Tractites များ၏စာကြည့်တိုက်သည် ဖန်လုံအိမ်တစ်ခုဖြစ်နေသည်။ အစကစာကြည့်တိုက်ဆိုသောကြောင့် စာအုပ်များရှိနိုင်သည်ဟုထင်ကာ အားတက်သရောလိုက်လာခဲ့ခြင်းဖြစ်သည်။ ယခုတော့သူမမျက်စိရှေ့တွင်ရှိနေသည်က အပင်ပေါင်းစုံနှင့်ပြွတ်သိပ်နေသောဖန်လုံအိမ်တစ်ခုသာဖြစ်သည်။

ထို့ကြောင့် Sam ကအထူးအဆန်းငေးမောကြည့်ရှုမိသည်။ ဖန်လုံအိမ်တွင်း၌လေထုကစိုစွတ်ပြီးနွေးထွေးသည်။ ရေမွှေးရနံ့ ဟင်းခတ်အမွှေးအကြိုင်နံ့နှင့် လတ်ဆတ်သောပန်းရနံ့တို့ကလည်း လေထုအတွင်းသင်းပျံ့နေသည်။

အပင်များဖြင့်ပြည့်နှက်နေသောကြောင့် သူမတို့ရောက်နေသည့်နေရာသည်မှန်ကန်ပါရဲ့လားဟုသံသယပင်ဝင်မိသည်အထိ။ သို့သော် ဒေါက်တာနှင့် Kitig ကစကားတွေဖောင်ဖွဲ့ကာပြောနေရင်း ကျောက်တုံးလမ်းအတိုင်းလျှောက်နေကျသည်။

ဒေါက်တာကစာကြည့်တိုက်သို့သွားမည်ဟုပြောခဲ့သည်ကိုသူမမှတ်မိသည်။ ထို့နောက် Tractites များ၏သမိုင်းကြောင်းနှင့် ယခုကဲ့သို့ကွဲထွက်နေရသည့်အကြောင်းအရင်းကိုသိနိုင်ရန်အတွက် ဘယ်လိုစာအုပ်တွေကိုရှာဖွေ၍ဖတ်ရမည်ဟူသည့်အကြောင်းကိုလည်း ဆွေးနွေးခဲ့သေးသည်။

အရှေ့ဘက်တွင်အတွင်းဆောင်ခန်းမတွေဘာတွေများရှိကောင်းရှိနိုင်မလားဟုသိရန်အတွက်သူမမျက်လုံးတွေကိုအားစိုက်၍ကြည့်လိုက်သည်။ သို့သော်သူမမြင်နေရသည့်အရာအားလုံးက အပင်များသာဖြစ်သည်။ အချို့အပင်များကို ကြီးမားသောအရောင်တောက်တောက်တရုတ်ပန်းအိုးများထဲတွင်စိုက်ပျိုးထားပြီး အချို့ကတော့မြေကြီးပေါ်တွင်စိုက်ပျိုးထားကျသည်။ 

ထိုနေရာတွင်လုံးဝကိုကြီးမားနေပြီဖြစ်သောအပင်ကြီးအမျိုးအစားများသည် ဖန်လုံအိမ်၏အမိုးခုံးကိုထိမိသည့်တိုင်အောင်ကြီးထွားနေကျပြီ ဖြစ်သည်။ အမိုးခုံးမှနေ၍ အနည်းငယ်နွေးသောရေတို့ကိုပက်ဖြန်းနေပြီး သစ်ရွက်များကိုရေစက်တို့ဖြင့်အလှဆင်ကျသည်။ ပန်းများကနေရာတိုင်းတွင်ရှိနေပြီးအရောင်အသွေးမှာလည်းစုံလင်လှသည်။ ပန်းဖွားများကမူ Sam ၏ခေါင်းအရွယ်အစားလောက်ပင်ကြီးမားလှသည်။ ထို့နောက်တွင်တော့အစိမ်းရောင်တလက်လက်တောကနေသည့်အရာကသူမ၏အမြင်အာရုံကိုဖမ်းစားသွားပြီး မျက်စိတစ်မှိတ်အတွင်းမှာပင်ထိုအရာကသူမ၏လက်ဖဝါးပမာဏခန့်ကြီးမားသောလိပ်ပြာတစ်ကောင်အဖြစ်သို့ပြောင်းလဲသွားသည်။ 

အဆောက်အဦးအတွင်းသို့ပို၍ဝင်ရောက်လာသောအခါ နောက်ဆုံးတွင်တော့ Sam တွေ့ချင်နေသောစာအုပ်များကိုတွေ့ရှိသွားပြီဖြစ်သည်။ သို့သော်စာအုပ်များကစင်ဖြင့်အသေအချာသပ်သပ်ရပ်ရပ်စီထားခြင်းမျိုးမဟုတ်ပဲ ဟိုတစ်စု သည်တစ်စုပြန့်ကျဲနေသည်။ အချို့ကအလှစိုက်သစ်ပင် ချုံပင်များအောက်တွင်ရောက်နေကျပြီး အချို့ကလူသွားလမ်းပေါ်တွင်ပြန့်ကျဲနေသည်။ 

ထူးဆန်းစွာဖြင့်ပင်စာအုပ်အများစုသည် ကလေးရောင်စုံခြယ်စာအုပ်ကဲ့သို့ ပြားချပ်ကာကြီးမားနေခြင်းဖြစ်သည်။ ပို၍ထူးဆန်းသည်ကသစ်ရွက်ပုံသဏ္ဌာန်ရှိသောစာအုပ်များပင်။

Tractites များကမူစားပွဲသို့မဟုတ်ထိုင်ခုံပေါ်တွင်ထိုင်၍ စာဖတ်သူကဖတ် စကားပြောသူကပြောနှင့် တချို့ကမူ green tea ဟုထင်ရသောအရည်များကိုထိုင်သောက်နေကျသည်။

"လာဗန်ဒါလို့မင်းပြောလိုက်တာလား" ဟု ဒေါက်တာက Kitig ကိုပြောလိုက်သည်။

"အင်း…ဟုတ်တယ် ငါထင်တာမမှားဘူးဆိုရင် ကတိုးရနံ့နဲ့လာဗန်ဒါပဲ။"

ထို့နောက်သူတို့နှစ်ယောက်လေထဲရှိရနံ့ကိုအနံ့ခံ၍လှေကားတစ်ထစ်သို့ရုတ်တရက်တက်လိုက်သည်။ Sam ကသူတို့နောက်လိုက်သွားရန်စိတ်ကူးမိပေမယ့် နာနတ်ပင်၏အမြစ်အောက်တွင်ထွက်နေသောစာအုပ်တစ်အုပ်ကိုတွေ့လိုက်ရသည်။ သူမထိုစာအုပ်ကိုကောက်ယူလိုက်ပြီး လှန်လှောကြည့်ရှုရန်ကြိုးစားသော်လည်း စာရွက်များကကပ်နေပြီး စာအုပ်အနှောင့်များကဆွေးမြေ့နေကျပြီဖြစ်သည်။

Sam အခြားသူများနောက်အမှီပြေးလိုက်သွားလိုက်သည်။ ၎င်းတို့ကရေပန်းဘေးတွင်အပုံလိုက်ချထားသော စာအုပ်ပုံကိုရှူရှိုက်နေကြသည်။

"Kitig စာကြည့်တိုက်မှူးဘယ်မှာရှိလဲ" ဟုသူမမေးလိုက်သည်။

"ဟိုကအကျီၤအဖြူရောင်နဲ့လူ…တွေ့လား" ဟု Kitig ကသူမကိုကြည့်၍ပြန်ဖြေသည်။ 

ထို့နောက်လီလီပန်းများ ရေညှိများဖြင့်အလှဆင်ထားသော မြင့်မားသည့်ကျောက်တုံးစားပွဲပေါ်တွက်မတ်တပ်ရပ်နေသော Tractite တစ်ယောက်ကိုသွားတွေ့သည်။ ထိုသူကစာအုပ်နှစ်အုပ်ကိုတစ်ပြိုင်နက်တည်းဖတ်နေဟန်ရှိပြီး တစ်စုံတစ်ရာကိုအသည်းအသန်ရှာဖွေနေဟန်ဖြင့် စာရွက်များကိုအလောတကြီးလှန်နေသည်။ 

"စာကြည့်တိုက်မှူးကဘာလုပ်ဖို့လဲ? အဲ့ဒီစာအုပ်ကအမှတ်အသားလုပ်ထားတယ်မဟုတ်ဘူးလား" ဟု Kitig ကမေးလာသည်။

"အမှတ်အသား?"

Kitig က Sam ၏လက်ထဲမှစာအုပ်ကိုလှမ်းယူလိုက်ပြီး မှိုတက်နေသာနေရာများကိုလက်ဖြင့်ခါလိုက်သည်။ ထို့နောက် အသည်းပုံသဏ္ဌာန်အမှတ်အသားတစ်ခုက စာအုပ်အဖုံး၏ဘယ်ဘက်ထောင့်တွင်ပေါ်လာသည်။ 

"ဒါကဒီစာအုပ်ကအသုံးမလိုတော့ဘူးလို့ပြတာ…ငါတို့ကအဲ့ဒါကိုဒီတိုင်းမြေကြီးထဲထည့်လိုက်တယ်လေ-အဲ့ဒါကပိုပြီးမြန်ဆန်တယ်"

Sam ကဂြိုဟ်သားကိုပြုံးပြလိုက်ပြီးနောက် ဘေးပတ်ဝန်းကျင်သို့ဝေ့ဝိုက်၍ကြည့်လိုက်မိသည်။ ထိုအခါမှသာအပင်များအောက်တွင်ရှိနေသော စာအုပ်များကိုသတိထားမိတော့သည်။ သူမသစ်ရွက်ခြောက်များဟုထင်ခဲ့သောအရာများက အလေအလွင့်စာရွက်များဖြစ်နေသည်။ 

"ပြန်လည်အသုံးချခြင်း!"

သူမဒီ Tractites တွေအကြောင်းပို၍လေ့လာရလေ သူတို့၏မျိုးစိတ်ကိုပို၍သဘောကျလာလေဟု ခံစားလာရသည်။ သို့သော်တစ်စုံတစ်ခုကိုတွေးလိုက်မိပြီးနောက် သူမမျက်မှောင်ကျုတ်လိုက်မိပြန်သည်။ 

"တစ်ခုခုကိုသိမ်းထားချင်တယ်ဆိုနင်တို့ဘယ်လိုလုပ်လဲ? ဒီနေရာကခဏလေးနဲ့မှိုတက်လွယ်တယ်လေ…ဟုတ်တယ်မလား။ ပြန်ပြီးပုံနှိပ်တာလား?"

Kitig ကစာကြည့်တိုက်မှူးဘက်သို့ညွှန်ပြလိုက်ပြီး "ပုံမှန်ဆိုရင်တော့သူတို့ကကော်ပီအသစ်တွေကူးပေးတယ်။ ပြောင်းသင့်တာတွေလည်းပြောင်းပေးရင်းအသစ်ကူးပေးတာပေါ့။ ကော်ပီကူးဖို့အများကြီးလိုအပ်လာတဲ့အချိန်ကျမှပဲ ပုံနှိပ်တာကိုသုံးတယ်။ အဲ့ဒီစားပွဲအမြင့်ကြီးဘေးမှာ ပုံနှိပ်စက်ရှိတယ်။"

ထို့နောက်သူက ရေပန်းနံဘေးမှ သစ်ပင်အရှည်ကြီးများရှိသောနေရာဘက်သို့ညွှန်ပြသည်။ ပင်စည်များကြားမှ ကျောက်သားဖြင့်ပြုလုပ်ထားသောအရာများမှ မှုန်ဝါးဝါးအလင်းရောင်ကို Sam မြင်နေရသည်။ 

သို့သော် သူမစိတ်ထဲတွင်အနည်းငယ်တော့ရှုပ်ထွေးနေမိသည်။ Tractite များကထိုအရာကိုအသုံးပြုရလောက်အောင် အဆင့်မြင့်နေလွန်းသည်မဟုတ်ပါလော။ 'ဒါဆိုရင်သူတို့ရဲ့ကွန်ပျူတာစနစ်ကဘယ်မှာလဲ'

"နင်တို့သတင်းအချက်အလက်တွေကိုထာဝရသိမ်းဆည်းခြင်းမလုပ်ဘူးလား" ဟုသူမမေးလိုက်သည်။

"သတင်းအချက်အလက်တွေကဘယ်လိုလုပ်ထာဝရဖြစ်နိုင်မှာလဲ။" Kitig ကသူမ၏စကားကြောင့် အနည်းငယ်ရှုပ်ထွေးသွားဟန်ပေါ်သည်။ ထို့နောက်သူမျက်လုံးများကိုပိတ်လိုက်ပြီး မြင်းတစ်ကောင်ကဲ့သို့ ခေါင်းကိုလှုပ်ခါလိုက်သည်။

"သတင်းအချက်အလက်ဆိုတာကကမ္ဘာအကြောင်းသိဖို့ လူတွေလိုအပ်တဲ့အရာပဲ။ ဒါပေမယ့် ကမ္ဘာကြီးကလည်းအမြဲတမ်းပြောင်းလဲနေတာလေ…သတင်းအချက်အလက်တွေကလည်းအမြဲပြောင်းလဲနေမှာပဲ။ စာအုပ်တွေကိုလူတွေလိုအပ်သေးတဲ့အချိန်အထိပုံတူကူးတယ်။ မလိုအပ်တော့ဘူးဆိုရင်တော့ ဘယ်သူ့အတွက်မှအသုံးဝင်မှာမဟုတ်တော့ဘူးလေ။ သူတို့ကိုသိမ်းထားလို့ဘာအကျိုးရှိမှာလဲ။" 

"အော်…ထာဝရသိမ်းဆည်းခြင်းမဟုတ်ပဲရေရှည်ပေါ့…ရုပ်ဝတ္ထုရှိတဲ့ပစ္စည်းတွေလို။" ဟု Sam ကပြောလိုက်သည်။

ခဏအကြာတွင် Kitig ၏မျက်လုံးများအနည်းငယ်မကြည်မလင်ဖြစ်သွားသည်ကိုတွေ့လိုက်ရပြီး သူ၏လျှာများကပါးစပ်တွင်းမှနေ၍အပြင်သို့ပြူထွက်လာသည်။

"Honeysuckle ထင်တယ်။ ဒီကနေတောင်အနံ့ရနေတယ်။ နင်တို့မကြည့်ချင်ဘူးလား" ဟုသူကပြောသည်။

ထိုအချိန်တွင်ဒေါက်တာကစကားဝင်ဖြတ်၍ Sam ကိုပြောလိုက်သည်။ 

"သူတို့ရဲ့ရှေးပဝေသဏီကနည်းလမ်းပဲ… Tractites တွေကရုပ်ဝတ္ထုတွေထက် လူသားမျိုးနွယ်တွေကို မေ့ပျောက်သွားကျပြီလို့ ငါထင်ရတော့မယ်။"

သူကမြေပြင်ပေါ်တွင်လဲလျောင်းနေပြီး စိန်ပုံသဏ္ဌာန်ရှိသောစာအုပ်တစ်အုပ်ကို အနံ့ခံနေခြင်းဖြစ်သည်။ ထိုစာအုပ်၏ စာမျက်နှာများက ခရမ်းရောင်နှင့်အဝါဖျော့ဖျော့အရောင်တို့ဖြင့် စွန်းပေနေပြီး စာလုံးများကိုရေးသားထားခြင်းတစ်လုံးတစ်လေမှမတွေ့ရ။ မတွေ့သည့်အဆုံးတွင်တော့ ရောင်စုံကွက်များကိုစာလုံးဟုပင်သူမမှတ်ယူလိုက်ရသည်။

သို့မဟုတ်-ထိုအရာကအနံ့လည်းဖြစ်နိုင်သည်။

Sam စာကြည့်တိုက်မှူးဘက်လှည့်၍ အသေအချာစူးစမ်းမိသည်။ ထို့နောက်တွင်တော့သူ၏လျှာများကစာရွက်များကိုလှန်လှောနေပြီး အရသာခံနေသည်ကိုတွေ့လိုက်ရသည်…အရသာခံပြီးနောက်စာအုပ်အသစ်တစ်အုပ်ဘက်သို့ရွေ့လျားသွားသည်။ ဖြစ်တန်ရာရှိသည်မှာ သတင်းအချက်အလက်များကို ကူးယူနေခြင်းသာဖြစ်နိုင်သည်။

သို့သော်လုပ်ငန်းစဉ်ကအတော်လေးမြန်ဆန်လွန်းလှသည်ဟုကောက်ချက်ချနိုင်သည်။ တစ်မိနစ်အတွင်းမှာပင်ဆယ်ရွက်ခန့်ကိုကူးယူပြီးနေပြီဖြစ်သည်။ ထို့နောက်စာရွက်တစ်ရွက်လျှင် သတင်းအချက်အလက်မည်မျှပါနိုင်လောက်သည်ကို Sam တွေးတောမိသည်။

"အရောင်တွေကဘောင်တွေ ကန့်သတ်ချက်တွေကိုဖော်ပြထားတာ။ အရသာကအကြောင်းအရာတွေကိုသိရှိဖို့သုံးတယ်" ဟုဒေါက်တာကပြောလာသည်။ "ကြည့်ရတာတော့ သူတို့ဒီလိုဟာတွေလုပ်လာတာ လွန်ခဲ့တဲ့နှစ်နှစ်သန်းကျော်လောက်တည်းကဖြစ်မယ်" 

"တော်တော်လေးကိုကောင်းမွန်တဲ့ စနစ်တစ်ခုဖြစ်နေလို့နေမှာပေါ့" ဟု Sam ကထုံးစံအတိုင်းသူမ၏တုန်လှုပ်ခြောက်ခြားမှုကိုပြသရန် ငြင်းဆို၍ ဘာမှမဖြစ်သလိုဟန်ဆောင်နေပြန်သည်။

'နှစ်နှစ်သန်း? Tractites တွေကဒီနေရာမှာနေတာဘယ်လောက်ကြာပြီလဲ။ ဒီစကြာဝဠာကြီးထဲမှာလူသားတွေဘယ်တော့မှမတည်ရှိခဲ့ဘူးဆိုတဲ့ပုံစံဖြစ်နေပြီမဟုတ်ဘူးလား။'

ထို့နောက် Sam ကဒေါက်တာ့ကို Tractites များ၏ရှေးပဝေသဏီကအကြောင်းအရာများကို ပြောများပြောမလားဟူသည့်မျှော်လင့်ချက်ဖြင့်ကြည့်လိုက်သည်။ သို့သော် ဒေါက်တာကတော့စာအုပ်ကိုအနံ့ခံနေပြီး ဘာသာစကားများအကြောင်းပြောနေသည်။ 

"ဒါကဘောင်တွေစည်းတွေနဲ့ကန့်သတ်ထားတာတွေ ပေါင်းစပ်ပြီးရလာတဲ့စည်းမျဉ်းတွေ ဝါကျငယ်နှစ်ခုထက်ပိုပြီးထားလို့မရတဲ့ဝါကျအထားအသိုတွေေထက်တော့ပိုကောင်းတယ်- ဟယ်လို…ဒါကစိတ်ဝင်စားဖို့ကောင်းသား။ ဘယ်သူက Uncreator လဲ?"

"အချိန်၏အဆုံးသတ်ခြင်းကိုယူဆောင်လာသည့်ဒဏ္ဋာရီ။" ဟု Kitig ကပြောလိုက်သည်။ 

"Ah…hmm" ဟုဒေါက်တာကပြောလိုက်ပြီး Sam ဘက်သို့လှည့်၍ပြုံးပြလိုက်သည်။

"Sam ငါတို့ Narunil ပြောခဲ့တဲ့လက်ဖက်ရည်သွားသောက်ဖို့အချိန်ကျပြီလို့မထင်ဘူးလား"

'အင်း ဒါကပါးနပ်တဲ့စကားလွှဲပြောင်းခြင်းပညာရပ်လို့တော့မထင်မိဘူး'

ဘယ်လိုပင်ဖြစ်ဖြစ်ထိုစာအုပ်သည်ဒေါက်တာသိချင်သောအကြောင်းအရာများနှင့်တော့အနည်းငယ်ဆက်စပ်နေလိမ့်မည်။ ထိုစာအုပ်ကိုစိတ်ဝင်စားနေကြောင်း Kitig ကိုမသိစေလို၍သာ စကားလမ်းကြောင်းလွှဲလိုက်ခြင်းဖြစ်သည်။ ထိုစာအုပ်ထဲတွင် အတိတ်ကိုမည်ကဲ့သို့ပြောင်းလဲရမည်ဟူသည့်အကြောင်းအရာတစ်စွန်းတစ်စပါဝင်နိုင်သည်။ ပြီးတော့…ဒီစကြာဝဋ္ဌာကြီးကိုဖျက်ဆီးဖို့။

ရုတ်တရက် နွေးထွေးသောလေထုကပင် အေးစိမ့်လာသည်ဟု Sam ခံစားလိုက်ရပြန်သည်။ စာကြည့်တိုက်နှင့်စာအုပ်များတွင် နစ်မြုပ်သွားသော သူမ၏စိတ်ဝင်စားမှုတွေက ဒေါက်တာသည်အခွင့်အရေးရလျှင် ထိုစကြာဝဠာကြီးတစ်ခုလုံးကို ဖျက်ဆီးပစ်လိမ့်မည်ဟူသည့်အချက်ကို မေ့ပျောက်သွားစေခဲ့သည်။

'ဒါကသေတော့မှာကိုကြိုသိနေရသလိုပဲ။' ဟုသူမတွေးလိုက်မိသည်။ အချိန်တိုင်းမစဉ်းစားမိအောင်နေပေမယ့် ရုတ်တရက်သတိရသွားတဲ့အခါ နှလုံးသားကလက်မခံနိုင်လို့လှုပ်ခါလာတဲ့ခံစားချက်။ အားလုံးအပေါ်သေခြင်းတရားကလက်တစ်ကမ်းမှာကျရောက်နေပေမယ့် ဘာမှမလုပ်နိုင်တဲ့အင်အားမဲ့လူသားတစ်ယောက်…ကိုယ့်ကိုကိုယ်မစဉ်းစားနဲ့လို့အကြိမ်ကြိမ်ပြောနေခဲ့တာတောင်… ကိုယ်တစ်ယောက်တည်းသိနေတဲ့အကြောင်းမို့လို့မစဉ်းစားပဲမနေနိုင်တဲ့ပူပန်မှုမျိုး…ထိုခံစားချက်တွေက တကယ်ကို ခံရခက်လွန်းလှသည်။

"ငါတို့က Tractites တွေအကုန်လုံးကိုသတ်ပစ်တော့မှာ"

ထို့နောက်တွင်တော့ဒေါက်တာကသူမကိူစူးစမ်းစွာကြည့်နေသည်ကိုသတိထားမိလိုက်သည်။ ကြည့်ရသည်မှာ သူမ၏စိတ်ခံစားချက်များမျက်နှာတွင်ခေတ္တမျှထင်ဟပ်သွားပုံပေါ်သည်။

"ဘာမှမဖြစ်ပါဘူး…အိမ်ကိုလွမ်းမိလို့ပါ" ဟုသူမလျင်မြန်စွာကာကွယ်၍ပြောလိုက်သည်။

"မင်းက? အိမ်ကိုလွမ်းတယ်?" ဒေါက်တာကသူမ၏လက်မောင်းကိုဆွဲလိုက်ပြီး မျက်လုံးတွင်းသို့စိုက်ကြည့်နေသည်။ သူ၏မျက်လုံးများကလေးနက်တည်ကြည်နေပြီး သူမကိုစိတ်အေးအေးထားရန်အားပေးနေသယောင်ရှိသည်။ 

"Sam Sam Sam Sam အားလုံးအဆင်ပြေသွားမှာပါ။ ငါနည်းလမ်းရှာပါ့မယ်။" 

သူမနှုတ်ခမ်းကိုဖိကိုက်လိုက်ပြီးနောက်ခေါင်းညိတ်ပြလိုက်သည်။ 

Kitig ကသူမကိုသနားကြင်နာသည့်အကြည့်တွေဖြင့်ကြည့်နေသည်။

"စိတ်မပူပါနဲ့…မင်းအိမ်ပြန်လို့ရမှာပါ။ Afarnis မှာတော့ယာဉ်ပျံတွေမရှိပေမယ့် ငါတို့မှာယာဉ်ပျံတွေရှိပါသေးတယ်။ မင်းတို့ရဲ့ယာဉ်သာပြင်လို့မရဘူးဆိုရင် ငါတို့ဘက်ကနေယာဉ်ပျံတစ်စီးတော့ငှားပေးနိုင်မှာပါ" ဟုပြောသည်။