ဒေါက်တာက သူမ၏ SAVE THE WHALE စာတန်းကိုမြင်လျှင် အမြဲတမ်းသဘောတကျရယ်မောလေ့ရှိသည်။ တခါတလေကျရင်တော့ "မင်းထက်ငါပိုသိပါတယ်" ဆိုတဲ့အပြုံးမျိုးပြုံးပြီး စိတ်ဝင်စားဖို့ကောင်းတယ်ဟုပြောတတ်သည်။ Cliff ကတခါတလေဒေါက်တာနှင့်အတူတူပြုံးပြီးလျှင် သူလုပ်စရာရှိတဲ့အလုပ်တွေထဲက အရေးကြီးတာတွေကိုတင်ပြခြင်းပြုလုပ်တတ်သည်။ ပြီးတော့သူတို့နှစ်ယောက်စလုံးက သူမကိုဘယ်လက်ဖက်ရည်သောက်လို့ကောင်းတယ်ဆိုတာ ညွှန်ပြတတ်သေးသည်။
အခုတော့သူမမှာရွေးချယ်ခွင့်ရှိလာပြီလေ…သူမကိုယ်တိုင်အတွက်အပေါစားလက်ဖက်ရည်ကိုပဲဝယ်သောက်နေရသည်။ ဘယ်လိုပဲဖြစ်ဖြစ်ဒါကအမှန်တရားပဲ။
"ဘဝရဲ့ပုံပြင်လေးတစ်ပုဒ်ပေါ့" ဟုသူမတိုးတိတ်စွာပြောလိုက်သည်။ သို့သော်သူမပြုံးနေသည်။ ဒါသူမကိုယ်တိုင်ရွေးချယ်ခဲ့သည့် လွတ်လပ်သောနည်းလမ်းပင်ဖြစ်သည်။ အခုဆိုလျှင် မီးဖိုချောင်တွင်ထိုင်၍သူမအတွက်အပေါစားလက်ဖက်ရည်တစ်ခွက်ကိုအေးအေးဆေးဆေးလုပ်နေနိုင်ပြီဖြစ်သည်။
ရေနွေးကရားကဆူလာပြီဖြစ်သောကြောင့် ထူးဆန်းသောတြိဂံပုံသဏ္ဌာန်လက်ဖက်ရည်အိတ်ထဲသို့ လောင်းထည့်လိုက်သည်။ နွားနို့အနည်းငယ်ထည့်လိုက်ပြီးနောက် လက်ဖက်ရည်ဇွန်းဖြင့်ခလောက်လိုက်သည်။ ထို့နောက်သတိထား၍တစ်ကျိုက်လောက်မော့လိုက်သည်။
"အရမ်းပူလွန်းတယ်"
သယ်ရလွယ်ကူရန်အတွက်လက်ဖက်ရည်အနည်းငယ်ကိုဘေစင်ထဲသို့သွန်ချလိုက်သည်။ ထို့နောက်မတ်ခွက်ကိုကိုင်၍မီးဖိုချောင်တွင်းမှ ထွက်လာလိုက်သည်။ ကော်ရစ်ဒါသို့အရောက်တွင် အိမ်ရှေ့ခန်းမှဖုန်းမြည်သံကိုကြားလိုက်ရသောကြောင့်ထခုန်လိုက်မိသည်။ ထို့နောက် ဖုန်းထားရာဧည့်ခန်းသို့အပြေးသွားလိုက်သည်… သို့သော်ဧည့်ခန်းသို့မရောက်ခင်မှာပင်ဖုန်းမြည်သံကရပ်သွားပြီး ပြန်လည်ဖြေကြားပေးသောစက်မှ "လူကြီးမင်းခေါ်ဆိုသောတယ်လီဖုန်းမှာ ပြန်လည်ဖြေကြားခြင်းမရှိပါသဖြင့်" ဟူသည့်အသံထွက်ပေါ်လာသည်။
"တိတ်ဆိတ်သွားတာပဲ…မနက်တစ်နာရီတောင်ကျော်နေပြီလေ…ကျေးဇူးတင်လိုက်တာ" ထို့နောက်သူမခြေလှမ်းတွေကိုလှေကားဘက်သို့ဦးတည်လိုက်သည်။ သို့သော်ကံတရားကသူမဘက်တွင်ရှိဟန်မတူ…ပြန်လည်ဖြေကြားပေးသောစက်မှအသံရုတ်တရက်ရပ်တန့်သွားပြီး မိန်းမတစ်ဦး၏အသံထွက်ပေါ်လာသည်။
"Jo Jones ရှိလား" ဟုမေးမြန်းလိုက်သည့်မိန်းမတစ်ဦး၏အသံက အမေရိကန်သူတစ်ဦးဖြစ်မှန်းသိသာသည်။ သူမ၏အသံကတိုးညှင်းနေပြီးကြောက်ရွံ့နေသည့်စိတ်ခံစားမှုတစ်ပိုင်းတစ်စကို အသံမှတစ်ဆင့်ခံစားနေရသည်။
Jo နေရာမှာပင်ကြောင်အ၍ရပ်တန့်နေမိသည်။ တဖက်မှဖုန်းလိုင်းကလိုင်းမကောင်းသောကြောင့်ထင်သည်…တဂျီဂျီမြည်ပြီးနောက်မှအသံထပံမံထွက်ပေါ်လာသည်။
"ကျွန်မက Julie Sands ပါ။ Tanzania, Kilgai ကဖုန်းခေါ်နေတာပါ။ ကျွန်မတို့ရှင့်ရဲ့အကူအညီကို တကယ်လိုအပ်နေတယ်။ ကျွန်မရှင့်ဆီကို e-mail ပို့လိုက်ပေမယ့် ရှင်ရမရတော့ကျွန်မမသိဘူး- အိုး ဒါကတကယ်ဆိုးရွားလာပြီ။ ဒီ Captain Jacob Hynes ကတော့- ဘုရားရေ- ရှင်ကတော့ကျွန်မပြောတာယုံမှာမဟုတ်ဘူး Jo- သူနဲ့အတူဂြိုဟ်သားတစ်ကောင်ပါလာတယ်"
'ဘယ်လို'
"ဒီမှာ…ကျွန်မရှင့်ကိုဘယ်လိုပြောပြရမလဲမသိတော့ဘူး။ Rowenna…သူ…သူအထဲမှာရှိနေတယ်။ ဒါပေမယ့်ကျွန်မလည်းသူ့ဆီမသွားနိုင်ဘူး…ဒီအနီးအနားမှာရဲတွေလည်းမရှိဘူး… အိုး ဘုရားရေ-"
ထို့နောက်အသံကရပ်တန့်သွားသောကြောင့် Jo ဖုန်းထားရာနေရာဘက်သို့ပြန်လှည့်လာခဲ့သည်။
"သူတို့က Rowenna ကိုဆွဲထုတ်နေတာပဲ- သူမကိုသေနတ်နဲ့ပစ်လိုက်တာလား"
Jo သူမလက်ထဲကလက်ဖက်ရည်တွေပင်ဖိတ်ကျတော့မတတ် သူမ၏ကိုယ်ခန္ဓာကတုန်လှုပ်သွားခဲ့သည်။ ထို့နောက်ဖုန်းကိုဒေါက်မှီပေါ်မှလှမ်းယူ၍…
"အဲ့ဒီမှာဘာတွေဖြစ်နေတာလဲ" ဟုမေးလိုက်မိသည်။
သို့သော်ပြန်ဖြေကြားသံမကြားရပဲ တစ်ခုနှင့်တစ်ခုထိခိုက်မိသံတွေကိုသာကြားနေရသည်။ သေနတ်သံနှင့်တူသောအသံကိုလည်းသူမကြားလိုက်ရသေးသည်။
ထို့နောက် "-ဒီတစ်ယောက်လည်းရပြီ-" ဟူသည့် အသံကိုကြားလိုက်ရသည်။ ထိုအသံကလူတစ်ယောက်၏အသံနှင့်မတူညီပဲ စက်ယန္တရားမှထွက်ပေါ်လာသောအသံရှိသည့် ဂြိုဟ်သား၏စကားပြောသံနှင့်တူနေသည်။
"Jo!! ရှင်အဲ့ဒီမှာရှိတယ်မလား။ ကျွန်မတို့ရှင့်အကူအညီလိုအပ်နေတယ်!" ဟုရုန်းရင်းဆန်ခတ်ဖြင့်ကျယ်လောင်စွာအော်ဟစ်လိုက်သည့်အသံတွေကိုသူမနောက်ဆုံးကြားလိုက်ရသည်။ ခဏအကြာတွင်တော့ဖုန်းလိုင်းကျသွားသည့်အသံတွေ ထွက်ပေါ်လာသည်။
ထို့နောက်တွင်တော့ သူမ၏နှလုံးခုန်သံများမြန်လာသည်ကို ခံစားမိလိုက်သည်။ Cliff ကသူမတို့၏ မင်္ဂလာနှစ်ပတ်လည်နေ့အတွက်ဝယ်ပေးခဲ့သော မှတ်စုကိုလှမ်းယူပြီးနောက် စတင်၍သူမကြားခဲ့ရသမျှနှင့်အဖြစ်အပျက်တို့ကိုရေးခြစ်မိသည်။
Tanzania, Kilgai
မိန်းမနှစ်ယောက်…ပြီးတော့သေနတ်ပစ်သံတစ်ချက်
ဝြိုဟ်သား…စက်ယန္တရားအသံ? Dalek မဟုတ်လောက်ဘူး
UNIT ဆက်သွယ်ရေး-
ထို့နောက်သူမလုပ်ဆောင်ရမည့်လုပ်ငန်းစဉ်များကိုနံပတ်စဉ်ဖြင့်ချမေိသည်။ ထိုအရာများက
(၁) UNIT သို့ဆက်သွယ်ရန်
(၂) Matthew ကိုဒီအရှုပ်အရှင်းတွေနှင့်လွတ်အောင်ထားရန်
(၃)…
သူမအိပ်မက်ထဲမှဒေါက်တာ့၏စကားသံကိုပြန်လည်ကြားယောင်ပြီး ချရေးရန်အတွက်သူမတုန့်ဆိုင်းနေမိသည်။
"မင်းငါ့ကိုကူညီရမယ် Jo"
ဟုတ်ပြီ…ဒေါက်တာ ရှင်နိုင်ပါတယ်။
ထို့နောက်သူမ၏စာမှ "အရှုပ်အရှင်းတွေမှလွတ်အောင်ထားရန်" ဟူသည့်စာကြောင်းကိုမျဉ်းသားထားလိုက်သည်။ ဖုန်းကိုယူ၍ သူမနောက်ထပ်ထပ်မံ၍ဆက်သွယ်ဖြစ်တော့မည်မဟုတ်ဟုထင်ခဲ့သောနံပါတ်တစ်ခုကိုနှိပ်၍ ဆက်သွယ်မိလိုက်သည်။
Regimental Sergeant Major John Benton ကဖန်သားပြင်ကိုကြည့်၍မျက်မှောင်ကျုတ်နေသည်။
"အဲ့ဒီမှာတစ်ခုခုဖြစ်နေတာတော့သေချာတယ် Jo… ငါတို့တပ်ဖွဲ့တစ်ဖွဲ့ အခု Kilgai မှာရှိနေတယ်" ဟုသူကပြောသည်။
"ဘာလုပ်နေကျတာလဲ" ဟု Jo ကမေးလိုက်သည်။
"နင်သိပါတယ်…ငါနင့်ကိုပြောလို့မရဘူး" ဟုပြောပြီးနောက် Benton သက်ပြင်းချလိုက်မိသည်။
ထို့နောက်ဝီစကီနှင့်ဂျင်ထည့်ထားသောပုလင်းများထားသည့် သစ်သားတန်းဘက်သို့ငေးကြည့်လိုက်ပြီး Jo ကိုသောက်ဖို့ခေါ်ရန်သင့်မသင့်စဉ်းစားမိသည်။
"ငါ့ကိုနည်းနည်းလောက်ပြောပြစမ်းပါ။ အဲ့ဒီမှာဂြိုဟ်သားမျိုးစုတွေရော ပါဝင်ပတ်သက်နေလား?"
Benton ကခေါင်းခါလိုက်ပြီး "Jo နင်သိပါတယ်…ငါ့မှာလုပ်ပိုင်ခွင့်မရှိဘူး"
ထို့နောက်တွင်တော့ Benton မှန်းထားသည့်အတိုင်းပင် Jo ကထိုင်ခုံပေါ်မှထ၍စားပွဲတစ်ဝိုက်တွင်ခေါက်တုန့်ခေါက်ပြန်လျှောက်နေသည်။ "နင်မပြောင်းလဲသေးဘူးပဲ Jo…အမြဲတမ်းစည်းမျဉ်းတွေကိုဖောက်ဖို့ ရှေ့ဆုံးကရှိနေတယ်" ဟု Benton ကပြောသည်။
"Tanzania, Kilgai…ဖြစ်ရပ်အမျိုးအစား 'N'… အမျိုးအစား 'N' ကဘာကိုဆိုလိုချင်တာလဲ?" ဟု Jo ကမေးသည်။
"အဖြစ်အပျက်တွေကို "Yes" အတွက် 'Y' ဆိုပြီးခွဲခြားတယ်။ အဲ့ဒါကလူသားမျိုးနွယ်တွေရဲ့တည်ရှိမှုကိုအခြိမ်းအခြောက်ဖြစ်စေတဲ့အမျိုးအစားပဲ။ 'N' က "No" ပေါ့။ ဆိုလိုချင်တာကသာမန်ကိစ္စလေးတစ်ခုပါပဲလို့ပြောချင်တာ။"
သူ၏စကားကိုကြားပြီးနောက် Jo ကရယ်မောလိုက်သည်။
"နင်လည်းမပြောင်းလဲသေးပါဘူး။ Benton ငါ့ကိုအမှန်အတိုင်းပြောစမ်းပါ။ အဲ့ဒါတွေကဘာအဓိပ္ပာယ်လဲ"
Jo ၏စကားကြောင့် Benton မျက်နှာပူလာသည်ကိုပင်ခံစားမိသည်။ ခုနတုန်းကပင် သူမကိုလှည့်စားလိုက်နိုင်ပြီဟုတောင်သူတွေးနေခဲ့သေးတာ အခုတော့…။
"အဲ့ဒါကဘာအဓိပ္ပာယ်လည်းဆိုတာငါမသိဘူး။ သူတို့ကအမြဲတမ်းအမျိုးအစားတွေကိုပြောင်းပစ်နေကျတာ။ အဲ့ဒါတွေကိုအသေးစိတ်လိုက်ကြည့်နေဖို့ကငါ့တာဝန်မဟုတ်ဘူးလေ Jo" ဟုပြောလိုက်ပြီးနောက် သူ၏လက်ကိုဝှေ့ယမ်းလိုက်သည်။
"ဒါတွေအကုန်လုံးကဟန်ပြတွေချည်းပဲ။ နေ့တိုင်းအစီရင်ခံစာတွေရေးရတယ်။ paperclips တွေကိုအာရုံစိုက်ရတယ်။ အဖွဲ့ထဲကလူတွေအသတ်ခံရရင်သူတို့ရဲ့ ဇနီးတွေနဲ့ကလေးတွေဆီအကြောင်းပြန်ပေးရတယ်။ ဒါတွေပဲ…"
Jo ကခေတ္တမျှငြိမ်သက်သွားခဲ့သည်။ ထို့နောက် "နင်တကယ်အဲ့ဒါတွေကိုလုပ်ဖို့လိုအပ်လို့လား" ဟုမေးလိုက်မိသည်။
"လွန်ခဲ့တဲ့နှစ်ပတ်ကတင်ပဲနှစ်ခါလောက်ရှိတယ်။ Captain ကအပြင်မှာပဲရှိနေသေးတော့ သူကိုယ်တိုင်မလုပ်နိုင်ဘူး။"
"ဘယ်အပြင်လည်း"
"နင်သိပါတယ်…ငါပြောလို့-"
"အဲ့ဒီနေရာက Kilgai ဟုတ်တယ်မလား။ Captain ကဘယ်သူလဲ။ Jacob Hynes လား?"
"နင်ကအားလုံးနီးပါးသိပြီးနေပြီပဲ။"
"Julie ပို့တဲ့ e-mail က Jacob Hynes ကိုနာမည်တပ်ပြီးပြောထားတယ်။ ပြီးတော့ပြောထားသေးတယ် သူကသူမတို့ကိုအဲ့ဒီနေရာကနေထွက်သွားဖို့သတိပေးတယ်တဲ့။ ငါပြောမယ်…အဲ့ဒီတစ်ယောက် ငါ့ကိုဖုန်းဆက်တဲ့အချိန်မှာ သူ့အသံကအရမ်းကိုကြောက်ရွံ့နေတဲ့ပုံပဲ Benton…ပြီးတော့သူကြောက်နေတာတခြားလူမဟုတ်ဘူး။ UNIT အရာရှိ…Jacob Hynes နော်။ နင်ဒါတော့ဒီအတိုင်းပစ်ထားလို့မရဘူး"
"Jo နင်သိလား…ငါတို့ဌာနကိုတစ်နေ့တစ်နေ့ဂြိုဟ်သားနဲ့ပတ်သက်တဲ့စာတွေဘယ်လောက်ရောက်လာလည်းဆိုတာ…တနေ့ကိုနှစ်ရာအထက်ကျော်တယ်။ နင့်ရဲ့သူငယ်ချင်းက Captain Hynes ကို gorge မှာတွေ့မယ်ဆိုတာငါယုံကြည်တယ်။ ပြီးတော့ သူတို့ထူးဆန်းတာတစ်ခုခုရှာဖွေတွေ့ရှိခဲ့လို့…တပ်ဖွဲ့တွေကအဲ့ဒီနေရာမှာရှိနေတာပေါ့။ ဒါပေမယ့် UNIT က captain တစ်ယောက်ကဒီလိုဆိုတာတော့ငါမယုံကြည်-"
"နင် Hynes ကိုပုဂ္ဂိုလ်ရေးအရသိလို့လား"
"ပုဂ္ဂိုလ်ရေးအရတော့မဟုတ်ဘူးပေါ့။ ဒါပေမယ့် Jo ငါတို့ UNIT အရာရှိတွေကိုသေချာစိစစ်ပြီးမှရွေးတာတော့နင်သိပါတယ်နော်။"
သူမခေတ္တမျှတိတ်ဆိတ်သွားပြီးနောက် တစ်ကိုယ်တည်းရေရွတ်နေသည်ကို John Benton ကြားလိုက်ရပြန်သည်။
"ဒါဆိုရင် ဒါကစိတ်ထိန်းချုပ်ခြင်းပဲဖြစ်ရမယ်။ ဟုတ်တယ်…စိတ်ထိန်းချုပ်ခြင်းပဲ"
"ငါ Captain Hynes ကိုဒီနေ့ဆက်သွယ်လိုက်-"
"သူအခုလေးတင်မှမိန်းမနှစ်ယောက်ကိုသတ်လိုက်တာလေ။ နင့်ကိုအမှန်အတိုင်းပြောမယ်ထင်နေလား"
"နင်သူ့ရဲ့ကိုယ်ရေးရာဇဝင်ကိုစစ်ဆေးပေးလို့ရမလား" ဟု Jo ကပြောလိုက်သည်။
"ဒါကအတွင်းရေးကိစ္စတွေ။ ပြီးတော့နင်လည်းသိပါတယ်"
ထို့နောက်တွင်တော့စားပွဲခုံကလှုပ်ခါသွားသည်ကိုတွေ့လိုက်ရသည်။ Jo ကအားပြင်းပြင်းဖြင့်စားပွဲကိုထုရိုက်လိုက်ခြင်းကြောင့်ဖြစ်သည်။ သူကတော့အံ့အားသင့်စွာဖြင့်မော့ကြည့်လိုက်သည်။
"နင်ဘာဖြစ်နေတာလဲ John"
Benton က "ငါကြီးလာပြီလေ။ ငါ့မှာကလေးသုံးယောက်နဲ့မိန်းမရှိတယ်။ အလုပ်လည်းရှိတယ်။" ဟုပြောချင်မိသည်။ သို့သော် Jo ၏မျက်ဝန်းဝိုင်းဝိုင်းထဲမှ မျက်ရည်တွေကသူ၏ပြောစကားကိုရပ်တန့်သွားစေသည်။
"နားထောင်…အဲ့ဒီမိန်းမနှစ်ယောက်သေနေလောက်ပြီ။ Kilgai မှာတစ်ခုခုဖြစ်နေတာသေချာတယ်။ ဘာတွေဖြစ်နေလဲဆိုတာငါရှာဖွေဖို့လိုတယ်။ ပြီးတော့ ငါနင့်ဆီကအကူအညီလိုအပ်တယ် John…နင်လုပ်နိုင်မယ်ဆိုတာငါသိပါတယ်။"
Benton တစ်ယောက်အကြည့်လွှဲလိုက်မိသည်။ သူ့ကိုယ်သူဘာကိုခံစားနေရမှန်းသူနားမလည်နိုင်တော့…သဘောကျခြင်းလား…ရှက်ရွံ့ခြင်း…ဒါမှမဟုတ်ဒေါသထွက်ခြင်းလား စဉ်းစား၍မရတော့။ Jo ကတော့အစဉ်အမြဲစိတ်လိုက်မာန်ပါလုပ်တတ်သူတစ်ယောက်ဖြစ်သည်။ ယခုကဲ့သို့မိုင်လေးထောင်ကျော်အောင်ဝေးသောနေရာမှ သူ့ဆီသို့အရောက်လာခြင်းကပင်လျှင် အမြင်မတူသောရှုထောင့်အသစ်ကို ရရှိစေသည်။
"ငါနင့်ကိုမကူညီနိုင်ဘူး Jo…အဲ့ဒီမှာတစ်ခုခုဖြစ်နေတာသေချာရင် Nairobia မှာရှိတဲ့ Hynes ရဲ့ CO ကိုဆက်သွယ်လိုက်မယ်…ပြီးရင် သူ့ကိုအဲ့ဒီကအခြေအနေတွေတစ်ချက်လောက်စစ်ဆေးပေးဖို့အကူအညီတောင်းပေးမယ်…ငါဒီလောက်ထိပဲလုပ်ပေးနိုင်တယ် Jo"
Jo မတ်တပ်ထရပ်လိုက်ပြီးနောက် ကြမ်းပြင်ကိုငုံ့ကြည့်နေသည်။
ထို့နောက်
"ဒေါက်တာငါ့ကိုအကူအညီပေးဖို့ဆက်သွယ်လာတယ်။ သူဒါကိုအကြောင်းမရှိပဲနဲ့လုပ်မှာမဟုတ်ဘူး"
"ဒေါက်တာ?" အစကတော့ Benton က သူမလိုချင်တာရရန်အတွက်လိမ်ညာနေမိသည်ဟုထင်မိသည်။ အကယ်၍သာ လိမ်နေခြင်းမဟုတ်ခဲ့ပါက-
"စိတ်မပူပါနဲ့…ငါကိုယ့်လေယာဉ်စရိတ်တော့ကိုယ်ပေးနိုင်ပါတယ်။"
Benton ကသူ၏လက်တွေကိုငုံ့ကြည့်နေသည်။ အကယ်၍ဒေါက်တာသာအမှန်တကယ်ပါဝင်လာခဲ့ပါက-
"ကောင်းပြီလေ…နင်နိုင်တယ် Jo…Nairobia ကနေ Kilgai အထိရဟတ်ယာဉ်စီစဉ်ပေးထားမယ်။ မှတ်ထားနော်…နင်ကအဲ့ဒီမှာသိပ္ပံစမ်းသပ်မှုတစ်ခုပြုလုပ်ဖို့ရောက်နေတဲ့ regimental ရဲ့အထူးဧည့်သည်…ဒါပေမယ့် နင်ထင်တာတွေသာမှားခဲ့မယ်ဆိုရင်… အဲ့ဒီကနေခြေတစ်လှမ်းထွက်လာတာနဲ့ဂြိုဟ်သားအကြောင်းစကားတစ်ခွန်းတောင်မဟနဲ့…မဟုတ်ရင် ငါအလုပ်ပြုတ်ပြီ"
Jo ကတံခါးဘက်သို့လှည့်ထွက်သွားလိုက်ပြီး "နင့်ရဲ့အသက်မွေးဝမ်းကြောင်းထက်ပိုပြီးအရေးကြီးတာတွေရှိပါသေးတယ်…မဟုတ်ရင်ငါဒီနေရာကိုရောက်နေမှာမဟုတ်ဘူး" ဟုပြောပြီးသည့်နောက် လှည့်ထွက်သွားလိုက်သည်။
Benton ကသူ၏စားပွဲပေါ်မှကွဲသွားသော သားရေပြားကိုကြည့်နေပြီးနောက်တွင်ဖုန်းကိုကောက်ကိုင်လိုက်သည်။
