှာဖိနပ်တစ်ရံနှစ်ရံတော့ထပ်ပြီးဝင်ယူရမယ် ပြီးရင်ဒီဖိနပ်တွေကို အဏုမြူမှုန်လေးတွေကအစသေချာပြန်ဆေးကြောရမယ်"

Sam ကဒေါက်တာ့၏ အဖြစ်သည်းနေပုံကိုကြည့်ပြီးသည့်နောက် သူမရဲ့ပတ္တူဖိနပ်တွေကိုငုံ့ကြည့်လိုက်သည်။ ဒီဖိနပ်တွေက ရွှံ့ညွန်တွေထဲမှာပင်သူမခြေထောက်တွေကို သိပ်မညစ်ပတ်စေရန်အကာအကွယ်ပေးသည်။

သို့ပေမယ့် ရာသီဥတုကချမ်းလွန်းသောကြောင့် သူမတစ်ကိုယ်လုံးခိုက်ခိုက်တုန်နေသည်။

ဒီကိုမလာခင်ကဒေါက်တာသည် January လအရောင်းပွဲတော်ဟုပြောခဲ့၍ သူမကုတ်အင်္ကျီနှင့်ခေါင်းစွတ် ဆွယ်တာသာဝတ်ခဲ့သည်။ အဘယ်ကြောင့်ဆိုသော် January လအရောင်းပွဲတော်သည်ဆောင်းရာသီတွင်သာကျင်းပခြင်းဖြစ်သောကြောင့်ဖြစ်သည်။ ယခုတော့သူမပုံစံက ရွံ့ညွန်တွေထဲမှာ ဈေးဝယ်ထွက်သည့်ဝတ်စုံတွေနှင့် လေ့ကျင့်ရေးဆင်းသည့် ပုံစံပေါက်နေသည်။ 

သူမခြေလှမ်းတွေကို TARDIS ဆီသို့ပြန်လှမ်းရန် ကြံစည်လိုက်သည်။ ခြေတစ်လှမ်းလှမ်းလိုက်တိုင်း ရွံ့ပွက်သံတွေကိုအတိုင်းသားကြားနေရသည်။

ထိုအချိန်တွင်ဒေါက်တာကလှည့်၍သူမလက်ကိုလှမ်းဆွဲသည်။

"တစ်ခုခုတော့လွဲနေပြီ Sam"

Sam ကမျက်ခုံးတစ်ဖက်ကိုပင့်၍ဒေါက်တာ့ကိုကြည့်လိုက်သည်။

ထို့နောက်လေပူတစ်ချက်မှုတ်ထုတ်၍

'ခါတိုင်းလည်းတစ်ခုခုကတော့လွဲနေကျပါပဲ…ဘာထူးလို့လဲ' ဟုတွေးမိသည်။

ထိုကဲ့သို့လွဲမှားခြင်းသည် သူမအတွက်အထူးအဆန်းမဟုတ်တော့။ သာမန်ဖြစ်ရိုးဖြစ်စဉ်တစ်ခုလိုဖြစ်နေပြီ။ သို့ပေမယ့်ဒီတခေါက်လည်း ခါတိုင်းတွက်နေကျကဲ့သို့ပင် ဖြစ်နိုင်ချေရာခိုင်နှုန်းတွေကိုတွက်ကြည့်မိသည်။

ဒေါက်တာက TARDIS ကိုတလွဲညွှန်မိခြင်းသည် လုံးဝမဖြစ်နိုင်သည့်အရာ…ထို့ကြောင့်ဖြစ်နိုင်ခြေကတစ် ရာခိုင်နှုန်းသာရှိသည်။ စစ်ပွဲဇုန်အတွင်းမှားယွင်းစွာ ဆင်းသက်မိခြင်းက ငါးဆယ်ရာခိုင်နှုန်းရှိနိုင်သည်။ ရာနှုန်းပြည့်ဖြစ်နိုင်သည်ကဒေါက်တာသည်စကြာဝဠာကြီးတစ်ခုလုံးကိုကမောက်ကမဖြစ်အောင်ဖျက်ဆီးမိလိုက်ခြင်းဖြစ်မည်။

သူမဒေါက်တာ့၏စိမ်းပြာရောင်မျက်လုံးတွေကိုစိုက်ကြည့်ပြီး သူ့မျက်နှာပေါ်မှစိုးရိမ်ရဖွယ်အခြေအနေကိုတွေးဆကြည့်လိုက်သည်။ သိပ်တော့မများ Jones Richter Scales အရဆိုလျှင်တော့ နှစ်ဒသမငါးလောက်သာရှိနိုင်သည်။ 

ဘာမှစိတ်ပူစရာမလိုဘူးထင်တာပဲ…?

"အထဲကိုပြန်ဝင်လာခဲ့!" ဒေါက်တာကအမိန့်ပေးသည်။

"ကျွန်မကအထဲရောက်နေပြီးသားလေ…ရှင်သာအပြင်ရောက်နေတာ"

ဟု Sam ကရိုးရှင်းစွာပြန်ပြောသည်။

ဒေါက်တာကသူ့ခြေထောက်တွေကိုရွှံ့ညွန်ထဲမှခက်ခက်ခဲခဲဆွဲထုတ်လိုက်သည်။ သို့သော်ခြေထောက်သာတွေပါလာပြီး ဖိနပ်ကတော့ရွှံ့ထဲတွင်နစ်၍ကျန်နေခဲ့သည်။ ထို့ကြောင့် သူဒူးထောက်၍ဖိနပ်ကိုကောက်ယူရန်ကြိုးစားလိုက်သည်။

ထိုအချိန်တွင် Sam ကသူမနားထဲတွင်တဝီဝီမြည်သံ တွေကိုကြားလိုက်ရသည်။ ထိုအသံများက လွန်းပျံယာဉ်တစ်စင်း၏စက်သံနှင့်ဆင်တူသည်။

 ဒေါက်တာကတော့သူ့ဖိနပ်ကိုရွံ့ထဲမှပြန်ကောက်ရန် အသည်းအသန်ကြိုးစားနေစဲဖြစ်သည်။ သူမကမူထိုအသံ၏လားရာကိုသိချင်၍ အပြင်သို့ကြည့်ရန် ခန္ဓာကိုယ်ကိုမတ်လိုက်သည်။ထိုအချိန်တွင်ဒေါက်တာကလည်းမော့ကြည့်လာသည်။

"မြင်းတွေ?" ဒေါက်တာကအံ့အားသင့်စွာပြောသည်။

"ဘယ်လိုပဲကြည့်ကြည့် Tractites နဲ့ပိုတူတယ်"

ထို့နောက်တွင်သူမတ်တပ်ရပ်လိုက်ပြီး မြူခိုးများဖြင့်ဝေဝါးနေသော ပတ်ဝန်းကျင်ဘက်သို့လှည့်ကာအော်ပြောလိုက်သည်။

"ဟယ်လို……ကျေးဇူးပြုပြီးငါတို့ကိုကူညီပေးနိုင်မလား? ငါတို့လွန်းပျံယာဉ်စနစ်တစ်ခုခုယိုယွင်းပြီး ဂြိုဟ်မှားဆင်းလာတယ်ထင်တယ်"

တဝီဝီမြည်သံတွေကတဖြည်းဖြည်းနှင့်ပို၍နီးကပ်လာသလိုခံစားရသည်။ Sam ကသတိကြီးစွာထား၍ရှေ့သို့ထွက်လိုက်သည်။ သူမနားထဲတွင် ကျူပင်ပေါ်သို့ဖြတ်၍ ပျံသန်းလာသည့်အသံတွေကို ရှင်းလင်းစွာကြားနေရသည်။ ထို့နောက်သူမတို့ရှိရာနေရာနားသို့ ချဉ်းကပ်လာသည့်ပုံရိပ်တွေကို ရှင်းလင်းပြတ်သားစွာမြင်တွေ့လိုက်ရသည်။

ထိုအရာများက…။