လူသားဗူဒူးမှော်သွင်းအရုပ်
==============
ကိုအေးကျော်မှာ ရိုးသားဖြောင့်မတ်သောသူတစ်ယောက်ဖြစ်၏ ။
လူတစ်ဖက်သားအပေါ်စေတနာထားတတ်သူဖြစ်သလို
ဒုက္ခရောက်သူတွေ့ပါကလည်း လက်မတွန့်ပဲကူညီတတ်သူလည်းဖြစ်၏ ။
အမြဲတစေပြုံးပြီးစိတ်သဘောထားကောင်းသောကိုအေးကျော်မှာ လူတိုင်းကိုကူညီတတ်သူဖြစ်ပြီး စိတ်ဆိုး
ဒေါသထွက်ခဲလှသူဖြစ်သည်။
သူစိတ်ဆိုးဒေါသကိုသူ့သူငယ်ချင်းအရင်းကြီးများက
ပင်မြင်တွေ့ဖူးခြင်းမရှိသလောက်ပင်။
ထိုကဲ့သို့စိတ်သဘောထားကောင်းသောကိုအေးကျော်မှာအားနည်းချက်ဟုဆိုရမည်ဖြစ်သောစိတ်တခုရှိသည်။
သူစိတ်နာသွားသူမျိုးဆိုလျှင်ဘယ်လောက်ရင်းနှီးခင်မင်နေသူဖြစ်ပါစေ။
သူ့မျက်စိရှေ့တွင်သေဘေးကြုံနေချိန်မှာပင်ရှောင်သွား
တတ်သူမျိုးဖြစ်၏ ။
ငယ်စဉ်ကျောင်းကပြန်လာချိန်သူ့ကို ခွေးတစ်ကောင်
ကိုက်လိုက်ရာ လူကြီးများအရောက်မြန်၍သာမသေ
ခြင်းဖြစ်သည်။
ခွေးပိုင်ရှင်များက ကိုအေးကျော်မိဘများကိုတောင်းပန်
ပြီးဆေးဖိုးကျသင့်သမျှအကုန်ကျခံကုပေး၏။
ကိုအေးကျော်ခန္ဓာကိုယ်မှတခြားသောနေရာမှခွေးကိုက်
ဒဏ်ရာများမှာအချိန်တန်သော်ပျောက်သွားသော်လည်း
ညာဖက်ပါးပြင်ပေါ်မှအမာရွတ်ကြီးတစ်ခုကအရုပ်ဆိုး
အကျည်းတန်စွာထင်ကျန်နေရစ်ခဲ့တော့သည် ။
လူချောလေးကိုအေးကျော်မျက်နှာက အမာရွတ်ကြောင့်အကျည်းတန်သွားရတော့၏ ။
မြင်သမျှလူတိုင်းကသနားဂရုဏာသက်စွာဖြင့်ကိုအေး
ကျော်အမာရွတ်ကိုကြည့်ကာ စိတ်မကောင်းစကားဆို
ကြသော်လည်းကိုအေးကျော်ကတော့ ဘာမှမခံစားရဟန်မျက်နှာအမူအယာဖြင့်ရှိနေပါသည်။
ကိုအေးကျော်ဆေးရုံမှဆင်းပြီးများမကြာမှီ ကိုအေးကျော်ကိုကိုက်သောခွေးကြီးအဆိပ်မိပြီးသေသွားပါတော့သည်။
ကိုက်တတ်သောခွေးဖြစ်သောကြောင့် ခွေးကိုမုန်းသူတစ်ယောက်ယောက်အဆိပ်ချသတ်ခြင်းဟုဆိုကြပြီး အိမ်နီးနားခြင်းခွေးကိုက်ခံရဖူးသူနဲ့ခွေးပိုင်
ရှင်စကားများကြသေး၏ ။
ကိုအေးကျော်ကတော့ သူ့ကိုကိုက်သောခွေးသေကြောင်းသိရချိန် ခိုးဝယ်ထား
သောအဆိပ်ပုလင်းကို အစဖျောက်လိုက်တော့သည်။
တကယ်ကသူ့ကိုကိုက်သောခွေးကိုအစာတွင်အဆိပ်ခတ်လုပ်ကြံသူမှာကိုအေးကျော်ဟုမည်သူမျမထင်မှတ်
ကြပေ။
ခလေးတစ်ယောက်ကထိုသို့အဆိပ်ခတ်သောအလုပ်ကိုပြုလုပ်လိမ့်မည်ဟုမည်သူမျမတွေးမိကြချေ။
ကိုအေးကျော်ကတော့
သူ့ကိုကိုက်သောခွေးကိုသူကိုယ်တိုင်သတ်
ခြင်းပင်ဖြစ်ပါ၏ ။
ကိုအေးကျော်ကတော်တန်ရုံစိတ်မနာတတ်သူမို့
သူမုန်းသူလည်းမရှိသလိုစိတ်နာသူလည်းမရှိသလောက်ပင်။
ကုန်သည်ပွဲစားလုပ်သောကိုအေးကျော်မှာ လူချစ်လူခင်များသူတစ်ယောက်ဖြစ်၏ ။
နှိမ့်ချသောစကားကိုပြောပြီးလူတစ်ဖက်သားကို
ကူညီတတ်ကြရာကိုအေးကျော်နဲ့ပတ်သက်မိသူတိုင်း
လေးစားခင်မင်ကြသည်။
တစ်ခါက ကိုအေးကျော်နဲ့ရင်းနှီးခင်မင်သောကုန်
သည်တစ်ယောက်မှာကုန်ရူံး၍ကိုအေးကျော်ထံငွေလာချေးရာငွေအတော်များများကိုအတိုးမပါပဲချေးပေးလိုက်သည်။
ထိုကုန်သည်မှာနောက်အခေါက်များတွင်အမြတ်ကျန်၍
ပြန်လည်အဆင်ပြေလာသော်လည်း ကိုအေးကျော်ပိုက်ဆံကိုလာမဆပ်ပဲ ရှောင်နေသည်။
ကိုအေးကျော်နဲ့မလွဲသာမရှောင်သာဆုံလျှင်သူအဆင်မပြေသေး၍ပိုက်ဆံပြန်မဆပ်နိူင်သေးကြောင်းခိုငြီးသလိုငြီးပြတတ်၏ ။
ကိုအေးကျော်က အပြုံးမပျက်အဆင်ပြေမှပြန်ပေးရန်ပြောကာအားပေးစကားပင်ပြောလိုက်သေးသည်။
ကိုအေးကျော်တို့အဖြစ်ကိုသိသောတခြားသူများမှာ
တက်တခေါက်ခေါက်ဖြင့်ကလိမ်ကကျသောကုန်သည်ကိုကြည့်ပြီးဒေါသဖြစ်နေကြသလို။
ရိုးသားအေးဆေးသောကိုအေးကျော်ကိုကြည့်၍
အားမလိုအားမရဖြစ်နေကြ၏ ။
များမကြာမှီညအချိန်ပျော်ပွဲစားရုံတစ်ခု
မှထွက်လာသောထိုကုန်သည်မှာ အမှောင်အတွင်းရပ်ထားသော သူ့ကားရှိရာသွားချိန်တွင်မျက်နှာဖုံးစွတ်လူနှစ်ယောက်
ရောက်လာပြီး ဓားထောက်၍အော်ဟစ်ပါက အသတ်
ခံရမည်ဖြစ်ကြောင်း ကားတခါးဖွင့်၍ကားကိုမြို့ပြင်
လူရှင်းသောနေရာသို့မောင်း၍ရပ်ခိုင်းသည်။
ကြောက်လန့်စွာကားပေါ်မှဆင်းလာ
သောကုန်သည်ကိုလူနှစ်ယောက်ဝိုင်းထိုးကြပါတော့သည်။
ကုန်သည်မေ့မြောသည်အထိရိုက်နှက်ပြီးအဝတ်အစားများကိုချွတ်၍ကားထဲထည့်ကာ ကားသော့ကိုခပ်လှမ်း
လှမ်းရေကန်ထဲသို့ပစ်ချလိုက်ပြီးထိုလူနှစ်ယောက်ထွက်ခွာသွားကြတော့၏ ။
ကုန်သည်မှာ သတိရလာချိန်မိုးလင်းနေပြီဖြစ်ပြီး
အဝတ်အစားတကိုယ်လုံးမရှိသည့်အဖြစ်ကိုသိရသောအခါကားပေါ်တက်ရန်ကားသော့လည်းမရှိသောကြောင့်အခက်တွေ့နေရတော့သည်။
နာရီပေါင်းများစွာဒုက္ခရောက်နေပြီး ဖြတ်သွားဖြတ်
လာလူတချို့ကိုအကူအညီတောင်း၍ အဝတ်အစား
များရှာကာရဲစခန်းသို့သွား၍ညကသူကြုံခဲ့ရသောအဖြစ်.အပျက်ကိုငိုကြီးချက်မဖြင့်သွားတိုင်တော့၏ ။
ရဲများမှာအခင်းဖြစ်ပွားသောနေရာကိုသွားရောက်
စစ်ဆေး၍ကုန်သည်ပြောသောငွေ ၊ပစ္စည်းများကိုစစ်
ဆေးကြည့်ရာ တခုမှမပျောက်ရှပဲရှိနေခြင်းအတွက်စဉ်း
စားရကြပ်ကုန်ကြသည်။
ပစ္စည်းမယူပဲ၊လူကိုရန်ငြိုးတစ်ခုကြောင့်ထိုးကြိတ်
ထားခြင်းဟုဆိုကာ ထိုကုန်သည်နဲ့ပြသာနာဖြစ်ထားသူ
မှန်သမျှကိုခေါ်ယူစစ်ဆေးပါတော့၏ ။
နောက်ဆုံးဆက်စပ်စုံစမ်းမူအရကိုအေးကျော်ထံမှ
ပိုက်ဆံအတော်များများချေးဖူးသောကြောင့် ကိုအေးကျော်ကိုပါသံသယစာရင်းသွင်းကာစခန်းသို့
ခေါ်ယူမေးမြန်းခြင်းခံရတော့သည်။
ကိုအေးကျော်က ထိုအချိန်မိမိမှာအိမ်တွင်ရှိနေကြောင်း ဇနီးမယားအိမ်နီးနားခြင်းနဲ့တကွ လုပ်ဖော်ကိုင်ဖက်များကပါသက်သေခံကြသလို၊ လုပ်ဖော်ကိုင်ဖက်ကုန်သည်ပွဲစားများက ဝိုင်းဝန်းသက်သေခံကြသည်။
ကိုအေးကျော်မှာကုန်သည်ကိုငွေချေးထားခြင်းကို
ဇနီးဖြစ်သူမသိအောင်ချေးထားခြင်းဖြစ်၏ ။
ယခုဇနီးဖြစ်သူကသိသွားသောအခါ ငွေပြန်မဆပ်၍
အမူပြန်ဖွင့်ပါတော့သည်။
ရဲများသိနေသည့်အပြင်ကုန်သည်ပါးစပ်ကလည်းကိုအေးကျော်ထံမှငွေချေးယူထားခြင်းကိုဝန်ခံထားခြင်းကြောင့်ချေးငွေများပြန်ရပါတော့သည်။
ကိုအေးကျော်ဖက်မှသက်သေလိုက်ပါလာသူများမှာ
ပိုက်ဆံပြန်မဆပ်ပဲ အမူအခင်းထဲကိုပင်ဆွဲထည့်သော
ပွဲစားကိုစိတ်တိုဒေါသဖြစ်ကာ၊တရားခံရှာမရသည့်အပြင် ကိုအေးကျော်ငွေပြန်ရသည့်
အတွက်အားရဝမ်းသာရှိနေကြပါတော့သည်။
ကိုအေးကျော်မှာဝမ်းသာဟန်လည်းမပြ၊ဝမ်းနည်းဟန်လည်းမပြ ထိုကုန်သည်ထံသွား၍ထိုးကြိတ်ခံထားရသောဒဏ်ရာ
အခြေအနေကိုပင်မေးမြန်း၍စိတ်မကောင်းဖြစ်ရကြောင်းအားပေးစကားဆိုနေခြင်းကြောင့် ကိုအေးကျော်
စိတ်သဘောထားကြီးမြတ်မူကို မြင်ရသူတိုင်းချီးကျုး
ကြတော့သည်။
ရန်သူကိုပင်မေတ္တာထားနိူင်သောကိုအေးကျော်အဖြစ်ကပြောစမှတ်တွင်သွားပါတော့၏ ။
အဝေးပြေးကားဂိတ်၏လူရှင်းသောလဖက်ရည်ဆိုင်၏
ထောင့်ကျကျစားပွဲ သံပုရာသီးခွံဦးထုပ်ကိုခပ်ငိုက်ငိုက်
ဆောင်း၍ရုပ်ဖျက်ထားသောကိုအေးကျော်နဲ့အတူ လူနှစ်ယောက်ရှိနေပါသည်။
ထိုလူနှစ်ယောက်မှာကိုအေးကျော်ကုန်ဝယ်နေကျရွာတစ်ရွာမှ လူမိုက်ညီအစ်ကိုနှစ်ယောက်ဖြစ်ပြီး
ကိုအေးကျော်ကျေးဇူးနဲ့မကင်းသူများဖြစ်ကာကိုအေး
ကျော့်အတွက်ဆိုပါကအသက်ကိုပင်စွန့်ရန်အထိ
ဆုံးဖြတ်ထားကြသူများပင်။
ကိုအေးကျော်ကိုလေးစားသူများမို့ ပိုကိဆံချေးပြီးအဆင်ပြေရက်နဲ့ပြန်မဆပ်သောလူတစ်ယောက်ကိုပြ၍ထိုသူသွားလာတတ်သောနေရာများကို
ကိုအေးကျော်မှနောက်ယောင်ခံလိုက်ပြီး
လူကိုမှတ်လောက်သားလောက်ဆုံးမ၍ ဘာပစ္စည်း
မှမယူလာရန်သေချာမှာပြီးခိုင်းခဲ့ခြင်းပင်ဖြစ်သည်။
အခြေအနေငြိမ်မှရွာသို့ပြန်ရန်မှာထားပြီးမြို့ပြင်မှ
သူ့အိမ်တစ်လုံးတွင်ထားရာမှ ယနေ့ရွာပြန်ခိုင်းခြင်းပင်။
လူမိုက်ညီအစ်ကိုနှစ်ယောက်အတွက်ငွေကြေးများနဲ့အတူ
အိမ်အတွက် လက်ဆောင်လာပေးခြင်းဖြစ်သည်။
ကိုအေးကျော်စိတ်ကိုအကယ်၍အတွင်းကျကျနိူက်နိူက်
ချွတ်ချွတ်သာသိပါက နှစ်မျိုးနှစ်စားကောက်ချက်ချမိကြမည်ဖြစ်သည်။
ပထမတမျိုးမှာ အလွန်တရာစိတ်သဘောထားကောင်းလွန်း၍ပွင့်လင်းရိုးသားသူနှစ်လိုခင်မင်ဖွယ်ရာကောင်းသူ။
နောက်တမျိုးမှာအလွန်တရာလျို့ဝှက်၍ ရက်စက်စရာရှိပါက အစွန်းကုန်ရက်စက်မည့်ကြောက်စရာကောင်းသူ
ဟူ၍ပင်ဖြစ်ပါ၏ ။
တစ်နေ့သောအခါ ကိုအေးကျော်တစ်ယောက်ကျောင်းနေဖက် မောင်မောင်ဟုခေါ်သောသင်္ဘောသားသူငယ်ချင်းတစ်ယောက်နဲ့မြို့ထဲတွင်အမှတ်မထင်ဆုံမိကြရာမှ အိမ်လည်ခေါ်ရန်အတင်းခေါ်
သောကြောင့် အရေးကြီးအလုပ်ကိစ္စမရှိသောကြောင့်
လိုက်ပါလာခဲ့တော့၏ ။
မောင်မောင်ဇနီးကကော်ဖီနဲ့မုန့်ချပေးပြီးသူငယ်ချင်းနဲ့
နှစ်ယောက်လွတ်လွတ်လပ်လပ်စကားပြောဆိုနိူင်ရန်
ရှောင်ပေးသွားသည်။
ရှေးဟောင်းနှောင်းဖြစ်များ၊မိသားစုအကြောင်းများပြောဆိုနေကြရင်းမှ... ။
ကိုအေးကျော်မှ...
” မောင်မောင် မင်းကောသားသမီးဘယ်နှစ်ယောက်ရ
နေပြီလဲ။
သင်္ဘောကထပ်တက်အုံးမှာလား...... ”
”..သားသမီးက သုံးယောက်ရနေပြီ...
သူတို့ရှေ့ရေးအတွက် သင်္ဘောသားအလုပ်ငြီးငွေ့နေ
ပေမယ့် ထပ်လုပ်ရအုံးမှာပေါ့...”
”..မင်းကတော့နော်.. ခလေးကသုံးယောက်တောင်
ဒါတောင်သင်္ဘောတက်နေရလို့ နိူ့မို့ဆို...ခလေးဘယ်နှစ်ယောက်တောင်များရနေမလဲ
မပြောတတ်ဘူး...”
”...ဒါနဲ့..မင်းတို့ရောခလေးဘယ်နှစ်ယောက်ရနေပြီလဲ..”
မောင်မောင်နဲ့စကားပြောဆိုစနောက်ရင်းခေးရှိလားမေး
လာရာ ပြုံးရွင်နေသောကိုအေးကျော်မျက်နှာတချက်ကွက်ခနဲပျက်သွားသော်လည်းအချိန်မှီပြန်ထိန်းလိုက်၏ ။
” မရသေးပါဘူးကွာ...ခုထိခလေးမရှိသေးဘူး...”
”..ဘယ်လိုဖြစ်တာလဲကွာအိမ်ထောင်သက်ကလည်း
မနည်းတော့ဘူး..သူ့အားနည်းချက်လား ၊ဒါမှမဟုတ်
မင်းအားနည်းချက်လား...”
”..ငါလည်းအဲတာကိုသိချင်တာကွ ၊ငါတို့အမျိုးမှာတော့ အမြုံမရှိဘူးဆိုတာမလည်းသိပါတယ်။ ငါ့မိန်းမဖက်ကတော့မပြောတတ်ဘူး....”
”..ဘယ်သူ့အားနည်းချက်လဲသိရအောင်ဆေးစစ်ချက်
လုပ်သင့်တယ် အေးကျော်...”
”...အဲတာခက်နေတာပေါ့ကွ ၊ သူကဆေးစစ်ဖို့လက်မခံဘူးသူရောငါရောဆေးစစ်မယ်ဆိုတာ သူကအမြုံမဟုတ်ဘူးတဲ့ သူမစစ်ပဲ
ငါ့ကိုစစ်ခိုင်းတာမသိရင်ငါအားနည်းချက်ကြောင့်
လိုလို..ငါကစစ်စရာလား..
အဲအကြောင်းမပြောချင်တော့ပါဘူးကွာ....”
”..ဆောရီးကွာ ငါဘာသဘောနဲ့ပြောတာမှမဟုတ်ဘူး
သူငယ်ချင်းရာ...”
”ရပါတယ်ကွာ.....”
ကိုအေးကျော်မှာနှစ်ဖက်မိဘများသဘောတူပေးစား၍လက်ထပ်ထားသော ဇနီးရှိ၏ ။
ဇနီးအမည်မှာကြည်ပြာဟုအမည်ရပြီး ချောမောလှပခေတ်ဆန်သူတစ်ယောက်ဖြစ်၏ ။
ခွေးကိုက်ဒဏ်ရာအမာရွတ်ကြောင့်ရုပ်ပျက်နေသော
ကိုအေးကျော်နဲ့ဆိုဇနီးဖြစ်သူတွဲသွားလျှင်မင်းကုသနဲ့ပပဝတီအတွဲဟုမကြာခနစနောက်ခံရသောကြောင့်
နောက်အခါကိုအေးကျော်မှာ ဇနီးဖြစ်သူနဲ့တွဲသွားတွဲလာရှောင်၏ ။
လင်စုံမယားဖက်မဖြစ်မနေတက်ရမည့်ပွဲတစ်ချို့မှလွဲ၍တစ်ခြားပွဲများကိုအေးကျော်တက်လေ့မရှိပေ။
ဇနီးဖြစ်သူမှာခေတ်ဆန်သူပီပီရှော့ပင်းထွက်ခြင်း၊
နိူက်ကလပ်တက်ခြင်းများကို သူနဲ့ဝါသနာတူသူငယ်
ချင်းများနဲ့မကြာခနတက်လေ့ရှိသူဖြစ်သည်။
ကိုအေးကျော်မှာ ကိုယ်တိုင်အေးဆေးနေပြီးတဖက်သားစိတ်ခံစားမူကို
မစွက်ဖက်တတ်သူပီပီ ဇနီးအပေါ် ဟိုဟာမလုပ်ရ။
ဒီဟာမလုပ်ရတားမြစ်လေ့မရှိပဲ။
အိမ်ထောင်ရေးစည်းမဖောက်သောအလုပ်မှန်သမျှ
ဝင်စွက်ဖက်လေ့မရှိပေ။
ပြသာနာက အိမ်ထောင်သက်ရှစ်နှစ်အတွင်းခလေးမရ
ခြင်းကြောင့်သူကြောင့်၊ငါ့ကြောင့်ဟူသောစွတ်စွဲချက်ဖြင့်
မကြာခနပြသာနာတက်ကြခြင်းပင်။
”..ဟေ့ကောင်..ဟေ့ကောင်.. အေးကျော်
ငုတ်တုတ်ကြီးအိပ်ပျော်နေတာလား...အနီးကပ်
ခေါ်နေတာမကြားဘူး...”
”..ကြားပါတယ်ကွာ.. အလုပ်ထဲစိတ်ရောက်သွားလို့ပါ... ”
”..မင်းကလည်း သူငယ်ချင်းတွေ့တာ အလုပ်ကိုခနမေ့ထား မင်းကိုငါပြစရာတစ်ခုရှိတယ်..မင်းလုံးဝအံ့သြသွားစေရမယ်လို့အာမခံတယ်.”
သူတို့လင်မယားအကြောင်းတွေးနေမိသော ကိုအေးကျော်တစ်ယောက် မောင်မောင် လက်မောင်းကိုလူပ်ပြီး ခေါ်သောအခါမှ စိတ်နဲ့လူကပ်တော့၏ ။
မောင်မောင်က ကိုအေးကျော်ကိုပြစရာရှိသည်ဟုဆိုကာအတွင်းခန်းသို့
ဝင်သွားပြီး ပြန်ထွက်လာသောအခါ တစ်တောင်ပတ်လည်ကတ်ထူဗူးလေးတစ်ဗူးကို၍
ပြန်ထွက်လာပြီး နှစ်ယောက်သားအလယ်စားပွဲပေါ်တင်လျှက်ဗူးကိုဖွင့်နေပါတော့သည် ။
”...ဟာ...မိုက်လှချည်လား မင်းအရုပ်က မသိရင်
တကယ့်လူသားအတိုင်းပါပဲလား....”
”...တကယ့်လူပဲလေကွာ မင်းမယုံရင်ကိုင်ကြည့်ပါလား....”
”....ဟင်...ဒါ....ဒါ........”
ဗူးအတွင်းမှမောင်မောင်ထုတ်လာသောအရာမှာ
တစ်ခြားမဟုတ် တစ်တောင်မပြည့်တပြည့်ခန့်ရှိမည်
ဖြစ်သောအရုပ်တစ်ရုပ်ဖြစ်၏ ။
ဆံပင်လိမ်ကောက်ကောက်၊မဲနက်သောအသား
အရေ၊ ပြူးကြောင်ကြောင်မျက်ဝန်းများဖြင့်စိုက်ကြည့်
နေပုံများက တကယ့်လူသားအသေးစားလေးအတိုင်း
တထေရာတည်းချွတ်စွတ်တူနေ၏ ။
လက်တွင်သစ်သားထိပ်တွင်သံချွန်တပ်ထားသော
လှံငယ်တစ်ချောင်းကိုင်ကာ ခါးအောက်ပိုင်းတွင်အရှက်
လုံရုံနံငယ်ပိုင်းဝတ်ထားပြီး မျက်နှာနဲ့ကိုယ်လုံးတွင်သစ်
စေးအဖြူအနီများကိုသုတ်လိမ်းထားသောထိုလက်ရာ
မြောက်အရုပ်လေးကိုကြည့်၍
ကိုအေးကျော်မှအံ့သြနေရာ မောင်မောင်မှအရုပ်ကိုကိုင်
တွယ်ကြည့်ခိုင်းသောကြောင့်ကိုင်တွယ်ကြည့်ရာ
ကိုအေးကျော်တစ်ယောက်အံ့သြတုန်လူပ်ကာလက်မှ
အရုပ်ပင်လွတ်ကျမတတ်ဖြစ်သွားရတော့သည်။
အကြောင်းမှထိုမျလက်ရာမြောက်အရုပ်ကို သစ်သား
တစ်မျိုးနဲ့ထွင်း၍ဆေးရောင်ချယ်ထားခြင်းဟုထင်မှတ်မိသေး၏ ။
သို့ရာတွင်ထိုသို့မဟုတ်ပဲ လူတစ်ယောက်၏အသားအရေအတိုင်းဖြစ်နေကြောင်း
အံ့သြဖွယ်ရာတွေ့လိုက်ရပါတော့၏။
”..ဒါ..တကယ့်လူသားလား မောင်မောင်...”
”သေချာတာပေါ့ကွ လူသားစစ်စစ်ပဲ အေးကျော်...”
”..ဒါပေမယ့်.. ဖြစ်မှမဖြစ်နိူင်တာကွာ လူကဒီလောက်
သေးတာရှိပါ့မလား...”
” ဒီလူအသေးလေးကိုငါနဲ့အလုပ်တူလုပ်တဲ့ အာဖရိကသင်္ဘောသားတစ်ယောက်ဆီက လက်ဆောင်ရတာပဲကွ သူပြောပြပုံအရတော့
အဖရိကတောထဲမှာခုချိန်ထိရှိနေသေးတဲ့လူရိုင်း
တချို့ဟာ လူသေရင်မြုတ်နှံလေ့မရှိပဲ အိုးအကြီး
တစ်လုံးထဲမှာ လူသေကိုထည့်ပြီးရင် အရွက်တစ်မျိုး
ကိုထည့်ပြီးနေ့ညမီးအဆက်မပြတ်ထိုးပြီးပြုတ်တာ
ဒီအရွယ်အစားအတိုင်းရောက်လာပါရောတဲ့....”
” အတော်ထူးဆန်းတဲ့ ကိစ္စမျိုးပဲ လက်တွေ့မြင်လို့သာ
ယုံရတယ် ဒီလူအသေးလေးကိုသာမမြင်ရရင်ယုံမှာ
မဟုတ်ဘူး....”
”..အဲဒီသင်္ဘောသားပြောတာကတော့ ဒီအရုပ်တွေဟာ အဖရိကရိုးရာ ဗူဒူးပညာရပ်တွေနဲ့
ထည့်သွင်းထားတယ်ပြောကြတယ်...သူတို့ကိုမလေး
မစားသွားလုပ်လို့မရဘူး..သူတို့ကိုစားကောင်းသောက်
ဖွယ်တွေနဲ့ကျွေးမွေးပြီး မိတ်ဆွေဖွဲ့ထားရင်မင်းကိစ္စ
အခက်အခဲတွေကို မင်းကိုယ်စားဖြေရှင်းပေးတယ်တဲ့......”
” ဟုတ်ပါ့မလားကွာ...အဲဒီလောက်ကြီးတော့
..”
”..ငါလည်းသိတော့မသိပါဘူးကွာ သူ့အဖိုးက အဲဒီသင်္ဘောသားကို ဒီလူသေးလေးရလာပုံပြောတဲ့
အကြောင်းအရာကတော့အတော်ထူးဆန်းတယ်ကွ...”
” ဆိုစမ်းပါအုံး ဘယ်လိုအကြောင်းနဲ့ ဒီလိုလူသား
အရုပ်ကလေးရလာလဲဆိုတာ...”
” အဲဒီသင်္ဘောသားရဲ့အဖိုးနဲ့ သူ့သူငယ်ချင်းဟာ
အမဲလိုက်ထွက်ရင်းတောထဲမျက်စိလည်လမ်းမှားနေကြတယ်တဲ့..။
အဲဒီအချိန်မှာပဲ လူရိုင်းတွေရောက်လာလို့ထွက်ပြေး
ကြရင်း လူစုကွဲသွားကြတယ် ။
သင်္ဘောသားအဖိုးဟာ ပုန်းလို့လွတ်သွားပေမယ့်
သူ့သူငယ်ချင်းကိုတော့ ဖမ်းမိသွားကြတယ် ။
သူငယ်ချင်းကိုဒီအတိုင်းလူရိုင်းတွေလက်ပစ်မထား
ခဲ့ဘူး အခွင့်ကောင်းကြုံရင်ကယ်မယ် စိတ်ကူးနဲ့ သင်္ဘောသားအဖိုးဟာ လူရိုင်းတွေနောက်ကနေ
နောက်ယောက်ခံပြီးလိုက်သွားတယ်.. ။
ဒီလိုနဲ့ လူရိုင်းတွေရဲ့ ရွာကိုရောက်သွားပြီး သူငယ်
ချင်းကိုကယ်မယ်စိတ်ကူးနဲ့ချောင်းမြောင်းပြီးအခြေ
အနေကြည့်နေတာပေါ့ ။
အဲဒီမှာပဲထူးဆန်းတာတစ်ခုတွေ့လိုက်ရတော့တယ်
လူရိုင်းတွေဟာ သူ့သူငယ်ချင်းကိုဆေးရည်တစ်မျိုးတိုက်လိုက်တာ မူး
သွားတာလား... ။သေသွားတာလားမသိဘူးပျော့ခွေလဲကျသွားတော့တယ် ။
ဧရာမလူတစ်ကိုယ်စာဆန့်မြေအိုးကြီးတစ်လုံးမှာ
အရွက်တစ်မျိုးထည့်ပြီးအောက်ကမီးပြင်းတိုက်ထားတယ်။
ရေဆူလာတော့ သူငယ်ချင်းဖြစ်သူကို အိုးထဲထည့်ပြီးပြုတ်နေတာကိုစိတ်မကောင်းစရာတွေ့လိုက်ရတော့တယ်။
ဘေးကနတ်ဆရာလိုလူတွေကလည်းအိုးကိုဝိုင်းပတ်ပြီး
အချိန်အတော်ကြာမန်းမူတ်နေကြတယ်တဲ့...။
သူလည်းညနက်ပိုင်းအထိစောင့်ပြီးလူရိုင်းကင်းသမား
တွေငိုက်မြည်းနေချိန် သူငယ်ချင်းဖြစ်သူကို ဘာလုပ်
လိုက်တာလဲ အိုးအနားကပ်ကြည့်လိုက်တော့ သူငယ်ချင်းဖြစ်တဲ့သူကို အခုအရွယ်အစားအတိုင်း
တွေ့ရတော့တာပါပဲတဲ့....။
သူငယ်ချင်းဖြစ်သူအရုပ်ကိုယူပြီး သဘေ်ာသား
အဖိုးဖြစ်သူဟာ လူရိုင်းတွေလက်ကလွတ်အောင်
ပြေးလာခဲ့တယ် ။
သင်္ဘောသားပြောပုံအရ ဒီအရုပ်ဟာ ဗူဒူးမှော်သွင်း
ထားတာတဲ့ အရုပ်ပိုင်ရှင်နဲ့ အရုပ်နဲ့ စိတ်ဘခြင်းဆက်မိရင်ပိုင်ရှင်လုပ်ခိုင်းချင်တာကိုအရုပ်ကလုပ်ပေးတယ်ပြောတယ် ။
သူ့အဖိုးဆီကလက်ဆောင်ရတဲ့အရုပ်ကိုပြန်ခါနီး
ငါ့ကိုလက်ဆောင်ပေးလိုက်တာပဲ.. ။...
အခုငါကမင်းကိုလက်ဆောင်ပေးမလို့ပဲအေးကျော်...”
”..မင်းလက်ဆောင်ကိုဝမ်းမြောက်ဝမ်းသာလက်ခံပါ
တယ်ကွာ ဒါပေမယ့် သူတို့လူမျိုးချင်းတော့စကားနား
လည်မှာပေါ့ ။ ခုငါတို့ကလူမျိုးခြားဆိုတော့ အရုပ်တကယ်စွမ်းရင်တောင် စကားနားမလည်တော့
အခက်သား..ဟား........ဟား.....ဟား......”
ကိုအေးကျော်မှာမောင်မောင်လက်ဆောင်ပေးသောအ
ရုပ်လေးကိုထူးခြားသော အရုပ်တစ်ခုအဖြစ်သဘောကျ၍ယူလာသည်မှာကား
မှန်သည်။
သို့ရာတွင် ဗူဒူးမှော်သွင်းထားသောအရုပ်တစ်ရုပ်အဖြစ်ယုံကြည်
မူကားမရှိချေ။
မောင်မောင်နဲ့စကားအချိန်အတန်ကြာပြောကြပြီးညနေစောင်းအချိန်တွင်နူတ်ဆက်ပြီးအိမ်ပြန်လာခဲ့တော့သည်။
သူအိမ်ပြန်ရောက်ချိန်တွင် အလှအပများချယ်သပြင်ဆင်ပြီးအပြင်ထွက်ရန်လုပ်နေသောကြည်ပြာကိုတွေ့လိုက်ရသည်။
ကိုအေးကျေးနဲ့ကြည်ပြာမှာတစ်အိမ်တည်းအတူနေသောဇနီးမောင်နှံဖြစ်သော်လည်း ခလေးမရခြင်းကိစ္စအကြောင်းပြု၍ တစ်ယောက်တခွန်း
စကားအခြေအတင်များရာမှ တအိမ်တည်းနေပြီးစကားမပြောအတူမအိပ်ကြသည်
မှာသုံးလခန့်ရှိပြီဖြစ်၏ ။
ကိုအေးကျော်မှာအခန်းထဲဝင်လာပြီးအရုပ်ကိုစာကြည့်
စားပွဲပေါ်တင်ကာ ရေမိုးချိုးလိုက်ရင်း အိပ်ယာပေါ်
ခနတဖြုတ်လှဲနေရာမှ အိပ်ပျော်သွားတော့သည်။
ကိုအေးကျော် အိပ်ပျော်နေစဉ် အိပ်မက်လိုလို
တကယ်လိုလိုဖြင့်ရောထွေးနေသောမြင်ကွင်းတစ်ခုမြင်
တွေ့နေရ၏ ။
ကိုအေးကျော်စာကြည့်စားပွဲပေါ်တင်ထားသော
အရုပ်ကလေးမှာ တဖြည်းဖြည်းဖြင့်ကြီးလာပြီး လူအရွယ်အစားအတိုင်းရောက်သွားခြင်းကို အံ့သြဖွယ်ရာအဖြစ်တွေ့မြင်နေရသည်။
”....ငါအစားအစားအစာမစားရတာအတော်ကြာပြီ
မင်းငါ့ကို အစာကျွေးနိူင်မလား...”
..ဟင်...
အဖရိကသားတစ်ယောက်က သူ့စကားဖြင့်ပြောလိုက်ခြင်းကို ကိုအေးကျော်ကအလိုလိုနားလည်နေသောကြောင့်
အံ့သြရပြန်သည်။
”..မင်းဘာစားချင်လဲ ငါကျွေးပါ့မယ်.....
မင်းစားချင်တာပြောပါ...”
”...နွားနိူ့နဲ့ အသားတချို့ငါကိုကျွေးပါ ငါမင်းကို
ကျေးဇူးပြန်ဆပ်ပါ့မယ်...။..”
ကိုအေးကျော်က မြန်မာလိုပြန်ပြောပြီး အဖရိကသားကသူတို့စကားနဲ့ပြန်ပြောခြင်းပင်။
သို့ရာတွင်နှစ်ယောက်စလုံး တစ်ယောက်ပြောစကား
ကိုတစ်ယောက်နားလည်နေကြ၏ ။
ကိုအေးကျော်မှာရုတ်တရက်ဆတ်ခနဲလန့်နိူးလာပြီးသူအရုပ်နဲ့ပတ်သက်ပြီးအိပ်မက်နေခြင်း စိတ်စွဲပြီးအိပ်မက်
နေခြင်းလားဟုတွေးနေမိ၏ ။
သို့ရာတွင်မြင်ကွင်းကကြည်လင်ပြတ်သားရှင်းလင်းပြီး
တကယ်ကဲ့သို့ခံစားနေရသည် ။
ထို့ကြောင့် အိပ်ယာမှထ၍ အိမ်ဖော်မလေးကို နွားနိူ့တစ်ပုလင်းကိုပူအောင်နွေးစေ၍
အမဲသား တစ်ပန်းကန်ကြော်စေ၏ ။
နွားနိူ့နဲ့အမဲသားရသောအခါ အရုပ်ရှေ့တွင်ချထားပြီး.....
...နွားနိူ့သောက် အမဲသားစားကွာ ငါ့နာမည်မှတ်ထားကွာ အေးကျော်တဲ့
မင်းနာမည်ကို ငါမသိတော့.. မောင်ဖြူပဲ
ခေါ်မယ်.. ဟားဟား... ဟားဟား...
ကိုအေးကျော်မှာသက်မဲ့လူရုပ်လေးကိုအမဲသားကျွေး
နွားနိူ့တိုက်နေသောသူ့အဖြစ်ကိုပြုံးမိသည့်အပြင်
အဖရိကလူမဲတစ်ယောက်ကို မောင်ဖြူဟု နာမည်ပြောင်ပေးပြီးသူ့ဘာသူသဘောကျကာရယ်မော
ရင်းသူလည်းတစ်ခုခုစားသောက်ရန်အပြင်သို့ထွက်လာခဲ့ပါတော့သည်။
စားသောက်ပြီးအပြင်သို့အလုပ်ကိစ္စတစ်ခုအတွက်
ထွက်လာခဲ့တော့သည်။
အလုပ်ကိစ္စအတွက်စကားပြောပြီးပြန်လာချိန်တွင်
ညအတော်နက်နေပြီဖြစ်သည် ။
လူရှင်း၍မှောင်မဲနေသောလမ်းကြားတစ်ခုအရောက်တွင်
ကားမီးရောင်အောက်တွင်လူတစ်ယောက် ကားလမ်း
မပေါ်တွင်မှောက်ရက်ကြီးလဲနေသည်ကိုတွေ့လိုက်ရသည်။
ကိုအေးကျော်စိတ်အတွင်း အမူးသမားတစ်ယောက်
အမူးလွန်လဲနေခြင်းဟုတွေးကာ ကားရပ်ပြီးကားပေါ်မှ
ဆင်းလိုက်တော့၏ ။
..ဟေ့လူ... အတော်မူးနေလား.. လမ်းဘေးဆင်းအိပ်မှပေါ့ မတော်ကားတက်ကြိတ်သွား
မှဖြင့်....
..သူများအတွက်စိတ်ပူမနေပါနဲ့ ကို့အတွက်ပဲကိုယ်စိတ်ပူစမ်းပါဆရာကြီးရေ....
..ဟင်..မင်းတို့ဘယ်သူတွေလဲ ..
..ခင်ဗျားကို သတ်ပြီး နတ်ပြည်ပို့မယ့်လူတွေပဲ....
..ခွပ်...
..အ...
ကိုအေးကျော်မှာထောင်ချောက်တစ်ခုအတွင်းသက်
ဆင်းမိခြင်းဖြစ်၏ ။
ကားပေါ်မှသူဆင်းလာပြီးအမူးသမားကိုစကားးလှမ်းပြောနေချိန်သူ့ဘေးနားသို့လူသုံးယောက်ဝိုင်းလာပြီးး ကားလမ်းပေါ်လဲနေသူကလည်း ထလာပါတော့သည်။
သူ့ကိုထောင်ချောက်ဆင်ထားမှန်းသိရချိန်တွင်ကိုအေး
ကျော်နောက်စေ့ကို တုတ်တချောင်းအရှိန်ဖြင့်ကျလာပြီး
လူကလည်းခေါင်းထဲကြယ်၊လများမြင်ကာ ရှေ့သို့ယိုင်ကျသွားသည် ။
..ဟေ့ကောင်တွေ ကိစ္စအမြန်ရှင်းပြီး ပြန်ကြမယ်..
..ဟင်.ကားပေါ်မှာလူတစ်ယောက်ရှိနေတယ်ကွ..
..ဟာ သတင်းပေးက သူတစ်ယောက်တည်းပဲလာမယ်ဆို...
..နှစ်ယောက်ပါလည်း နှစ်ယောက်လုံးရှင်းပစ်ကွာ
မထူးတော့ဘူး နောက်မှစျေးပိုတောင်းရမယ်....
ကိုအေးကျော်ကိုရိုက်နှက်၍ ဓားတစ်ချောင်းထုတ်ကာ သတ်ရန်လုပ်နေချိန်ကားပေါ်မှလူတစ်ယောက်ဆင်းလာခြင်းကြောင့် ကိုအေးကျော်နဲ့အဖော်တစ်ယောက်
ပါလာမှန်းသိလိုက်ကြသည်။
..ဟာ..ဘာကြီးလဲ...
..ဟေ့ကောင်တွေ..ဒီလူက ဘယ်သူလဲ...
..ဘယ်သူဖြစ်ဖြစ် ချကွာ....
..ဝှီး...ဝှီး....
...စွတ်...
....အား..
...ဟာ ဟေ့ကောင်တွေ ဒါလူမဟုတ်ဘူး
သရဲ...သရဲ...
ကားပေါ်မှာလှံတချောင်းကိုင်ပြီးဆင်းလာသော
အဖရိကသားတစ်ယောက်ကိုတွေ့လိုက်ရသောကြောင့်
ကိုအေးကျော်ကို အသက်ကိုရန်ရှာနေသူများအံ့သြ
သင့်ကုန်ကြတော့သည်။
တုတ်ဖြင့်ဝိုင်းရိုက်ရာတွင်တွင်သူတို့ရိုက်ချက်များမှာ
ထိုလူကိုတုတ်ကမထိပဲ တုတ်ကလေထုကိုရိုက်သလို
ဖြစ်သွားခြင်းကြောင့်ကြောင်ငေးနေစဉ်..။
အဖရိကသားက သူ့လက်ထဲမှလှံတံဖြင့် ထိုလူများထဲမှ
တစ်ယောက်ကိုထိုးလိုက်ရာ ပခုံးကိုထိသွားရာ ဒဏ်ရာ
ရသူကိုတခြားသူများကဖေးကူပြီးအားလုံးကြောက်လန့်တကြားထွက်ပြေးသွားကြတော့သည်။
ကိုအေးကျော်မှာအစပထမခေါင်းအတွင်းမူးနောက်ကာ
မြင်ကွင်းကို မပီဝိုးတဝါးမြင်နေရ၏ ။
နောက်ပိုင်းခေါင်းတဖြည်းဖြည်းကြည်လင်လာသောအခါသူကိုကယ်သူမှာ အဖရိကသားတစ်ယောက်ဖြစ်ကြောင်းမြင်တွေ့လိုက်
ရတော့သည်။
ကိုအေးကျော်ကိုရန်ပြုရန်ကြံသူများထွက်ပြေးသွား
သောအခါ အဖရိကသားမှာလည်း ကားဘေးပတ်လျှောက်ရင်းပျောက်ကွယ်သွားပါတော့၏။
ကိုအေးကျော်မှာ နောက်စေ့ကိုစမ်းကြည့်ရာ
သွေးအနည်းငယ်စို့နေသောကြောင့် ဆေးခန်းတစ်ခုသို့
မောင်းလာခဲ့သည်။
ရဲစခန်းသို့ အလုပ်ရူတ်မည်စိုး၍သွားမတိုင်ဖြစ်တော့ပေ။
အိမ်ပြန်ရောက်သောအခါ ဇနီးဖြစ်သူပြန်မရောက်သေးကြောင်းသိရသည်။
အိပ်ယာပေါ်လှဲနေရင်းမှ သူ့အားရန်ပြုရန်ကြိုးစားသူများမှာငွေကြေးလုယက်ရန်
ကြိုးစားခြင်းမျိုးမဟုတ်ပဲ ၊ အသက်ကိုရန်ရှာရန်ကြိုးစားသူများဖြစ်မှန်းသူတို့ပြောစကားများအရသိရသည်။
သူအားမည်သူကသတ်ချင်နေတာလဲ ကိုအေးကျော်
တွေးမရပေ။
ဘေးဖက်သို့တချက်အကြည့်ရောက်စဉ် အံ့သြစရာအခြေအနေတွေ့လိုက်ရတော့သည်။
အဖရိကလူရုပ်ကလေးရှေ့တွင်ချထားသော
အမဲသားပန်းကန်တွင်အမဲသားများရှိမနေခြင်းနဲ့အတူ။
နွားနိူ့ဖန်ခွက်တွင်လည်းနွားနိူ့များရှိမနေကြောင်းသိလိုက်ရသည်။
သူ့အခန်းမှာလုံခြုံပြီး အပြင်မထွက်မှီအခန်းတခါး
လော့ချသွားခြင်းကြောင့် ကြောင်ဝင်စားခြင်းမဟုတ်
မှန်းကိုအေးကျော်တွေးလိုက်သလို သူကိုလာကယ်သော အဖရိကသားကယ်တင်ရှင်နဲ့
ယခုအရုပ်ဆက်စပ်နေခြင်းလားဟုတွေးနေမိတော့သည်။
ကိုအေးကျော်မှာနောက်တနေ့မှစ၍အရုပ်ကလေးကို
နွားနိူ့နဲ့ အမဲသား ထပ်ထားပေးသည်။
ထူးဆန်းစွာဖြင့်နွားနိူ့နဲ့အမဲသားများ တစ်ယောက်ယောက်စားထားသလိုကုန်နေသည်။
ကိုအေးကျော်မှာ အရုပ်ကလေးထူးဆန်းမူကိုအံ့သြရသလို သူ့အသက်ကို ထိုအရုပ်ကယ်သည်ဟုစိတ်တွင်ယုံမှတ်ပြီးကျေးဇူးရှင်အဖြစ်သတ်မှတ်ကာ အမဲသားနဲ့နွားနိူ့ကိုမပြတ်တမ်း
မနက်ညပုံမှန်ထားပေးသည်။
ကိုအေးကျော်တစ်ယောက်မနက်ဖြန်အလုပ်ကိစ္စဖြင့်မန္တလေးသို့ညအိပ်သွားရန်ရှိသောကြောင့်အိပ်စက်နေသည်။
ကိုအေးကျော်အိပ်သောအခါ အိပ်မက်အတွင်းသို့
အဖရိကသားတစ်ယောက်ရောက်လာပြီး၊သူ့ကိုကျွေး
မွေးထားခြင်းအတွက်ကျေးဇူးတင်စကားလာပြောနေ
သည်။
ကိုအေးကျော်က သူ့အသက်ကိုကယ်ခဲ့သူလားဟု
မေးရာခေါင်းငြိမ့်ပြလာသည်။
ကိုအေးကျော်ကလည်းကျေးဇူးတင်စကားပြန်ပြော
နေရင်းအိပ်ယာမှလန့်နိူးလာတော့သည်။
ကိုအေးကျော်တစ်ယောက်မန္တလေးတွင်လုပ်စရာရှိသည်အလုပ်များကြောင့် သုံးလေးရက်ခန့်ညအိပ်ခရီးကြာမည်ဖြစ်ကြောင်းအိမ်ဖော်မလေးကိုမှာကြားပြီး သူယတြာတစ်ခုချေနေသော
ကြောင့် သူအခန်းထဲမှအရုပ်ကိုအမဲသားနဲ့နွားနိူ့မနက်
ညတိုင်း အရုပ်လေးရှေ့ထားရန် အသေအချာမှာကြား
ထားခဲ့သည်။
မန္တလေးသို့ရောက်ပြီးဟော်တယ်တစ်ခုတွင်တည်း
ခိုကာ နေ့လည်ပိုင်းအလုပ်ကိစ္စများလုပ်ရင်း ညပိုင်းမှတည်းခိုရာအခန်းရောက်လာပြီးနှစ်နှစ်ခြိုက်ခြိုက်အိပ်ပျော်နေစဉ် သူ့အိပ်မက်အတွင်း အိပ်မက်
လိုလိုဖြင့်တကယ်လိုလိုဖြင့်မြင်လိုက်ရသောမြင်ကွင်း
တစ်ခုကြောင့် ကိုအေးကျော်သွေးများပွက်ပွက်ဆူသွား
ရတော့သည်။
ကိုအေးကျော်နဲ့ကြည်ပြာတို့နှစ်ယောက်အိပ်ခန်း
မင်္ဂလာဦးကုတင်ပေါ်တွင် ကြည်ပြာမှာ တစ်ခြား
အမျိုးသားတစ်ယောက် ချစ်ရည်လူးနေကြသောမြင်ကွင်းက ကိုအေးကျော်
ဒေါသသွေးများပွက်ပွက်ဆူလာတော့၏ ။
နှစ်ယောက်သားချစ်ရည်လူးပြီးသောအခါ
ကြည်ပြာပြောလိုက်သောစကားများက ကိုအေးကျော်
ဒေါသကိုထိန်းမနိူင်သိမ်းမရဖြစ်ကုန်တော့သည်။
”..ဘယ်လိုလဲ မောင်ပြောတော့ ဟိုလူကြီးကိုတခါတည်း အပြတ်ရှင်းဖို့ စိတ်ချရတဲ့
လူတွေငှါးပြီးသတ်တာဆိုခုတော့ ဟိုလူကြီးက ဘာမှမဖြစ်တဲ့အပြင် ခုမန္တလေးတောင်တက်သွားတယ်...”
”..အပိုင်ဆိုပြီးလုပ်တာပဲ ဒါပေမယ့် ဘယ်ကဘယ်လို အဖရိကဖက်ကအသားမည်းမည်း
လူတစ်ယောက်ရောက်လာလို့လွတ်သွားတာပဲ ချစ်ရယ်...”
”..အကြောင်းပြချက်တွေမပေးနဲ့မောင်ဒီလူကြီးမရှိမှ
ချစ်နဲ့မောင် လွတ်လွတ်လပ်လပ် နေလို့ရမှာ...
နိူ့မို့ဆို ခုလိုပဲခိုးကြောင်ခိုးဝှက်တွေ့နေရမှာ..”
” မပူနဲ့ချစ်ရယ် ဒီတခေါက်အပိုင်သေချာစီစဉ်
ပါ့မယ်... မောင်လည်းချစ်အနားဒီလူကြီးရှိနေတာ
တွေးတိုင်းဒေါသဖြစ်ရတယ်...”
ကိုအေးကျော်တစ်ယောက်ဘယ်အချိန်ကတည်းက
ဖောက်ပြန်နေသော သူမိန်းမအဖြစ်ကိုလက်တွေ့မြင်လိုက်ရသည့်အပြင်
သူ့အသက်ကိုသတ်ရန်ကြံစည်သူမှာလည်း သူ့မိန်းမနဲ့
ဖောက်ပြန်နေသူတို့ပူးပေါင်းကြံစည်နေသောအကြံမှန်း
သိလိုက်ရတော့သည်။
”..မင်းဘာလုပ်ချင်လဲ မင်းလုပ်ချင်တာငါလုပ်ပေးမယ်.... ”
”...မိန်းမကဖောက်ပြန်ပြီး ကျုပ်အသက်ကိုတောင်
သတ်ဖို့ကြံစည်ထားတာ ဖြစ်နိူင်ရင်တခါတည်းသတ်လိုက်ချင်တာပေါ့.... ”
”..မင်းတကယ်သူတို့ကိုသေစေချင်ရင် ငါကူညီပေးမယ်...”
သူ့ဘေးနားတွင်ရပ်နေသော အာဖရိကသားအမေးကို အေးကျော်တစ်ယောက်အံ့ကြိတ်စွာပြန်ဖြေနေ၏ ။
ကုတင်ပေါ်မှနှစ်ယောက်မှာ အေးကျော်တို့ကိုမြင်ဟန်မတူသလို။ ပြောစကားကိုလည်းကြားဟန်မရှိပေ။ အချစ်နာလံထစမို့စနောက်ကျီစယ်လျှက်ရှိနေကြ၏ ။
ထိုစဉ်မှာပင်လော့ချထားသောအခန်းမှာ ရုတ်တရက်
ပွင့်လာသလို လူတစ်ယောက်လှမ်းဝင်လာသောကြောင့် ကုတင်ပေါ်မှစုံတွဲမှာအလန့်တကြားဖြစ်သွားကြ၏ ။
” ဟင်...ရှင်...ရှင်...ဘယ်သူလဲ.....”
....ဟင်...မင်းဘယ်သူလဲကွ...
...ဝှီး...
...ဒုတ်...
...အု..ုအု......
..အောင်မလေး...
အဖရိကလူမဲကြီးကိုကြည့်၍သူခိုးလူမိအလန့်တကြားဖြစ်နေကြစဉ် အဖရိကလူမဲကြီးက ဖြူဖွေးသောသွား
များတချက်ပေါ်အောင်ပြုံးလိုက်ပြီး သူလက်မှလှံတံကို
လက်မြှောက်၍ပစ်လွတ်လိုက်ရာ ကြည်ပြာနဲ့ဖောက်ပြန်သူလည်ပင်းကို ထုတ်ခြင်းဖောက်စိုက်ဝင်သွားတော့၏ ။
လည်ပင်းမှသွေးများမှာငေါက်ခနဲပန်းထွက်လာရင်း
သွေးများက အိပ်ယာခင်းအဖြူပေါ်ရဲရဲနီသွားတော့သည်။
...ကျွန်မ...ကျွန်မကို မသတ်ပါနဲ့....တောင်းပန်ပါတယ် ..
.....စွတ်....
...အား....
အဖရိကလူမဲကြီးမှာ ကြည်ပြာနဲ့ဖောက်သောသူလည်ပင်းမှလှံတံကိုဆွဲနူတ်ပြီး ကြောက်လန့်တကြားငိုယိုတောင်းပန်နေသော
ကြည်ပြာရင်ဘတ်ကို ထိုးစိုက်ချလိုက်ရာ ကြည်ပြာ
မှာနာကျင်စွာအော်ဟစ်လိုက်ပါတော့သည်။
ထိုမြင်ကွင်းကိုအားရစိတ်ဖြင့်ကြည့်နေသောကိုအေး
ကျော်တစ်ယောက်ထိုအချိန်ကျမှအိပ်ယာမှနိူးလာတော့၏။
ထိုအချိန်မှာပင်.သူ့တယ်လီဖုန်းမြည်လာ၏ ။
”....ဟယ်လို.....ကိုကိုကြီးလား..မမလေးအခန်းထဲကအော်သံကြားလို့သွားကြည့်တာ မမလေးအသတ်ခံထားတာတွေ့ရတယ်။ သူ့ဘေးမှာလည်း ယောက်ကျားအလောင်းတစ်လောင်း
ရှိနေတယ်....”
”..ဟင်........ဘယ်လို......အေးမိ... နင့်မမလေး
အသတ်ခံရတယ် ဟုတ်လား....ရဲစခန်းကိုဖုန်းဆက်
ပြီးပြီလား ....”
”...ဘာလုပ်ရမှန်းမသိထူပူပြီး ကိုကိုကြီးကိုအရင်ဆက်လိုက်တာ အေးမိကြောက်တယ်၊ လူသတ်သမားရှိသေးလားမသိဘူး ၊.. ”
”..ကိုကိုကြီးပြောတာသေချာနားထောင်အေးမိ
ရဲစခန်းကိုဖုန်းဆက် မကြောက်နဲ့ မနက်ဖြန်မိုးလင်းတာနဲ့ ကိုကိုကြီးပြန်လာခဲ့မယ်... ”
ကိုအေးကျော်မှာသူအိပ်မက်လိုလိုအဖြစ်အပျက်က
တကယ်အပြင်တွင်ဖြစ်ပျက်နေခြင်းအတွက်အံ့သြသင့်
နေရ၏ ။.
ယခုကိစ္စတွင်သူ့ကိုအမူပတ်နိူင်သောကြောင့် ပြင်ဆင်စရာရှိသည်များကိုပြင်ဆင်ရန် တည်းခိုခန်းနဲ့ကပ်လျှက်ညလုံးပေါက်ဖွင့်သော
ဘီယာဆိုင်တွင်ဘီယာတစ်လုံးနဲ့အမြည်းများမှာရင်း
ရန်ကုန်မှသူ့မိတ်ဆွေများထံသို့ သူဇနီးအသတ်ခံရသောသတင်းကို ဖုန်းဆက်ပြော
နေပါတော့၏ ။
မိုးလင်းသည်နဲ့ရန်ကုန်သို့ပြန်လာခဲ့တော့၏ ။
သူပြန်ရောက်လာသောအခါအိမ်တွင် ဆွေမျိုးမိဘများနဲ့အတူ၊ရဲများရောက်ရှိနေသည်ကိုတွေ့လိုက်ရတော့သည်။
ထိုလူသတ်မူတွင်အဓိကမသင်္ကာစရာမှာ ကိုအေးကျော်ဖြစ်သောကြောင့် ကိုအေးကျော်ကို
ရဲစခန်းမှမသင်္ကာမူနဲ့ဖမ်းခေါ်သွားပြီးစစ်မေးတော့၏ ။
ဇနီးဖြစ်သူနဲ့ဖောက်ပြန်သူကိုရက်ရက်စက်စက်သတ်သူမှာ ခင်ပွန်းမှလွဲ၍တခြားသူမဖြစ်နိူင်ဆိုသည်က သာမာန်လူများပင်တွေးနိူင်သောအတွေးပင်။
ကိုအေးကျော်မည်သို့ပင်စစ်စေကာမူ ၊သူ့မိန်းမဖောက်ပြန်နေသည်ကိုယခုမှပင်သိကြောင်း။
အခင်းဖြစ်ချိန်ကသူမန္တလေးသို့ရောက်နေကြောင်းသက်
သေအလီဘိုင်ခိုင်လုံစွာပြနိူင်၏ ။
အိမ်ဖော်မလေးအားစစ်မေးရာတွင်လည်း ကိုအေးကျော်မှာအသောက်အစားမရှိသည့်အပြင်
မယားဖြစ်သူအပေါ်ကိုယ်ထိလက်ရောက်ရိုက်နှက်ရန်
မဆိုထားနဲ့ စကားပင်မာမာမပြောဖူးကြောင်း။
လင်မယားနှစ်ယောက်မှာလည်း ဖောက်ပြန်သောကိစ္စ
နဲ့စကားများရန်ဖြစ်သည်ကိုတခါမှမကြားမိကြောင်းဖြေ
လာ၏ ။
ယခုဖောက်ပြန်သူမှာလည်းအိမ်ကိုလာလေ့မရှိပဲ
သေဆုံးသောနေ့တွင်သာ ကြည်ပြာကားနဲ့လိုက်.
လာသည်ကိုမြင်ကြောင်းဖြေကြားလာ၏ ။
ကိုအေးကျော်အေး၏ သူငယ်ချင်းများကိုစစ်မေးရာတွင်လည်း ကိုအေးကျော်မှာအလုပ်နဲ့သာနပန်းလုံးပြီး သူ့အိမ်ကိစ္စ
အဆင်မပြေသည်ကိုမကြားမိကြောင်း ထိုလူသတ်မူ
ကိုအေးကျော်နဲ့လုံးဝမဆိုင်ကြောင်းကိုအေးကျော်မိတ်
ဆွေများကသက်သေခံကြ၏ ။
ရဲများမှာကိုအေးကျော်နဲ့ပတ်သက်၍လူသတ်မူသဲလွန်စ
ရှာမရသောအခါ ။
မတတ်သာသောကြောင့်ကိုအေးကျော်ကိုလွတ်ပေးလိုက်ရ၏ ။
ကြည်ပြာနဲ့ဖောက်ပြန်သူအကြောင်းစုံစမ်းသောအခါ
ထိုလူနာမည်မှာ အောင်နိူင်ဦးအမည်ရပြီး လင်ရှိမိန်းမများနဲ့ ဖောက်ပြန်သောနာမည်ပျက်ထွက်ဖူး
သူတစ်ယောက်ဖြစ်ကြောင်းသိရပြီး ထိုကိစ္စနဲ့ပတ်သက်၍ မကျေနပ်သူတစ်ယောက်က
အောင်နိူင်ဦးကိုလာသတ်ရာမှ မျက်မြင်သက်သေကြည်ပြာကိုပါသတ်လိုက်ကြောင်းလိုသလိုကောက်ချက်ဆွဲလိုက်ကြတော့သည်။
အိမ်တခါးလည်းမဖွင့်၊ခြံတခါးလည်းမပွင့်ပဲ
အိပ်ခန်းထဲမှလူနှစ်ယောက်ကိုသတ်သွားသူမှာ မြေလျိုးမိုးပျံအတတ်ကိုပင်တတ်သူလားဟုအထင်ရောက်စရာသဲလွန်စပျောက်နေပါတော့သည်။
အထက်ဖော်ပြပါဇာတ်လမ်းမှာ ရန်ကုန် ဗဟန်းမှရွာမှဘုန်းတော်ကြီးကျောင်းသို့အလည်အပတ်သွားရောက်စဉ် ကျွန်တော့်အား သူ့ဘဝဇာတ်လမ်းကို ဦးဇင်းတပါးပြောပြသောအကြောင်းအရာဖြစ်၏ ။
ကျွန်တော်မှာ အဖရိကဗူဒူးအရုပ်ကိုစိတ်ဝင်တစား
မေးမြန်းကြည့်ရာ တတ်သိနားလည်သောဆရာများ
နဲ့ အရုပ်ထဲမှဝိညဉ်ကိုဖယ်ပြီး အရုပ်ကိုမီးရိူ့လိုက်
ကြောင်းပြောပြလာသောကြောင့် လူသားဗူဒူးအရုပ်အား
ကြည့်ရူခွင့်မရခဲ့ပေ။
ကိုအေးကျော်ဆိုသော ထူးဆန်းသောစိတ်ရှိသူ
တစ်ယောက်နဲ့ လူအငယ်စားဗူဒူးအရုပ်အကြောင်းကို
သိခွင့်ရခဲ့သောကြောင့် ရေးသားဖော်ပြလိုက်ရခြင်း
ဖြစ်ပါတော့သည်။
=====================
ပြီးပါပြီ
မြူခိုးအလင်္ကာ